Proverbios
3 Jnichʼan, mame xchʼay ta awoʼtan te nojptesel* kuʼun,
sok ayukme ta awoʼtan schʼuunel te mantaliletik kuʼun,
2 melel jichme bayal jaʼbil ya xkuxinat,
sok ayme lamalkʼinal awuʼun.
3 Mame xa awakʼ yijkitayat te jun-oʼtanil sok te kʼuxul oʼtanil te ma x-ijkitaywan.
Chukame ta anukʼ
sok tsʼibaya ta awoʼtan;
4 jichme lek akʼoplal ta stojol Dios sok ta stojol te ants winiketik
sok yame awichʼ naʼbeyel aba te bitʼil bayal spʼijil awoʼtan.
5 Akʼa smukʼulin awoʼtan te Jehová sok spisil awoʼtan,
mame jaʼuk xa awichʼ ta mukʼ te spʼijil awoʼtan.
6 Ta spisil te beetik awuʼun ichʼame ta wenta,
jichme ya stojobtesbat te beetik awuʼun.
7 Mame pʼijuk xa akuy aba;
jaʼme xa axiʼ te Jehová sok mame xa apas te bin chopol.*
8 Jaʼme spoxil ya xkʼot ta abakʼetal
sok jaʼme ya yakʼbey yichʼ yip te abakel.
9 Ichʼa ta mukʼ te Jehová sok te bintik lek ay awuʼun
soknix spisil te sba sit awal tsʼunubil awuʼun;
10 jichme ya xnoj ta lek te yawil sit awal tsʼunubil awuʼun
sok yame xnoj ta lek te banti ya akʼej te yachʼil vino awuʼun.
11 Jnichʼan, mame xa apʼaj te tojobtesel yuʼun te Jehová
sok mame x-ilinat te kʼalal ya stsitsat,*
12 melel te Jehová ya stsits* te machʼatik kʼux ta yoʼtan,
jich te bin-utʼil ya spas jtul tatil te ya stsits te snichʼan te kʼux ta yoʼtane.
13 Tseʼelnaxme yoʼtan te machʼa ya sta spʼijil yoʼtan
sok te machʼa ya sta te bintik ay ta naʼel stsajtayel;*
14 jaʼ lekxan te stael te pʼijil oʼtanil, ma jaʼuk te stael te plata
jaʼ lekxan te ayuk kuʼuntik te pʼijil oʼtanil, ma jaʼuk te ayuk kuʼuntik te oro.
15 Te pʼijil oʼtanil jaʼ kʼax bayalxan stojol-a te bitʼil te tʼujbil tonetik yuʼun mar;*
jkʼaxel ma spaj te bintik ya skʼan te koʼtantik.
16 Ta swaʼel skʼab te pʼijil oʼtanil ay jal kuxlejalil;
ta skʼexam skʼab* ay kʼulejalil sok utsilal.
17 Kʼax mulantik sba ta tʼunel te beetik yuʼun
sok nojel ta lamalkʼinal spisil te beetik yuʼun.
18 Te pʼijil oʼtanil jaʼme jpejt* teʼ yuʼun kuxlejalil ya xkʼot ta stojol te machʼatik ya stsak sbaik tey-ae,
tseʼelme yoʼtanik te machʼatik tulan stsakojik.
19 Te Jehová sok spʼijil yoʼtan la yakʼbey yiptajib te balumilal.
Ta swenta spʼijil yoʼtan* la yakʼbey yichʼ yip te chʼulchan.
20 Ta swenta te bin snaʼoj la xat-tiklan te skʼubulil te jaʼetik,
te tokal ta chʼulchan ya yakʼ kouk tal tsʼujul.
21 Jnichʼan, mame xchʼay ta awoʼtan spisil-abi.*
Kanantaya te pʼijil oʼtanil sok te bitʼil ya anaʼ stuuntesel te snopojibal awuʼun,
22 melel yame yakʼbat akuxlejal
sok jaʼme tʼujbil ualil ta anukʼ.
23 Jichme jun awoʼtan ya xbeenat ta beetik awuʼun
sok mame ayuk bin ya akʼojchin awok yuʼun.
24 Te kʼalal ya xwayat, mame ayuk bin ya axiʼ;
junme awoʼtan ya amejtsʼan aba sok junme awoʼtan ya x-och awayel.
25 Maba yakat ta xiʼel te wokolil te ya xjuʼ ya xtal ta atojol ta oranax
ni jaʼuk te wokolil* te ya xtal ta stojol te machʼatik chopolik.*
26 Melel jaʼ smukʼul awoʼtan te Jehová;
maba ya yakʼ te ya xyal ta pejtsʼ te awoke.
27 Mame xa akom aba ta spasel te bin lek ta stojol te machʼatik ya skʼanik koltayel
teme ya xjuʼ awuʼun* skoltayele.
28 Mame jichuk xa awalbey te apatxujk «¡Baan! ¡Pajelto ya xtalat! Pajelto ya kakʼbat»
teme ay awuʼun te bin ya skʼanbate.
29 Mame ayuk bin xa achapbey skʼoplal yuʼun ya awakʼbey swokol te apatxujk
te bitʼil jun yoʼtan yak ta nainel ta stsʼeel ana.
30 Mame jichuknax ya atsak aba ta kʼop sok te machʼa
maʼyuk bin chopol* spasojbate.
31 Mame xa abikʼtal oʼtantay te machʼa ya x-utsʼinwan,*
mame xa atʼun ni junuk te beetik yuʼun,
32 melel te Jehová ya yilay te machʼatik kʼax ma lek stalelik,
pero mero yamigoinoj sba sok te machʼatik toj yoʼtanik.
33 Te Jehová ya schopolkʼoptaybey sna te machʼa chopol,*
pero ya yakʼbey bendición te machʼatik toj yoʼtanik.
34 Melel te Dios ya slaban te jlabanwanejetik,
pero ya skʼuxultay te machʼatik manso yoʼtanik.
35 Te machʼatik pʼij yoʼtanik jaʼme yuʼunik ya xkʼot te ichʼel ta mukʼ,
pero te machʼatik maʼyuk spʼijil yoʼtanik maʼyuk skʼoplal ta yoʼtanik te ichʼel ta mukʼ.