2 Reyes

23 Jich yuʼun, te ajwalil la yal ta mantal te akʼa stsob sbaik spisil te jwolwanejetik yuʼun te Judá sok te Jerusalén. 2 Tey-abi, te ajwalil mo bael ta sna te Jehová sok spisil te winiketik yuʼun Judá, spisil te yajwalul te Jerusalén, te sacerdoteetik sok te j-alwanejetik —spisil te lume, ta mukʼ bikʼit—, la skʼoponbey yaʼiy ta spisilik te bin ya yal te libro yuʼun te chapbilkʼop te la staik ta sna te Jehová. 3 Te ajwalil la stejkʼan sba ta stsʼeel te balal oy sok la schap skʼop ta stojol te Jehová te banti la yal ta jamal te ya stʼun te Jehová sok te ya schʼuun spasel sok spisil yoʼtan sok spisil skuxlejal te mantaliletik yuʼun, te jultesel oʼtanil yuʼun sok te bintik yaloj, jaʼ te ya spas spisil te chapbilkʼop te tsʼibaybil ta libro-abi. Spisil te lum lek la yaʼiy te chapbilkʼope.

4 Jich yuʼun, te ajwalil la yalbey ta mantal te mukʼul sacerdote Hilquías, te yantik sacerdoteetik sok te jkanantiʼnailetik te akʼa slokʼesik bael ta templo yuʼun Jehová spisil te biluketik te la yichʼ pasel ta stojol te Baal, ta stojol te chʼul teʼ yuʼun Aserá sok ta stojol spisil te bintik ay ta chʼulchan. Ta patil la yichʼtiklan lokʼel ta Jerusalén, la schikʼtiklan ta chʼin wits yuʼun Cedrón, la yichʼbey bael te stanul ta Betel. 5 La stentiklan lokʼel te sacerdoteetik yuʼun te lotil diosetik te jaʼ la yakʼik ochel ta sacerdoteetik te ajwaliletik yuʼun Judá swenta ya yakʼik te xtomet schʼailel te chikʼbil majtanil yuʼunik ta toyol awilaletik te ayik ta mukʼul lumetik yuʼun Judá sok ta sjoyobal te Jerusalén, jaʼnix jich la stentiklan lokʼel te machʼatik ya yakʼik te xtomet schʼailel te chikʼbil majtanil yuʼunik ta stojol te Baal, te kʼajkʼal, te u, te tsojboltsojb ekʼetik sok spisil te bintik ay ta chʼulchan. 6 La yichʼ lokʼel ta Jerusalén te chʼul teʼ yuʼun Aserá te ay ta sna te Jehová, la yichʼ bael ta spamlej yuʼun Cedrón. Tey la schikʼ-a sok la sjuchʼ jaʼto te kʼalal tanub, ta patil la sbujkʼiy te stanul ta sba te smukenal te ants winiketike. 7 Jaʼnix jich la sjinbey te snaik te winiketik te ya schon sbaik yuʼun ya sjokinik ta wayel yan winik swenta jich ya yichʼik ta mukʼ te lokʼombaetik yuʼunik te ayik ta sna te Jehová sok te banti ya sjalik nailpakʼetik te antsetik te ya xtuun jich bitʼil sna te chʼul teʼ yuʼun Aserá.

