Deuteronomio

13 »Teme ay ya xchiknaj ta awolilik jtul j-alwanej o jtul te machʼa ta swenta wayichil ya yal te bin ya xkʼot ta pasel ta pajel chaʼbej sok ya yakʼbeyex awilik jun señail o ya yalbeyex te bin yato xkʼot ta pasel, 2 teme jichnix kʼot ta pasel te señail o te bin la yalbeyex sok jich ya yal: ‹Jtʼuntik yantik diosetik —diosetik te maba anaʼojbeyik sba— sok akʼa kichʼtik ta mukʼ›, 3 mame xa awaʼiybeyik skʼop te j-alwanej-abi sok te jwayich winik-abi, melel te Jehová te Dios awuʼunik yak spasbelex ta prueba yuʼun jich ya snaʼ teme kʼux ta awoʼtanik te Jehová te Dios awuʼunik ta spisil awoʼtanik sok ta spisil akuxlejalik. 4 Yame skʼan ya atʼunik te Jehová te Dios awuʼunik sok yame axiʼik; yame skʼan ya achʼuunik spasel te mantaliletik yuʼun sok yame awaʼiybeyik skʼop; yame skʼan ya x-abatinex ta stojol sok jaʼnax ya awakʼ abaik ta stojol. 5 Te j-alwanej-abi o te jwayich winik-abi yame skʼan ya yichʼ milel, melel la yakʼ te ya atoy abaik ta stojol te Jehová te Dios awuʼunik —te la slokʼesex tal ta skʼinal Egipto sok la skoltayex lokʼel ta kʼinal te banti mosoinbilex-ae—, yuʼun ya awijkitayik jilel te be te yalojbeyex te Jehová te Dios awuʼunik te ya skʼan ya atʼunike. Yame skʼan ya alokʼesik ta awolilik te bintik chopole.*

6 »Teme te abankilik o awijtsʼinik —te skerem-al te ananik*— te akerem nichʼnabik, te awantsil nichʼnabik, te awinamik te kʼux ta awoʼtanik o te awamigotakik te jun awoʼtan abaik sok te muken ay bin ya sujex ta spasel te jich ya yalbeyex ‹Konik, akʼa kichʼtik ta mukʼ yantik diosetik› —diosetik te maba anaʼojbeyik sba ni jaʼuk te antiguo ameʼ atatik la snaʼbeyik sba, 7 jaʼ te diosetik yuʼun te lumetik te ayik ta ajoyobalik, chikan teme nopol* o namal* ayik ta atojolik, ta stiʼil kʼinal kʼalal ta yan stiʼil te lume—, 8 mame xa achʼuunbeyik te bin ya yalbeyex sok mame xa awaʼiybeyik skʼop. Jaʼnix jich mame xa akʼuxultayik, mame xa anaʼbey yoʼbolil sbaik sok mame xa akoltaybeyik skʼoplal. 9 Te bin ya skʼan ya apasike, jaʼ te yananixme amilik-a. Jaʼatme nail ya skʼan ya ajach akʼab yuʼun ya yichʼ milel, ta patil akʼa sjach skʼabik spisil te lume. 10 Yame skʼan ya achʼojik ta ton jaʼto te kʼalal ya xlaj, melel la skʼan te ya awijkitayik te Jehová te Dios awuʼunik te la slokʼesex tal ta skʼinal Egipto sok la skoltayex lokʼel ta kʼinal te banti mosoinbilex-ae. 11 Te kʼalal ya yaʼiyik stojol spisil te lum Israel ya xiwik yuʼun, jich maʼyuk bin-ora ya schaʼpasik te bin chopol* ini ta awolilik.

12 »Teme ay bin-ora jich ya xkʼot ta pasel ta jpam mukʼul lum te la yakʼbeyex te Jehová te Dios awuʼunik yuʼun ya xnainex tey-a, te ay machʼa jich ya yal: 13 ‹Ay chiknaj ta awolilik chaʼoxtul winiketik te ma xtuunik yuʼun ya yakʼ xjowijex sok jich yakik ta yalel: «Konik, akʼa kichʼtik ta mukʼ yantik diosetik», diosetik te maba anaʼojbeyik sba›, 14 yame skʼan ya awilbeyik ta lek skʼoplal te bin kʼoem ta pasel, tʼunbeyaik skʼoplal sok jojkʼoyaik ta lek. Teme ya yichʼ naʼbeyel skʼoplal te yuʼun-nix kʼot ta pasel ta awolilik-a te bin ilobtik sba, 15 yananixme skʼan ya amilik ta espada te yajwalul te mukʼul lum-abi. Lajinaik ta espada sok spisil te bintik ay tey-ae, teyme ochem skʼoplalik-euk te chambalametik. 16 Ta patil yame skʼan ya atsobik te sbilukik ta yolil te plaza* sok ya achikʼik te lume, spisil te biluketik jichme ya xkʼot bitʼil chikʼbil majtanil ta stojol te Jehová te Dios awuʼunik. Spisilme-ora busul tonetik ya xjil te mukʼul lum-abi. Maʼyukix bin-ora ya yichʼxan pasel. 17 Mame ayuk bin xa atsakik te akʼbil yuʼun ya yichʼ lajinel, yuʼun jich ya skom yilinba te Jehová ta atojolik sok ya skʼuxultayex, ya snaʼbeyex yoʼbolil abaik sok ya yakʼ xpʼolex jich bitʼil la yalbey ta jamal te antiguo ameʼ atatik. 18 Yame skʼan ya achʼuunbeyik skʼop te Jehová te Dios awuʼunik te kʼalal ya akʼotesik ta pasel spisil te mantaliletik yuʼun te yak kalbelex ta ora ini, jich ya apasik te bin lek ta sit te Jehová te Dios awuʼunik.