Proverbios
24 Mame xa abikʼtal oʼtantay te machʼatik chopolik*
sok mame kʼaxto ya yikʼbat awoʼtan sjokinlanel,
2 melel ya schap ta lek ta yoʼtanik te bitʼil ya x-utsʼinwanik,*
te kʼalal ya sjam yeik, jaʼ ya yalik te bintik chopol.*
3 Ta swenta pʼijil oʼtanil ya yichʼ pasel te na*
sok ta swenta te bintik ay ta naʼel stsajtayel* yame yichʼ yip.
4 Ta swenta te bin ay ta naʼel ya xnoj te cuartoetik
ta spisil ta chajp tʼujbil kʼulejalil te kʼax mukʼik skʼoplal.
5 Te machʼa ay spʼijil yoʼtan ya snaʼ ta lek te bin ya spas,
ta swenta te ay bin ya snaʼ te ants winik ya snaʼxan ta lek te bin ya spas.
6 Te kʼalal ya awakʼ guerra, lea lekil tojobtesel;*
te kʼalal ay bayal jtojobteswanejetik, yame xjuʼ awuʼun tsalaw.*
7 Te machʼa ma snaʼ kʼinal ma sta te smelelil pʼijil oʼtanil,
jich yuʼun maʼyuk bin ya xjuʼ ya yalbey skʼoplal ta yochibal te mukʼul lum.
8 Te machʼa ya schap spasel te bin chopol*
yame yichʼ naʼbeyel sba bitʼil maestro yuʼun spasel te bin chopol.
9 Te bin ya schap ta yoʼtan te machʼa maʼyuk spʼijil yoʼtan jaʼ mulil,
te ants winiketik ya spʼajik te jlabanwanej.
10 Teme ya xchebaj awoʼtan ta yorail tulan wokol,
yame xlaj awip yuʼun.
11 Koltaya lokʼel tal te machʼatik yakik ta ikʼel bael ta lajel
sok ma xa awakʼ te ya xbajtik ta milel te machʼatik maʼyukix yipike.
12 Teme jich ya awal «Pero ma jnaʼojtik stukel-abi»,
¿yuʼunbal ma snaʼ te machʼa ya yil ta lek te bin-nix ay ta koʼtantik-ae?*
Yak, yananixme snaʼ-a te machʼa yak ta yilbelat
sok yame yakʼbey stoj ta jujuntul te ants winiketik jaʼ chikan te bin yilel te yaʼtelike.
13 Jnichʼan, loʼa chab, melel ya skoltayat;
te chabe chiʼ ta ketik.
14 Mame xchʼay ta awoʼtan te jaʼnix jich ya skoltayat te pʼijil oʼtanil.
Teme ya atae, lek ya xkʼoat ta lokʼel ta pajel chaʼbej
sok maʼyuk bin-ora ya xlaj skʼoplal te bin yakat ta smaliyele.
15 Mame xa anakʼ aba ta nopol* sna te machʼa toj yoʼtan yuʼun ya awutsʼin,*
sok mame xa ajin te banti ya skux yoʼtane.
16 Manchukme ya xyal jukeb buelta te machʼa toj yoʼtan,
yananixme stam sba jajchel-a,
pero te machʼa chopol* jaʼme ya xyaltesot yuʼun te wokolile.
17 Te kʼalal ya xyal te akontra, mame tseʼeluk awoʼtan yuʼun,
sok te kʼalal ya skʼojchin yok, mame xyakʼbat stseʼelil awoʼtan,
18 melel teme jich ya apase, yame yil te Jehová sok maba ya smulan,
sok yame skom te yilinba ta stojol te akontra.
19 Mame x-ilinat ta skaj te machʼatik chopolik*
mame ayuk sbikʼtal awoʼtan ta stojol te chopol ants winiketik,
20 melel maʼyuk bin ya smaliy ta pajel chaʼbej te machʼa chopol;*
yame xtupʼ te tsumbil kʼajkʼ yuʼun te machʼatik chopolik.
21 Jnichʼan, xiʼa te Jehová sok te ajwalil.
Sok mame xa ajokin te jtoybaetik,*
22 melel ta repentenax ya xjul te lajinel ta stojolik.
Ma jnaʼtik bin wokolil ya yakʼik tal* ta stojol te jtoybaetik.
23 Te kʼopetik ini jaʼnix jich ya yalik-euk te machʼatik ay spʼijil yoʼtanik:
ma lekuk te tsabilnax te machʼa lek ya awilik te kʼalal ya xchajpanwanex.
24 Te machʼa jich ya yalbey te machʼa chopol* «Maʼyuk amul», te xchie,
yame schopolkʼoptayot yuʼun te lumetik sok yame x-albot smul yuʼun te nacionetik.
25 Pero, te machʼatik ya stsitsawanik* lekme ya xkʼotik ta lokʼel;
sok yame yichʼik majtantesel sok bintik lek.
26 Te ants winiketik yame yujtsʼuy* te machʼa smelelil te bin ya yale.*
27 Nail xa achajpan ta lek te awaʼtel sok pasa spisil te aʼtelil ya skʼan pasel ta akʼinal;
ta patil pasa te ana.*
28 Mame xa awakʼ aba ta testigo yuʼun tojolnax ya alebey smul te apatxujk.
Mame xa atuuntes te awe yuʼun ya aloʼlay te yantike.
29 Mame jichuk xa awal: «Jichnix ya jpasbey-euk te bin la spasbon;
ya kakʼbey stoj te bin la spase».
30 Kʼaxon ta skʼinal te chʼajil winik,
kʼaxon ta tsʼusubiltik yuʼun te winik te maʼyuk spʼijil yoʼtan.
31 La kil te pimuben ta jaʼmal,*
nojel ta chʼixetik
sok jemtsʼujem koel te stsʼajkʼul te pasbil ta ton.
32 Te kʼalal jich la kil, ay bin jajch jnop yuʼun;
la kil sok jaʼ la jnop ini:*
33 teme yato xwayat jtsʼinuk,* teme yato amutsʼxan asit jtsʼinuk,
teme yato apetxan akʼab ta wayel...,
34 jichme ya xjul ta atojol te pobreil te bin-utʼil j-elekʼ
sok te bin-utʼil jtul winik te ay yaʼtejib yuʼun milaw.