Números

14 Jaʼ yuʼun, spisil te lum jajchik ta tulan aw sok sjunal ajkʼabal yakik ta okʼel. 2 Spisil te israeletik jajchik ta wulwulkʼop ta stojol te Moisés sok te Aarón. Spisil te lum jajch skontrainik, jich ya yalulanik: «¡Jaʼ lek te lajukotik ta skʼinal Egipto! ¡Jaʼ lek te lajukotik ta jochol takin kʼinal ini! 3 ¿Bin yuʼun la yikʼotik tal te Jehová ta kʼinal ini? ¿Jaʼnaxbal yuʼun ya kichʼtik milel ta espada? Ya xbajt kichʼtik pojbeyel te kinamtik sok te kal jnichʼnabtik, ¿mabal jaʼuk lekxan te yakuk sujtotik bael ta Egipto?». 4 Jich talel kʼaxel ya yalbey sbaik: «¡Akʼa jletik jtul jwolwanej yuʼun ya sujtotik bael ta Egipto!».

5 Tey-abi, te Moisés sok te Aarón la spajkan sbaik kʼalal ta lum ta stojol spisil te israeletik te tey stsoboj sbaik-ae. 6 Te Josué snichʼan Nun sok te Caleb snichʼan Jefuné te xkʼotukik ta stsajtayel* te kʼinal la schʼiʼtiklan* te skʼuʼik, 7 jich la yalbeyik spisil te lum yuʼun Israel: «Te kʼinal te kʼot jtsajtaykotik* mero kʼax lekil kʼinal. 8 Teme tseʼel yoʼtan te Jehová ta jtojoltike, yananixme yikʼotik ochel ta kʼinal-abi sok yame yakʼbotik jkʼinalintik te kʼinal te banti ya yakʼ bayal leche sok chab. 9 Pero mame xa akontrainik te Jehová sok mame xa axiʼik te yajwalul te lume, melel tsalbilix kuʼuntik.* Mame kanantaybilik, yan te joʼotike sjokinojotik te Jehová. Mame xa axiʼik».

10 Jaʼ yuʼun, spisil te lum kʼan schʼojik ta ton yuʼun. Pero te yutsilal te Jehová chiknaj ta sba te nailpakʼ ta swenta tsoblej ta stojol te lum yuʼun Israel.

11 Tey-abi, te Jehová jich la yalbey te Moisés: «¿Jayebtoxan kʼajkʼal te maba ya yichʼonik ta mukʼ te lum ini? ¿Jayebtoxan kʼajkʼal te maba ya yakʼik ta ilel te schʼuunel yoʼtanik ta jtojol manchukme la jpasix bayal milagroetik* ta yolilik? 12 Ya jtikunbey tulan chamel sok ya jlajinlan, yan te jaʼate ya kakʼ te mukʼul nación ya xkʼoat sok bayalxan awip te bitʼil stukelik».

13 Pero, te Moisés jich la yalbey te Jehová: «Sok awuʼel jaʼat la alokʼes tal te lum ini ta yolil te egipcioetik. Teme jich ya apas-abi, yame yaʼiy stojol te egipcioetik 14 sok yame yalbeyik yaʼiy te machʼatik nainemik ta kʼinal ini. Jaʼnix jich yaʼiyojik akʼoplal te jaʼat, Jehová, ayat ta yolil te lum ini sok te awakʼoj aba ta ilel ta stojolik. Jaʼat Jehová, te tokal awuʼun ay ta stojolik, nailajemat bael ta stojolik ta balal tokal ta kʼajkʼaleltik sok ta balal kʼajkʼ ta ajkʼabal. 15 Teme ta jun-nax buelta ya amil te lum ini, jich ya xbajt yalik te nacionetik te yaʼiyojik akʼoplal: 16 ‹Te Jehová ma juʼ yuʼun yikʼel bael te lum ini ta kʼinal te jamal yaloj te ya yakʼbeye, jich yuʼun la smiltiklan ta jochol takin kʼinal›. 17 Ta ora ini, Jehová, awokoluk, akʼa ta ilel te smukʼul awuʼel, jich te bin-utʼil awaloj ta jamal: 18 ‹Te Jehová ma x-ilin ta ora sok ya yakʼ ta ilel kʼuxul oʼtanil te ma x-ijkitaywan, te ya spasbey perdón te machʼa ay bin ma lek ya spas, te jkʼaxunkʼop, pero yananix yakʼbey castigo-a te machʼa ay smul sok ta swenta te smul te meʼil tatil yame xkʼot castigo ta stojol te yal snichʼnab, soknix te yoxkajal sok schankajal stsʼumbal›. 19 Awokoluk, pasbeya perdón yuʼun smulik te lum ini ta swenta te smukʼul skʼuxul awoʼtan te ma x-ijkitaywan jichnix te bin-utʼil apasojbey perdón te lum ini kʼalal ayik ta Egipto jaʼto tal ta ora ini».

