Deuteronomio

8 »Yame skʼan te ya akʼotesik ta pasel ta lek te jujun mantaliletik te yak kalbelex ta ora ini, yuʼun ya xkuxinex, ya xpʼolex sok ya x-ochex ta kʼinal te jamal la yalbey Jehová te antiguo ameʼ atatik te ya yichʼik akʼbeyel yuʼun sok te ya awochintayike. 2 Julukme ta awoʼtanik te 40 jaʼbil la yikʼex ta beel te Jehová te Dios awuʼunik ta jochol takin kʼinal swenta ya spejkʼanbeyex akʼoplalik, ya spasex ta prueba yuʼun jich ya snaʼ te bin-nix ay ta awoʼtanik-a sok teme ya achʼuunik spasel te mantaliletik yuʼune. 3 Jich yuʼun la spejkʼanbeyex akʼoplalik, la yakʼ te ya xkʼax awiʼnalik sok la smakʼlinex ta maná te maba anaʼojbeyik sba te jaʼex sok te ameʼ atatik, yuʼun jich ya anaʼik te ma jaʼuknax ta pan ya xkuxin te winik, jaʼ ya xkuxin ta swenta schʼuunbeyel skʼop te Jehovae. 4 Te 40 jaʼbil-abi maba laj te akʼuʼ apakʼike sok maba sijtʼ te awokike. 5 Anaʼojik ta lek te yak stojobtesbelex te Jehová te Dios awuʼunik, jich te bin-utʼil jtul tatil ya stojobtes te snichʼane.

6 »Jich yuʼun chʼuunaik spasel te mantaliletik yuʼun te Jehová te Dios awuʼunik te kʼalal ya xbeenex ta beetik yuʼun sok te kʼalal ya axiʼike. 7 Melel te Jehová te Dios awuʼunik yak yikʼbelex bael ta lekil kʼinal te banti ya x-okin* jaʼetik, mukʼul jaʼetik sok slokʼib jaʼetik te ya x-okin ta spamlej kʼinal sok ta witstikil, 8 kʼinal te banti ya yakʼ trigo sok cebada, tsʼusubiltik, higueraetik sok granadaetik,* te banti ya yakʼ aceite yuʼun oliva sok chab, 9 kʼinal te banti ma jtebnax weʼelil ay tey-a sok maʼyuk bin ya spasbeyex falta tey-a, te banti ya yichʼ tael hierro ta tonetik sok te banti ya alokʼesik cobre ta witstikil.

10 »Te kʼalal weʼemexix sok te nojemix ta lek te achʼujtik, yame skʼan ya awalbeyik yutsil skʼoplal te Jehová te Dios awuʼunik yuʼun te lekil kʼinal te la yakʼbeyexe. 11 Tsajtayame abaik* te manchuk ya xchʼay ta awoʼtanik te Jehová te Dios awuʼunik te kʼalal maba ya achʼuunikix spasel te mantaliletik yuʼun, te bintik schapoj sok te bintik yaloj te yak kalbelex ta ora ini. 12 Te kʼalal ya xweʼex sok nojemix ta lek te achʼujtik sok te ya apasik tʼujbil naetik yuʼun ya xnainex tey-ae, 13 te kʼalal ya xpʼol te awakaxik, atuminchijik, atentsunik, sok te ya xpʼol te plata, te oro awuʼunik soknix spisil te bintik ay awuʼunik, 14 mame xa atoy abaik te ya yakʼ xchʼay ta awoʼtanik te Jehová te Dios awuʼunik te la slokʼesex tal ta skʼinal Egipto te banti mosoinbilex-ae, 15 te la yakʼ te beenukex ta mukʼul jochol takin kʼinal te xiweltik sba, te banti ay jtiʼawal chanetik sok tseketik,* te banti takijem te lumkʼinal te maʼyuk jaʼ tey-a. Jaʼ la yakʼ te lokʼuk jaʼ ta tulan ton 16 sok la smakʼlinex ta maná ta jochol takin kʼinal, jaʼ te bin maba snaʼojbeyik sba te ameʼ atatik, swenta ya spejkʼanbeyex akʼoplalik sok ya spasex ta prueba yuʼun lek ya xkʼoex ta lokʼel. 17 Teme jich ya awal ta awoʼtanik ‹Ay jkʼulejaltik ta swenta kiptik sok yip jkʼabtik›, 18 julukme ta awoʼtanik te jaʼ Jehová te Dios awuʼunik te ya yakʼbeyex te awipik yuʼun ya ata akʼulejalik, swenta ya skʼotes ta pasel te bin jamal la schapbey skʼoplal sok te antiguo ameʼ atatik jich te bitʼil ya awilik ta ora ini.

19 »Teme ay bin-ora ya xchʼay ta awoʼtanik te Jehová te Dios awuʼunik, te ya xjajch atʼunik yantik diosetik, te ya awichʼik ta mukʼ sok te ya akejan abaik ta stojolik, jamal ya kalbeyex ta ora ini te yananixme xlajex yuʼun. 20 Jichme ya xlajex te bitʼil te nacionetik te yak slajinbel te Jehová ta atojolik, melel maba la awaʼiybeyik te skʼop te Jehová te Dios awuʼunike.