Deuteronomio

12 »Jaʼik ini te mantaliletik sok te bintik schapoj te Dios te ya skʼan ya akʼotesik ta pasel ta lek te jayeb kʼajkʼal kuxulex ta kʼinal te ya yakʼbeyex awuʼuninik te Jehová, te Dios yuʼun te antiguo ameʼ atatik. 2 Te nacionetik te ya awuʼuntaybeyik te skʼinalik, yame skʼan ya alajinbeyik ta jkʼaxel spisil te lugaretik te banti ya yichʼik ta mukʼ te diosetik yuʼunik, chikan teme ayik ta toyol witsetik, chʼin witsetik o ta yeʼtal teʼetik te bayal yabinal. 3 Yame skʼan ya ajinbeyik te skajtajib chikʼbil majtaniletik yuʼunik, lajinbeyaik te balal tonetik te ya yichʼik ta mukʼ, chikʼaik ta kʼajkʼ te chʼul teʼetik yuʼun Aserá sok lajinaik te slokʼomba te diosetik yuʼunik te spasojike, jich ya yichʼik tupʼbeyel sbiilik ta lugar-abi.

4 »Mame jichuk xa awichʼik ta mukʼ te Jehová te Dios awuʼunik jich te bitʼil ya yichʼik ta mukʼ te diosetik yuʼunik. 5 Te bin ya skʼan ya apasike, jaʼ te ya xbaex ta lugar te banti ya stsa te Jehová te Dios awuʼunik yuʼun tey ya yichʼ ichʼel ta mukʼ te sbiil sok jaʼ te lugar te banti ya xnain ta yolil spisil te atsʼumbalik. 6 Yame skʼan ya awichʼik bael tey-a te chikʼbil majtaniletik, milbil majtaniletik, diezmo, te majtaniletik ya awakʼik, majtaniletik te ya awakʼik ta swenta skʼotesel ta pasel te bin jamal awalojik, majtaniletik te spasemal awoʼtan ya awakʼik sok te sba yalatak te wakaxetik, tuminchijetik sok tentsunetik awuʼunik. 7 Te jaʼex sok te jayeb machʼatik ay awuʼunik yame xweʼex tey-a ta stojol te Jehová te Dios awuʼunik sok tseʼelnaxme awoʼtanik yuʼun spisil te bintik apasojike, melel te Jehová te Dios awuʼunik yakʼojbeyex bendición.

8 »Mame xa apasik te bin yakotik ta spasel ta ora ini, te jujuntul ya spas te bin ya skʼan yoʼtane, 9 melel mato ochemex ta lugar te banti ya akux awoʼtanik sok mato awuʼuninojik te kʼinal te ya yakʼbeyex te Jehová te Dios awuʼunike. 10 Te kʼalal ya xkʼaxex bael ta mukʼul jaʼ Jordán sok te yakexix ta nainel ta kʼinal te ya yakʼbeyex awuʼuninik te Jehová te Dios awuʼunik, yame yakʼbeyex te ya akux awoʼtanik ta swenta spisil te akontratakik te ya sjoytayex, jich jun-naxme awoʼtanik ya xnainex. 11 Spisil te bin yak kalbelex yame skʼan ya awichʼik bael ta lugar te ya stsa te Jehová te Dios awuʼunik yuʼun tey ya yichʼ ichʼel ta mukʼ te sbiile: chikʼbil majtaniletik, milbil majtaniletik, diezmo, te majtaniletik ya awakʼik sok spisil te majtaniletik te ya awakʼik ta swenta skʼotesel ta pasel te bin jamal awalojbeyik te Jehová. 12 Tseʼelnaxme awoʼtanik ya xbajt awaʼiyik ta stojol te Jehová te Dios awuʼunik, jaʼex sok te akerem nichʼnabik, awantsil nichʼnabik, amosoik, acriadaik sok te levitaetik te yakik ta nainel ta awolilik, melel maba la yichʼik akʼbeyel skʼinalik jich te bin-utʼil te jaʼexe. 13 Tsajtayame abaik* yuʼun maba ya awichʼik bael ta yantik lugar te chikʼbil majtaniletik awuʼunik. 14 Yame skʼan ya awichʼik bael te chikʼbil majtaniletik awuʼunik jaʼnax ta lugar te banti ya stsa te Jehová ta kʼinal yuʼun te jchajp atsʼumbalik sok teyme ya skʼan ya apasik spisil te bin yakon ta yalbelex ta mantal.