8 Jich yuʼun la yikʼ tal spisil te sacerdoteetik te ayik ta mukʼul lumetik yuʼun Judá sok la sbolobtesbey skʼoplal te toyol awilaletik te banti la yakʼik te sacerdoteetik te xtomet schaʼilel te chikʼbil majtaniletik yuʼunik, te jajch tal ta Gueba jaʼto kʼalal ta Beer-Seba. Jaʼnix jich la sjin te toyol awilaletik te ayik ta yochibal te puerta yuʼun te Josué, te jwolwanej yuʼun te mukʼul lum, jaʼ te ay ta skʼexam* te machʼa ya x-och bael ta yochibal te mukʼul lum. 9 Te sacerdoteetik yuʼun te toyol awilaletik maba ya x-aʼtejik ta skajtajib chikʼbil majtanil yuʼun te Jehová ta Jerusalén, pero ya sweʼik te pan te maba yichʼoj levadura sok te yermanotake. 10 Jaʼnix jich la sbolobtesbey skʼoplal te Tófet te ay ta spamlej yuʼun Hinón,* swenta maba ya yichʼikix ta mukʼ lotil diosetik tey-a sok yuʼun maba ya schʼojikix ochel ta kʼajkʼ te skerem nichʼnabik sok te yantsil nichʼnabik ta stojol te Mólek. 11 Maba la yakʼ ochel ta sna te Jehová te caballoetik te la yakʼik ta majtanil te ajwaliletik yuʼun Judá ta stojol te kʼajkʼal, te ya xkʼax ta stsʼeel te cuarto yuʼun te Natán-Mélec —te machʼa yichʼoj mukʼ yaʼtel ta stojol ajwalil—, tey ta slejchelul na. La schikʼ te carretaetik te la yakʼik ta majtanil ta stojol te kʼajkʼal. 12 Jaʼnix jich, te ajwalil la sjin te skajtajib chikʼbil majtaniletik te la spasik te ajwaliletik yuʼun Judá ta sba sna te Acaz soknix la sjin te skajtajib chikʼbil majtaniletik te la yakʼ te Manasés ta schebal yamakʼul sna te Jehová. La swuytiklan sok la sbujkʼiy bael te stsʼubil ta spamlej yuʼun Cedrón. 13 Te ajwalil jaʼnix jich la sbolobtesbey skʼoplal te toyol awilaletik te ay ta yelaw te Jerusalén te ay ta stojol sur* yuʼun te wits yuʼun Jinel swenta maba ya yichʼikix ta mukʼ lotil diosetik tey-a. Te toyol awilaletik-abi jaʼ la spas te Salomón —te ajwalil yuʼun Israel— ta stojol te Astoret te antsil dios yuʼun te sidonioetik te ilobtik sba, ta stojol te Kemós te dios yuʼun Moab te ilobtik sba sok ta stojol te Milcom te dios yuʼun te ammonitaetik te ilobtik sba. 14 La swuy te balal tonetik te ya yichʼik ta mukʼ sok la sjin te chʼul teʼetik yuʼun Aserá, la snojes ta sbakel ants winiketik te banti ayik-ae. 15 Jaʼnix jich la sjin te skajtajib chikʼbil majtanil ta Betel sok te toyol awilal te la spas te Jeroboán snichʼan Nebat te jich la yakʼ sta smul te israeletike. Ta patil, te kʼalal sjinojix-a te skajtajib chikʼbil majtanil sok te toyol awilal, la schikʼ te toyol awilal, la sjuchʼ jaʼto te kʼalal tanub, soknix la schikʼ-euk te chʼul teʼetik yuʼun Aserá.

16 Kʼalal la sut sba te Josías sok la yil te mukenal te ayik ta wits, la yal ta mantal te yakuk slokʼesik tal te sbakel te ants winiketik tey-a sok la schikʼtiklan ta skajtajib chikʼbil majtanil. Jich la sbolobtesbey skʼoplal te skajtajib te chikʼbil majtanil swenta maba ya yichʼikix ta mukʼ lotil diosetik tey-a, jich te bitʼil la yal te Jehová ta swenta te winik yuʼun te smelelil Dios, te jaʼ la yal te jich ya xkʼot ta pasele. 17 Jich yuʼun, jich la sjojkʼoy te Josías: «¿Machʼa smukenal te yakon ta yilele?». Jich albotik yuʼun te winiketik yuʼun te mukʼul lume: «Jaʼ smukenal te winik yuʼun te smelelil Dios te tal ta Judá sok jaʼ la yal te bintik ya apasbey te skajtajib chikʼbil majtanil ta Betel». 18 Jaʼ yuʼun, jich la yal: «Akʼa jiluk tey-a. Mame ayuk machʼa ya spikbey te sbakele». Jaʼ yuʼun maba la spikbeyik te sbakel ni jaʼuk te sbakel te j-alwanej te talem ta Samaria.

19 Te Josías la sjin spisil te temploetik yuʼun te diosetik te ayik ta toyol awilaletik ta mukʼul lumetik yuʼun Samaria, jaʼ te la yakʼik ta pasel te ajwaliletik yuʼun Israel swenta la sjachbeyik yilinba te Diose, jaʼnix jich la spasbey te bitʼil la spas ta stojol te toyol awilal ta Betel. 20 La smiltiklan ta skajtajib chikʼbil majtanil spisil te sacerdoteetik yuʼun te toyol awilaletik te tey ayik-a sok la schikʼtiklan sbakel ants winiketik tey-a. Ta patil sujt bael ta Jerusalén.

21 Te ajwalil jich la yalbey ta mantal te lume: «Pasaik te Kʼin yuʼun Pascua ta stojol te Jehová te Dios awuʼunike jich te bitʼil ya yal te libro yuʼun te chapbilkʼop ini». 22 Maʼyuk jich spasojikix-a te Kʼin yuʼun Pascua jaʼto tal ta skʼajkʼalel te juecetik te kʼalal ya schajpanik-a te lum Israel ni jaʼuk ta skʼajkʼalel te ajwaliletik yuʼun Israel sok Judá. 23 Pero, te kʼalal ayix 18 jaʼbil ta ajwalil-a te Josías, la spasik te Kʼin yuʼun Pascua ini ta stojol te Jehová ta Jerusalén.

