Carta ta stojol te Romanoetik

1 Joʼon Pabloon, yabaton te Cristo Jesús sok la yikʼon yuʼun ya x-ochon ta jpuk-kʼop, tsabilon ta swenta yalel te lek yachʼil kʼop yuʼun te Diose, 2 te jaʼnix jamal yaloj jilel ta chʼul Jun ta swenta te j-alwanejetik yuʼune 3 sok te la yalbeyik skʼoplal ta swenta te sNichʼane, jaʼ te tal ta stsʼumbal David jich bitʼil chʼichʼbakʼet, 4 pero ta swenta yuʼel te chʼul espíritu* la yichʼ chaʼkuxajtesel, jich chiknaj te jaʼ sNichʼan te Diose (jaʼ te Kajwaltik Jesucristo, 5 te jaʼ ta swenta te la kichʼ* akʼbeyel te slekil yoʼtan Dios te ma snujpʼuk ya kichʼtike sok te la yakʼbon kaʼtel ta jpuk-kʼop, yuʼun jich te ants winiketik ta spisil nacionetik ya schʼuunik mantal ta swenta te schʼuunel yoʼtanik yuʼun jich ya yichʼ albeyel yutsil skʼoplal te sbiile, 6 ta nacionetik-abi la awichʼik ikʼel-euk swenta jaʼ yuʼunex te Jesucristo ya xkʼoex). 7 Jaʼ la jtsʼibay ta atojolik te carta ini, jaʼex te ayex ta Roma, te kʼuxex ta yoʼtan te Dios sok te ikʼbilex yuʼun chʼultesbil ya xkʼoex:

Ayukme ta atojolik te slekil yoʼtan Dios te ma snujpʼuk ya kichʼtik sok te lamalkʼinal te talem ta stojol te jTatik Dios sok te Kajwaltik Jesucristo.

8 Te bin nail ya jkʼan ya kalbeyex jaʼ te ya kalbey wokol te Dios kuʼun ta apisilik ta swenta te Jesucristo, melel ta swolol balumilal pujkemix ta alel te schʼuunel awoʼtanike. 9 Te Dios, te sok spisil koʼtan ya x-abatinon ta stojol ta yalel te lek yachʼil kʼop ta swenta te sNichʼane, jaʼ testigo kuʼun te spisil-ora ya jkʼopon Dios ta atojolik, 10 sok ya jkʼanbey wokol, teme ya xjuʼe sok teme jaʼ skʼanojel yoʼtan te Diose, te yakuk xjuʼ kuʼun te ya xtal kulaʼtayexe. 11 Koʼtanukix te ya kilex yuʼun ya kakʼbeyex te bendición* yuʼun te Dios swenta jich ya yakʼbeyex yip awoʼtanik, 12 te bin ya jkʼan ya kale jaʼ te talel kʼaxel ya kakʼbey jba smukʼul koʼtantik ta swenta te schʼuunel awoʼtanik soknix te schʼuunel koʼtan-euke.

13 Pero ya jkʼan te ya anaʼik stojol, kermanotak, te bayal buelta kʼan tal kilex yuʼun ya kil teme ay bin lek lokʼ-a te bitʼil la jchol skʼop Dios ta awolilik, jichnix te bin-utʼil la jchol skʼop Dios ta stojol te jyanlumetik, pero ay bin smakojon tal kʼalalto ta ora ini. 14 Ay jbet ta stojol te griegoetik sok te machʼatik maba griegoetik, ta stojol te machʼatik ay spʼijil yoʼtanik sok ta stojol te machʼatik maʼyuk spʼijil yoʼtanik. 15 Jaʼ yuʼun koʼtanuk ya kalbeyex awaʼiyik-euk te lek yachʼil kʼop jaʼex te ayex ta Roma. 16 Melel ma xkʼexawon yuʼun te lek yachʼil kʼope. Ta melel, jaʼ yuʼel Dios yuʼun ya xkolik te machʼatik ya schʼuunik, jaʼ nail te judioetik, jaʼnix jich te griegoetik. 17 Ta swenta te lek yachʼil kʼop ya xchiknaj ta ilel te stojil yoʼtan te Dios ta swenta te schʼuunel koʼtantik, jich ya stsakxan yip te schʼuunel koʼtantik, jich bin-utʼil tsʼibaybil: «Pero, te machʼa toj yoʼtan ya xkuxin ta swenta te schʼuunel yoʼtan», te xchie.