15 »Biluk-ora te ya skʼan awoʼtanik te ya aweʼik tiʼbal ya xjuʼ ya amilik jkojt chambalam, jaʼ chikan te bendición yakʼojbeyex te Jehová te Dios awuʼunik ta yolil spisil te mukʼul lumetik awuʼunik. Ya xjuʼ ya sweʼ tiʼbal te machʼatik boloben skʼoplalik sok te machʼatik lek skʼoplalik, jich te bitʼil ya yichʼ weʼbeyel stiʼbalul jkojt gacela-chij o jkojt ciervo-chij. 16 Pero mame xa aweʼik te chʼichʼe; yame skʼan ya amalik ta lum jich te bin-utʼil jaʼ. 17 Ma xjuʼ ya aweʼik ta yutil te mukʼul lumetik awuʼunik te jun ta slajunebal sit awal tsʼunubiletik awuʼunik ni jaʼuk te yachʼil vino ni jaʼuk te aceite awuʼunik, ni jaʼuk te sba yalatak te wakaxetik, tuminchijetik o tentsunetik awuʼunik, ni jaʼuk te majtaniletik ya awakʼik ta swenta skʼotesel ta pasel te bin jamal awalojik ni jaʼuk te majtaniletik te spasemal awoʼtan ya awakʼik ni jaʼuk te majtaniletik ya awakʼik. 18 Yame aweʼik ini ta stojol te Jehová te Dios awuʼunik ta lugar te ya stsa te Jehová te Dios awuʼunik, jaʼex sok te akerem nichʼnabik, awantsil nichʼnabik, amosoik, acriadaik sok te levitaetik te yakik ta nainel ta awolilik, sok tseʼelnaxme awoʼtanik ya xbajt awaʼiyik ta stojol te Jehová te Dios awuʼunik yuʼun spisil te bintik apasojike. 19 Tsajtayame abaik* yuʼun maba ya apijtesik te levitaetik te jayeb kʼajkʼal kuxulik ta akʼinalik.

20 »Kʼalal te Jehová ya smukʼubtesbeyex te akʼinalik jich te bitʼil yalojbeyex ta jamal sok te jich ya awalik ‹Ya jkʼan ya jweʼ tiʼbal› ta skaj te ya akʼan ya aweʼe, ya xjuʼ ya aweʼ tiʼbal chikan bin-ora ya skʼan te awoʼtanike. 21 Teme namal* ay te lugar la stsa te Jehová te Dios awuʼunik te banti ya yichʼ ichʼel ta mukʼ te sbiile, ya xjuʼ ya amilik jkojt wakax, tuminchij o tentsun te yakʼojbeyex te Jehová jich te bitʼil la kalbeyex ta mantal, ya xjuʼ ya aweʼik ta yutil te mukʼul lumetik awuʼunik chikan te bin-ora ya akʼanike. 22 Ya xjuʼ ya aweʼik jich te bitʼil ya yichʼ weʼbeyel stiʼbalul jkojt gacela-chij o jkojt ciervo-chij. Ya xjuʼ ya sweʼ tiʼbal te machʼatik boloben skʼoplalik sok te machʼatik lek skʼoplalik. 23 Ayuk ta awoʼtanik te mananixme ya aweʼik-a te chʼichʼe, melel jaʼ kuxlejal te chʼichʼe, jaʼ yuʼun ma xjuʼ ya aweʼik te tiʼbal teme ay schʼichʼel.* 24 Mame xa aweʼik. Yame skʼan ya amalik ta lum jich te bin-utʼil jaʼ. 25 Mame xa aweʼik yuʼun lek ya xkʼoex ta lokʼel sok te awal anichʼnabik, melel lek te bin yakex ta spasel ta sit te Jehová. 26 Te kʼalal ya xbaex ta lugar te tsabil yuʼun te Jehová, jaʼnax ichʼaik bael te bintik awuʼunik te chʼultesbilik sok te majtaniletik te ya awakʼik ta swenta skʼotesel ta pasel bin jamal awalojik. 27 Tey ya awakʼik te chikʼbil majtaniletik awuʼunik, te stiʼbalul sok te schʼichʼel ta skajtajib chikʼbil majtanil yuʼun te Jehová te Dios awuʼunik, te schʼichʼel te milbil majtaniletik awuʼunik yame skʼan ya yichʼ malel ta skajtajib chikʼbil majtanil yuʼun te Jehová te Dios awuʼunik, yan stukel te stiʼbalul ya xjuʼ ya aweʼik.

28 »Pasaikme tulan yuʼun ya achʼuunik spasel te bin yak kalbelex ta mantal yuʼun spisil-ora lek ya xkʼoex ta lokʼel sok te awal anichʼnabike, melel lek sok stojil te bin yakex ta spasel ta sit te Jehová te Dios awuʼunike.

29 »Kʼalal te Jehová te Dios awuʼunik ya slajin te nacionetik te ya xbajt awochintayik sok te kʼalal yakexix ta nainel ta skʼinalik, 30 tsajtayame abaik* yuʼun ma xyalex ta jun pejtsʼ te kʼalal yichʼojikix lajinel ta atojolik. Mame jichuk ya awal ta stojol te diosetik yuʼunik: ‹¿Binwan-utʼil ya yichʼik ta mukʼ te diosetik yuʼunik te nacionetik-abi?› Jichnixme ya jkʼayintik spasel-euk. 31 Mame jichuk xa apasbeyik te Jehová te Dios awuʼunik, melel spisil te bintik ilobtik sba te ya spasik ta stojol te diosetik yuʼunik ya yilay te Jehová. Jaʼnix jich ya schikʼik ta kʼajkʼ te skerem nichʼnabik sok te yantsil nichʼnabik ta stojol te diosetik yuʼunik. 32 Pasaikme tulan yuʼun ya achʼuunik spasel spisil te bin yak kalbelex ta mantal. Mame xa awakʼbeyik sjoy sok mame skʼan ya alokʼesbeyik jpʼaluk.