Deuteronomio

19 »Kʼalal te Jehová te Dios awuʼunik ya slajin te nacionetik te ayik ta kʼinal te ya yakʼbeyex te Jehová te Dios awuʼunik yuʼun ya akʼinalinik, sok te kʼalal la awichʼbeyikix skʼinalik te jich yakexix ta nainel ta mukʼul lumetik sok ta naetik yuʼunik, 2 yame atsaik oxeb mukʼul lumetik ta yolil te kʼinal te ya yakʼbeyex akʼinalinik te Jehová te Dios awuʼunik. 3 Ta ox-xejtʼ yame skʼan ya alokʼesik te kʼinal te ya yakʼbeyex akʼinalinik te Jehová te Dios awuʼunik, yame achajpanik beetik yuʼun tey ya xbajtik ta anel te jmilawal yuʼun jich ya xkʼot ta jpamuk te mukʼul lumetik-abi.

4 »Jaʼme jich te bin ya xkʼot ta stojol te jmilawal te ya xbajt ta anel tey-a yuʼun kuxul ya xjil: teme ma yolojuk la smil te spatxujk te maʼyuk bin-ora yilintayoj-ae 5 —jich bitʼil teme bajt sok te spatxujk ta teʼtikil ta chʼuy siʼ, pero botsʼ lokʼel ta steʼel te yechej te jich ya yejchentes te spatxujk te ya xlaj yuʼun—, te jmilawal yame skʼan ya xbajt ta anel ta jpamuk te mukʼul lum-abi yuʼun jich kuxul ya xjil. 6 Teme ma jichuk ya spase, te sfamilia te machʼa la yichʼ milel* ya xjuʼ ya snuts bael te jmilawal sok te kʼalal ya sta, ya smil ta skaj te skʼajkʼal yoʼtan, melel namal* jil yuʼun te mukʼul lume. Pero ma snujpʼuk te la yichʼ milele, melel maba yilintayoj-a te spatxujke. 7 Jaʼ yuʼun ya kalbat ta mantal: ‹Tsaa oxeb mukʼul lumetik›.

8 »Teme ya smukʼubtesbeyex akʼinalik te Jehová te Dios awuʼunik jich te bitʼil la yalbey ta jamal te antiguo ameʼ atatik sok teme ya yakʼbeyex spisil te kʼinal te jamal la yalbey te antiguo ameʼ atatik te ya yichʼik akʼbeyel yuʼune 9 —jaʼnax teme sok spisil awoʼtanik ya achʼuunik spasel te mantal te yak kalbelex ta ora ini te kʼuxuk ta awoʼtanik te Jehová te Dios awuʼunik, te ya xbeenex ta spisil-ora ta beetik yuʼun—, jaʼto-abi yame skʼan ya atsaxan oxeb mukʼul lumetik. 10 Yuʼun jich maba ya yichʼ malel schʼichʼel te machʼa manix ayuk smul-ae tey ta kʼinal te ya yakʼbeyex akʼinalinik te Jehová te Dios awuʼunik, jich maba ya ata amulik ta swenta smalel chʼichʼ.

11 »Pero, teme ay machʼa te yilintayoj te spatxujk ya sle te bin-utʼil ya stsak sba sok, te jich tulan ya smaj te ya xlaj yuʼun, tey-abi ya xbajt ta anel ta jpamuk te mukʼul lumetik-abi, 12 te jwolwanejetik yuʼun te slumal te jmilawal yame skʼan ya stikunik ta ikʼel tal tey te banti aye sok yame skʼan te ya yakʼbeyik ta skʼab te sfamilia te machʼa la yichʼ milel, yuʼun jich ya yichʼ milel-euk. 13 Mame xa anaʼbeyik yoʼbolil sba. Yame skʼan ya alokʼesik ta lum yuʼun Israel te machʼa ya smalbey schʼichʼel te machʼa maʼyuk smul, jich lek ya xkʼoex ta lokʼel-a.

14 »Te kʼalal ya yakʼbeyex akʼinalinik te kʼinal te banti ya yakʼbeyex te Jehová te Dios awuʼunik, mame xa ajelbeyik yawil te smojonil* skʼinal te apatxujkik te banti la yakʼik jilel te antiguo ameʼ atatik.

15 »Mame xjuʼ te ay machʼa ya yichʼ castigo teme jtulnax testigo kʼopoj, chikan teme ay banti chʼay o la spas tulan mulil. Spisil te bin ya yichʼ chajpanel ya skʼan te ay chaʼtul o oxtul testigoetik te ya yalik te bin kʼot ta pasele. 16 Teme ay machʼa ta schopolil yoʼtan* ya yakʼ sba ta testigo ta skontrainel yan sok ya slebey smul te ay la skʼaxuntay jun ley, 17 ta schebalik te machʼatik yakik ta stsakbel sbaik ta kʼop yame skʼan ya stejkʼan sbaik ta stojol te Jehová, ta stojol te sacerdoteetik sok ta stojol te juecetik te ayik ta aʼtel ta kʼajkʼaletik-abi. 18 Te juecetik ya stʼunbeyik ta lek skʼoplal te bitʼil ay te kʼope, teme la yichʼ naʼel te lotil te bin la yal te testigo sok jichnax la slebey smul te yermano, 19 te jaʼexe jichme ya skʼan apasbeyik te bin snopoj ya spasbey te yermano, yame skʼan ya alokʼesik ta awolilik te bintik chopole.* 20 Te yantik ya yaʼiy stojol sok ya xiwik yuʼun, jich maʼyuk bin-ora ya schaʼpasik te bin chopol* ini ta awolilik. 21 Mame xa anaʼbeyik yoʼbolil sba: teme ay machʼa la slajinbey skuxlejal yan, teme ay machʼa la stʼusbey te sit, teme ay machʼa la slokʼesbey te sbakel ye, teme ay machʼa la swakʼbey* te skʼab o teme ay machʼa la swakʼbey te yok, jaʼnixme jich akʼa yichʼ pasbeyel-euk.