24 Te Josías la slajinbey skʼoplal te machʼatik ya spasik espiritismo, te jnaʼojeletik, te lokʼombaetik te ya yichʼik ta mukʼ te familiaetik,* lokʼombaetik te ilobtik sba sok spisil te bintik ilobtik sba te la yichʼ tael ta skʼinal Judá sok ta Jerusalén. Jich la spas swenta la skʼotes ta pasel te bin ya yal te Ley te tsʼibaybil ta libro te la sta te sacerdote Hilquías ta sna te Jehová. 25 Ta nail sok ta patil maʼyuk yan ajwalil jich bitʼil te Josías te sujt ta stojol te Jehová sok spisil yoʼtan, spisil skuxlejal sok spisil yip jich bitʼil ya yal spisil te Ley yuʼun Moisés.

26 Pero matoba kʼaxem te yilinba te Jehová ta stojol te Judá ta swenta spisil te bintik chopol* la spas te Manasés te jachbot yilinba yuʼune. 27 Te Jehová jich la yal: «Jaʼnix jich ya jlokʼes ta jtojol te Judá jich bitʼil la jlokʼes te Israel. Ya jpʼaj te Jerusalén te mukʼul lum la jtsae sok ya jpʼaj te na te jich la kal ta stojole ‹Tey ya kakʼ-a te jbiile›».

28 Te bintik la spas ta skuxlejal te Josías sok spisil te bintikxan la spas, tsʼibaybil jilel ta libro te ya scholbey skʼoplal te skuxlejal te ajwaliletik ta Judá. 29 Ta yorail-abi, te faraón Nekó —te ajwalil yuʼun Egipto— bajt sta sba sok te ajwalil yuʼun Asiria ta stsʼeel te mukʼul jaʼ Éufrates, te ajwalil Josías bajt ta yakʼbeyel guerra. Pero, te kʼalal ilot yuʼun te Nekó, milot yuʼun ta Meguidó. 30 Jich yuʼun, te j-abatetik yuʼun te Josías la yichʼbeyik bael te sbakʼetal ta carreta te jajchik tal ta Meguidó jaʼto kʼalal ta Jerusalén sok la smukik ta smukenal. Jich yuʼun, te ants winiketik yuʼun te lume la smalbeyik aceite ta sjol te Jehoacaz snichʼan Josías, tey-abi jaʼ la sjelolin jilel te Josías te state.

31 Ay 23 yaʼbilal-a te Jehoacaz te kʼalal och ta ajwalil sok wentainwan oxeb u ta Jerusalén. Hamutal sbiil te snan,* jaʼ yantsil nichʼan te Jeremías te talem ta Libná. 32 Te Jehoacaz jaʼ la spas te bintik ma lek ya yil te Jehová jich te bitʼil la spas te antiguo smeʼ stat. 33 Te faraón Nekó la yotses te Jehoacaz ta chukojibal ta Riblá ta skʼinal Hamat yuʼun jich ma swentain te Jerusalén. Ta patil la skʼanbey 100 talento* yuʼun plata te lume sok jun talento* yuʼun oro. 34 Jaʼnix jich, te faraón Nekó la yakʼ ta ajwalil te Eliaquim snichʼan Josías, jaʼ la sjelolin jilel te Josías te state, sok la sjelbey te sbiil ta Jehoiaquim. Pero la yikʼ bael te Jehoacaz ta Egipto, te tey laj-ae. 35 Te Jehoiaquim la yakʼbey te faraón te oro sok te plata te kʼanbote, jich yuʼun puersa la skʼanbey spatan te ants winiketik yuʼun te lum swenta ya yakʼ te plata te la yichʼ kʼanbeyele. La skʼanbey plata sok oro ta jujuntul te ants winiketik yuʼun te lume jaʼ chikan te jayeb spatanul te skʼinalik swenta ya yakʼbey te faraón Nekó.

36 Ay 25 yaʼbilal-a te Jehoiaquim te kʼalal och ta ajwalil sok wentainwan 11 jaʼbil ta Jerusalén. Zebidá sbiil te snan,* jaʼ yantsil nichʼan te Pedaya te talem ta Rumá. 37 Te Jehoiaquim jaʼ la spas te bintik ma lek ya yil te Jehová jich te bitʼil la spas te antiguo smeʼ stat.