2 Crónicas

30 Te Ezequías la stikun ta albeyel spisil te lum Israel sok Judá, soknix la stikun cartaetik ta stojol te stsʼumbal Efraín sok Manasés yuʼun ya xtalik ta sna te Jehová ta Jerusalén ta spasel te Kʼin yuʼun Pascua ta stojol te Jehová te Dios yuʼun Israel. 2 Pero, te ajwalil sok te machʼatik yichʼoj mukʼ yaʼtelik yuʼun soknix te machʼatik la stsob sbaik ta Jerusalén la staik ta nopel te ya spasik te Kʼin yuʼun Pascua ta schebal u, 3 melel maba juʼem yuʼunik spasel te bin kʼajkʼal ya skʼan pasel te kʼin ta skaj te maʼyuk bayal sacerdoteetik te schʼultesoj sbaik sok maba stsoboj sbaik te israeletik ta Jerusalén. 4 Lek la yaʼiy te ajwalil te bin la staik ta nopel sok te machʼatik la stsob sbaike. 5 Jich yuʼun la staik ta nopel te ya stikunik ta alel ta spamal skʼinal Israel, jajchik ta Beer-Seba jaʼto kʼalal ta Dan, yuʼun ya xtalik te ants winiketik ta Jerusalén ta spasel te Kʼin yuʼun Pascua ta stojol te Jehová te Dios yuʼun te Israel; melel maʼyuk stsoboj sbaik ta spasel te kʼin jich te bitʼil tsʼibaybil jilel skʼoplale.

6 Ta swenta smantal te ajwalil jich bajtik te winiketik ta spamal skʼinal Israel sok Judá, yichʼojik bael te cartaetik yuʼun te ajwalil sok te machʼatik yichʼoj mukʼ yaʼtelik, jich yakik ta yalel: «Ants winiketik yuʼun Israel, sujtanik ta stojol te Jehová —te Dios yuʼun Abrahán, Isaac sok te Israel— yuʼun jich te Diose ya sujt tal ta stojol te machʼatik kolik tal ta skʼab te ajwaliletik yuʼun Asiria. 7 Mame jichuk xa apasik te bitʼil te antiguo ameʼ atatik sok te awermanotakik te ma junuk yoʼtan la yakʼ sbaik ta stojol te Jehová te Dios yuʼun te antiguo smeʼ statik, te jich la yichʼik lajinel yuʼun, jich te bitʼil ya ataik ta ilel ta ora ini. 8 Mame kʼax tulanuk xa awakʼ te awoʼtanik jich bitʼil la spas te antiguo ameʼ atatik. Akʼa abaik ta stojol te Jehová sok laʼik ta chʼul awilal yuʼun te sbajtelkʼinal schʼultesoj, sok abatinanik ta stojol te Jehová te Dios awuʼunik yuʼun jich ya xlamaj te yilinba ta atojolik. 9 Melel te kʼalal ya sujtex tal ta stojol te Jehová, te awermanotakik sok te awal anichʼnabik te yichʼojik chukel baele, yame yichʼik naʼbeyel yoʼbolil sbaik yuʼun te machʼatik chukotik bael sok yame x-akʼotik sujtel tal yuʼun, melel te Jehová te Dios awuʼunike ay yutsil yoʼtan sok ya snaʼ yoʼbolil jbatik, sok maba ya swalakʼpatiyex* teme ya sujtex tal ta stojole».

10 Jich yuʼun, te winiketik bajtik ta mukʼul lumetik te ayik ta skʼinal Efraín sok Manasés, sok kʼotik kʼalalto ta skʼinal Zabulón, pero tseʼlayotik sok labanotik yuʼun te ants winiketik tey-ae. 11 Pero ay chaʼoxtul ants winiketik ta skʼinal Aser, Manasés sok ta Zabulón te la spejkʼan sbaik sok talik ta Jerusalén. 12 Ta swenta te bendición yuʼun te smelelil Dios la yakʼ te jun-nax ayinik* te yajwalul Judá te jich la skʼotesik ta pasel te bin la yal ta mantal te ajwalil sok te machʼatik yichʼoj mukʼ yaʼtelik, jich bitʼil yaloj ta mantal te Jehová.