18 Jich, kʼalalto ta chʼulchan ya xchiknaj te yilinba Dios ta stojol spisil te machʼatik ma xyichʼik ta mukʼ te Dios sok te bintik chopol* ya spasik te jaʼ smakojik swenta maba ya stsak yip te smelelil kʼope. 19 Melel te bin ay ta naʼel ta swenta te Dios jamal ay ta sitik, jaʼnix te Dios te jamal yakʼoj ta naʼel. 20 Melel te taleliletik yuʼun te ma xchiknaj ta ilel —te yuʼel te sbajtelkʼinal aye sok te stalel Dios stukel— jamal chikan ta ilel k’alalto ta sjajchibal te balumilal ta swenta te bintik spasoje, jich maʼyuk bin ya xjuʼ ya smak sbaik ta kʼop yuʼun-a. 21 Manchukme snaʼojbeyik sba-a te Diose, maba la yalbeyik yutsil skʼoplal jich bitʼil te jaʼ Dios sok maba la yalbeyik wokol; jkʼaxel bolob te snopojibal yuʼunik sok ijkʼub te yoʼtanik ta skaj te ma la snaʼik kʼinale. 22 Ay spʼijil yoʼtanik ta skʼopik, pero ma snaʼik kʼinal. 23 Te yutsilal te Dios te ma xlaj stukel la sjelik ta slokʼomba ants winik te ya xlaj stukele sok ta slokʼomba mutetik, chambalametik te chaneb yokik sok te bintik staslajan ya xbeenik ta lum.

24 Ta swenta te jaʼ bajt ta yoʼtanik spasel te bin ya smulan yoʼtanike, akʼotik yuʼun Dios yuʼun jich ya spasik te bintik ilobtik sba, jich la sbolobtesik te sbakʼetalike. 25 La sjelik ta lotil te bin smelelil ta swenta te Diose, jaʼ la yichʼik ta mukʼ sok la yakʼ sbaik ta abatinel ta stojol te bintik pastiklanbil, ma jaʼuk ta stojol te Jpaswanej te ya yichʼ albeyel yutsil skʼoplal stukel ta sbajtelkʼinale. Jichuk. 26 Jaʼ yuʼun akʼotik yuʼun Dios ta spasel te bintik kʼexlaltik sba ta sbakʼetalik, melel te antsetik la sjeltayik te bin-utʼil stalel ya sjokin sba ta wayel jtul ants sok jtul winik, jaʼ la spasik te bin ma jichuk la yichʼik pasel yuʼune. 27 Jaʼnix jich, te winiketik la sjeltayik te bin-utʼil stalel ya sjokin sba ta wayel jtul ants sok jtul winik, talel kʼaxel la smulan sbaik, ilobtik sba te bin la spasbey sbaik te pajal winiketik. Jich tsʼakal la yichʼik castigo ta swenta te bin chopol* la spasike.

28 Ta skaj te ma la skʼan la snaʼbeyik sba te Diose, jich akʼotik yuʼun Dios te ya xbolob te snopojibal yuʼunik swenta ya spasik te bin ma jichuk ya skʼan pasele. 29 Nojel ta yoʼtanik spisil ta chajp te bintik ma stojiluk ta pasel, spisil ta chajp mulil, bikʼtal oʼtanil sok te bin chopol;* baem ta yoʼtanik sbikʼtal oʼtantayel te bintik ay yuʼun te yantik, baem ta yoʼtanik milaw, jach kʼop, loʼlaywanej sok ya smulanik yakʼbeyel swokol te yantike; ya smulanik spukbeyel skʼoplal te bin ya xkʼax ta skuxlejal te yantike 30 sok ya xleawanik ta kʼop; ya spʼajik te Diose; ma x-ichʼawanik ta mukʼ, mukʼ skʼoplal ya skuy sbaik sok ya stoy sbaik; ya schajpan ta yoʼtanik te bin chopol* ya spasik, ya skʼaxuntaybeyik smantal te smeʼ statik, 31 ma snaʼik kʼinal, ma skʼotesik ta pasel te bin ya yalik, jkʼaxel maʼyuk skʼuxul yoʼtanik sok maʼyuk machʼa ya snaʼbeyik yoʼbolil sba. 32 Manchukme snaʼojik ta lek te tojil mantaliletik yuʼun te Diose, te machʼatik jich ya spasike snujpʼ te ya x-akʼotik ta lajel yuʼune, ma jaʼuknax te ma skom sbaik ta spasel te muliletik-abi, jaʼnix jich lek ya yilik te machʼatik jich ya spasik-euke.