20 Te Jehová jich la yal: «Ya jpasbey perdón jich bitʼil la awalbone. 21 Pero ma jaʼuknax-abi, jamal ya kal te kuxulone, ta swolol balumilal ya xnoj ta yutsilal te Jehová. 22 Maʼyuk jtuluk te yilojbonik te kutsilal sok te milagroetik* la jpas ta Egipto sok ta jochol takin kʼinal te lato spasonik ta prueba lajuneb buelta sok maba la yaʼiybonik te jkʼope, 23 maʼyuk bin-ora ya yilik te kʼinal te la kalbeyik ta jamal te smeʼ statik te ya kakʼbeyike. Jich, maʼyuk jtuluk te ya yil teme maba ya yichʼonik ta mukʼe. 24 Yan stukel te kabat Caleb te la yakʼ ta ilel lekil talelil sok jun yoʼtan la stʼunon, ya kikʼ ochel ta kʼinal te kʼot yile sok jaʼme yuʼun ya xkʼot te stsʼumbale. 25 Ta skaj te yakik ta nainel ta spamlej kʼinal te amalequitaetik sok te cananeoetik te pajele akʼaik buelta, baanik ta jochol takin kʼinal ta sbelal te mar Rojo».

26 Ta patil, te Jehová jich la yalbey te Moisés sok te Aarón: 27 «¿Jayebtoxan kʼajkʼal maba ya skom sbaik ta wulwulkʼop ta jtojol te chopol lum ini? La kaʼiy te bin yakik ta yalel te israeletik ta jtojol. 28 Altiklanbeya: ‹¡Jamal ya kal te kuxulone —xchi te Jehová— jichnix ya jpasbeyex te bitʼil la kaʼiy stojol te la awalik! 29 Ta jochol takin kʼinal ini yame xjil te abakʼetalik, jich, ta apisilik te machʼatik 20 awaʼbilalik o te kʼaxemxan-a te la awichʼik najkanbeyel abiilik, jaʼex apisilik te la akontrakʼoptayonik. 30 Maʼyuk jtulukex te ya x-och ta kʼinal te jamal la kalbeyex te ya xnainex tey-a, jaʼnax te Caleb snichʼan Jefuné sok te Josué snichʼan Nun.

31 ›»Pero, te awal anichʼnabik te la awalik te ya yichʼik pojel bael ya kikʼtiklan bael ta kʼinal te jaʼex la apʼajike, jaʼ ya xbajt yilik. 32 Pero, te abakʼetalik liʼ ya xjil ta jochol takin kʼinal. 33 Yame xkʼotik ta jkanantuminchijetik te awal anichʼnabik ta jochol takin kʼinal 40 jaʼbil sok jaʼme ya stojik te bitʼil ma junuk awoʼtanik jaʼto ya xlaj swokolik-a kʼalal ya xlajex ta apisilik ta jochol takin kʼinal. 34 Te bitʼil 40 kʼajkʼal jalajex ta stsajtayel* te kʼinal jichnix 40 jaʼbil ya atojik te amulike, te jun kʼajkʼale jaʼme jun jaʼbil ya xkʼot, te jun kʼajkʼale jaʼme jun jaʼbil ya xkʼot. Jich ya xbajt snaik bin smakojbey skʼoplal te ya skontrainonike.

35 ›»Joʼon, Jehovaon, jich kalojix. Jich ya jpasbey te chopol lum ini te jun yoʼtan la yakʼ sbaik ta skontrainbelonik: liʼme ya xlaj skʼoplalik ta jochol takin kʼinal, liʼme ya xlajik. 36 Te winiketik te tikunotik bael yuʼun te Moisés ta stsajtayel* te kʼinal sok te la yakʼ te ochukik ta wulwulkʼop te lum ta stojol te Moisés ta skaj te ma lek la yalbeyik skʼoplal te kʼinal te kʼalal sujtik tal, 37 jich, te winiketik te kʼot yalik te ma lek skʼoplal te kʼinale yame yichʼik castigo sok yame xlajik ta sit yelaw te Jehová. 38 Yan stukel te Josué snichʼan Nun sok te Caleb snichʼan Jefuné jaʼnaxme kuxul ya xjilik ta spisil te machʼatik kʼotik ta stsajtayel* te kʼinale›».

39 Kʼalal te Moisés jich la yalbey yaʼiy spisil te israeletik, bayal la smel yoʼtanik yuʼun. 40 Buen sab jajchik sok moik bael ta sba te witse. Jich la yalik: «Liʼme ayotik, chapalonkotikix yuʼun ya xmootik bael ta lugar te la yalbotik skʼoplal te Jehová, melel la jta jmultik». 41 Pero, te Moisés jich la yal: «¿Bin yuʼun yakex ta skʼaxuntayel skʼop te Jehová? Maʼyuk bin lek ya xkʼot ta lokʼel ta atojolik yuʼun. 42 Jich yuʼun, mame xmoex bael, melel maba sjokinojex te Jehová, yame stsalex te akontraike. 43 Melel te amalequitaetik sok te cananeoetik tey yakik smaliybelex-a yuʼun ya yakʼbeyex guerra, jich ya smilex ta espada yuʼunik. Ta skaj te la awijkitayik stʼunel te Jehová, jich maba ya sjokinex te Jehová».

44 Manchukme jich-abi moiknanix bael ta sba te witse, pero maba lokʼ bael ta campamento te skaxaul te chapbilkʼop yuʼun te Jehová ni jaʼuk te Moisés. 45 Jaʼ yuʼun koik tal te amalequitaetik sok te cananeoetik te nainemik tey ta wits, la stsalik te israeletik sok la snutsik bael kʼalalto ta Hormá.