Éxodo
17 Spisil te lum yuʼun Israel lokʼik bael ta jochol takin kʼinal te Sin sbiil. Majkʼalmajkʼ beenik jich te bitʼil albotik ta mantal yuʼun Jehová. Ta patil la spasik scampamentoik ta Refidim, pero maʼyuk la staik jaʼ yuchʼik tey-a.
2 Jaʼ yuʼun, te lum jajch stij ta kʼop te Moisés sok jich la yaltiklanbeyik: «¡Akʼbonkotik jaʼ kuchʼtik!». Pero, te Moisés jich la yal: «¿Bin yuʼun te ya atijonik ta kʼope? ¿Bin yuʼun te maba ya akom abaik ta spasel ta prueba te Jehová?». 3 Pero, te lum yak ta lajel ta takin tiʼil tey-a. Jich yuʼun maba la skom sbaik ta wulwulkʼop ta stojol te Moisés sok jich la yalbeyik: «¿Yuʼunbal la alokʼesotik tal ta Egipto yuʼun ya xlajotik ta takin tiʼil te joʼotik, te kal jnichʼnabtik sok te jchambalamtike?». 4 Te Moisés jich la skʼanbey koltayel te Jehová: «¿Bin ya jpas ta swenta te lum ini? ¡Jtebxanix ya skʼan yuʼun ya schʼojonik ta ton!».
5 Tey-abi, te Jehová jich la yalbey te Moisés: «Nailajan bael ta stojol te lum sok ikʼa bael jwolwanejetik yuʼun Israel, jaʼnix jich ichʼa bael te nabateʼ te la amaj sok-a te mukʼul jaʼ Nilo. Tucha bael ta akʼab. 6 Teyme ayon ta atojol ta sba te mukʼul ton ta Horeb. Yame skʼan ya amaj te mukʼul ton jich yame xlokʼ tal jaʼ tey-a yuʼun ya yuchʼ te lum yuʼun Israel». Jich la spas te Moisés ta sit te jwolwanejetik yuʼun Israel. 7 Jaʼ yuʼun la yakʼbey sbiilin Masá* sok Meribá* te lugar-abi, melel te israeletik la stijik ta kʼop te Moisés sok la spasik ta prueba te Jehová te kʼalal jich la yalik: «¿Sjokinojotikbal te Jehová o maʼuk?».
8 Te amalequitaetik bajtik ta Refidim ta yakʼbeyel guerra te lum yuʼun Israel. 9 Ta swenta-abi, te Moisés jich la yalbey te Josué: «Tsaa winiketik yuʼun ya awikʼ bael ta yakʼbeyel guerra te amalequitaetik. Te pajele ya jtejkʼan jba ta sjol wits sok ya kichʼ bael ta jkʼab te nabateʼ yuʼun te smelelil Dios». 10 Jaʼ yuʼun, te Josué jich la spas te bitʼil albot ta mantal yuʼun te Moisés, bajt yakʼbey guerra te amalequitaetik. Te Moisés, Aarón sok te Hur moik bael ta sjol wits.
11 Kʼalal te Moisés stoyoj-a te skʼabe, jaʼ ya xjuʼ yuʼunik tsalaw-a te israeletik; pero te kʼalal ya skojtes, jaʼ ya xjuʼ yuʼunik-a te amalequitaetike. 12 Kʼalal lujb skʼab te Moisés, la yakʼbeyik ton yuʼun ya snajkan sba. Te Aarón sok te Hur la yakʼ sbaik ta jujun stsʼeel te Moisés yuʼun ya stsakbeyik te skʼabe. Jich maba la skojtes te skʼab jaʼto te kʼalal mal bael te kʼajkʼale. 13 Ta swenta-abi, te Josué la stsal ta espada te Amalec sok te winiketik yuʼune.
14 Jaʼ yuʼun, te Jehová jich la yalbey te Moisés: «Tsʼibaya ta libro te bin kʼot ta pasel swenta snaʼojibal sok albeya yaʼiy te Josué: ‹Ya jlajin ta jkʼaxel te amalequitaetik ta yeʼtal chʼulchan, maba ya yichʼikix naʼel›». 15 Ta patil, te Moisés la spas skajtajib chikʼbil majtanil te la yakʼbey sbiilin Jehová-Nisí,* 16 melel jich la yal: «Ta swenta te la stoy skʼabik ta skontrainel te smukʼul naktajib te Jehová,* te Jehová yame yakʼbey guerra te amalequitaetik ta kajalkaj stsʼumbalik».