13 Ta schebal u, kʼax bayal ants winiketik la stsob sbaik ta Jerusalén yuʼun ya spasik te Kʼin yuʼun pan te maba yichʼoj levadura. Kʼax bayal ta tul la stsob sbaik. 14 Jajch slokʼesik te skajtajib chikʼbil majtaniletik yuʼun te lotil diosetik te ayik ta Jerusalén sok spisil te skajtajib schikʼojibal pom, bajt schʼojik jilel ta spamlej yuʼun Cedrón. 15 Jich yuʼun, ta skʼajkʼalel 14 yuʼun te schebal u la smilik te chambalametik yuʼun te milbil majtanil yuʼun te Kʼin Pascua. Te sacerdoteetik sok te levitaetik bayal kʼexawik, jich yuʼun la schʼultes sbaik sok la yichʼik tal chikʼbil majtaniletik ta sna te Jehová. 16 Bajt ta slugarik jich te bitʼil ya yal te Ley yuʼun Moisés, te winik yuʼun te smelelil Dios; te sacerdoteetik jaʼ ya stsijtsinik te schʼichʼel te chambalam te ya xkʼasesbotik tal yuʼun te levitaetike. 17 Te ants winiketik te stsoboj sbaik bayal machʼatik maba schʼultesoj sbaik, jich yuʼun te levitaetik jaʼ ochik ta smilel te chambalametik yuʼun te milbil majtanil yuʼun te Kʼin Pascua ta stojol te machʼatik maba schʼultesoj sbaik, swenta chʼultesbil ya xkʼotik ta stojol te Jehová. 18 Melel bayal te yajwalul te lum —kʼaxtoxan-a te machʼatik talemik ta skʼinal Efraín, Manasés, Isacar sok ta Zabulón— te maba schʼultesoj sbaik, manchukme jich-abi, la sweʼik te milbil majtanil yuʼun te Kʼin Pascua te jich la skʼaxuntayik te bin tsʼibaybile. Pero, te Ezequías la skʼopon Dios ta stojolik sok jich la yal: «Te Jehová, te kʼax lek yoʼtan, akʼa spasbey perdón 19 spisil te machʼatik la schajpan yoʼtanik ta sleel te Jehová te smelelil Dios, te Dios yuʼun te antiguo smeʼ statik, manchukme maba chʼultesbilik jich te bitʼil ya yal te mantalile». 20 Te Jehová la yaʼiybey skʼop te Ezequías, jich yuʼun la spasbey perdón te israeletike.

21 Te israeletik te ayik ta Jerusalén jukeb kʼajkʼal la spasik te Kʼin yuʼun pan te maba yichʼoj levadura sok stseʼelil yoʼtanik. Te levitaetik sok te sacerdoteetik la yalbeyik yutsil skʼoplal te Jehová ta jujun kʼajkʼal, tulan yakik ta stijel te aʼtejibaletik yuʼun música ta stojol te Jehová. 22 Jaʼnix jich kʼopoj te Ezequías sok la yakʼbey smukʼul yoʼtan spisil te levitaetik te yakik ta abatinel ta stojol te Jehová sok spʼijil yoʼtanik. Weʼ uchʼajik te jukeb kʼajkʼal la spasik te kʼine, yakik ta yakʼel milbil majtaniletik ta swenta lamalkʼinal sok yakik ta yalbeyel wokol te Jehová te Dios yuʼun te antiguo smeʼ statike.

23 Te ants winiketik te la stsob sbaik, la staik ta nopel te ya spasikxan jukeb kʼajkʼal te kʼine, jich yuʼun jukebxan kʼajkʼal la spasik te kʼin sok stseʼelil yoʼtanik. 24 Te Ezequías te ajwalil yuʼun Judá la yakʼ jmil ta kojt toroetik sok 7 mil ta kojt tuminchijetik ta stojol te machʼatik la stsob sbaike, jaʼnix jich te machʼatik yichʼoj mukʼ yaʼtelik la yakʼik jmil ta kojt toroetik sok 10 mil ta kojt tuminchijetik; jaʼnix jich bayal ta tul sacerdoteetik yakik ta schʼultesel sbaik. 25 Spisil te machʼatik la stsob sbaik ta Judá, te sacerdoteetik, te levitaetik, spisil te machʼatik talemik ta Israel, te jyanlumetik te nainemik ta skʼinal Israel sok te machʼatik nainemik ta Judá tseʼelnax yoʼtanik. 26 Jich yuʼun te tseʼel oʼtanil nain ta Jerusalén, melel jaʼto tal ta skʼajkʼalel te Salomón snichʼan David, te ajwalil yuʼun Israel, maʼyuk jich kʼoem ta pasel ta Jerusalén. 27 Ta patil, te sacerdoteetik sok te levitaetik la stejkʼan sbaik sok la yakʼbeyik bendición te lume; aʼiybotik skʼop yuʼun te Diose, te bin la skʼanik ta skʼoponel Dios kʼot kʼalal ta chʼulchan, jaʼ te chʼul awilal te banti nainem te Diose.