2 Crónicas

32 Te kʼalal la spas spisil-abi sok te la yakʼ ta ilel te jun yoʼtan ta stojol Dios te Ezequías, te Senaquerib te ajwalil yuʼun Asiria tal yochintay te Judá. La sjoytay te mukʼul lumetik te joytaybilik ta tsʼajkʼetik te yichʼoj lek yip, melel yakʼoj ta yoʼtan te ya stʼom ochel swenta ya yuʼunin.

2 Te kʼalal la yil te Ezequías te tal te Senaquerib sok te ya skʼan ya yakʼbey guerra te Jerusalén, 3 kʼopoj sok te machʼatik yichʼoj mukʼ yaʼtelik yuʼun sok te swiniktak yuʼun guerra, tey-abi la sta ta nopel te ya sbutʼ te slokʼib jaʼetik te ay ta spatpat te mukʼul lum, sok lek la yaʼiyik-euk te bin la sta ta nopel te ajwalil. 4 La stsobik tal bayal ta tul ants winiketik sok jajch smakik spisil te slokʼib jaʼetik sok la smakbeyik sbe te mukʼul jaʼetik te ya xkʼax ta skʼinalik, melel jich la yalik: «¿Bin yuʼun ya kakʼtik te ya xjul staik bayal jaʼ yuchʼik te ajwaliletik yuʼun Asiria?».

5 Jaʼnix jich la yakʼ ta yoʼtan schaʼpasel spisil te tsʼajkʼetik te jineme sok la spas toyol tsʼajkʼetik tey-a. Sok la spas yan tsʼajkʼ ta spat. Jaʼnix jich la schaʼpas te chʼin wits* te ay ta Mukʼul lum yuʼun David soknix la spas kʼax bayal aʼtejibaletik yuʼun guerra* sok majkilaletik. 6 Soknix la yakʼ capitanetik yuʼun soldadoetik ta stojol te lume, la stsob ta plaza yuʼun te yochibal te mukʼul lum sok jich la yakʼtiklanbey smukʼul yoʼtan: 7 «Ayukme yip awoʼtanik sok mame xchebaj awoʼtanik. Mame xnijk awoʼtanik sok mame xiwex ta stojol te ajwalil yuʼun Asiria sok spisil te machʼatik jokinbil yuʼun te kʼax tsobolike, melel jaʼ kʼax bayalxan te machʼatik sjokinojotik, yan stukel ma bayal te machʼatik jokinbil yuʼune. 8 Chʼichʼbakʼetnax* te machʼatik jokinbil yuʼune, yan te joʼotike jaʼ sjokinojotik te Jehová te Dios kuʼuntik yuʼun ya skoltayotik sok yuʼun ya yakʼ guerra ta jwentatik». Ta swenta te bin la yal te Ezequías te ajwalil yuʼun Judá la yakʼbey yip yoʼtan te lume.

9 Ta patil, te Senaquerib te ajwalil yuʼun Asiria —te ay ta Lakís sok te soldadoetik yuʼun te kʼax bayale— la stikun te j-abatetik yuʼun ta Jerusalén ta stojol te Ezequías te ajwalil yuʼun Judá sok ta stojol te stsʼumbal Judá te ayik ta Jerusalén ta yalbeyel jich ini:

10 «Jich ya yal te Senaquerib te ajwalil yuʼun Asiria: ‹¿Machʼa smukʼulinoj awoʼtanik te ya xjilex ta Jerusalén te yak ta joytayele? 11 ¿Yuʼunbal ma xa awilik te yak sloʼlaybelex te Ezequías sok ya yakʼ xlajex ta wiʼnal sok ta takin tiʼil te kʼalal jich ya yalbeyex «Te Jehová te Dios kuʼuntik ya skoltayotik lokʼel ta skʼab te ajwalil yuʼun Asiria»? 12 ¿Mabal jaʼuknix te Ezequías te la slajin te toyol awilaletik sok te skajtajib chikʼbil majtaniletik yuʼun te Dios awuʼunik te patil jich la yalbey te yajwalul Judá sok Jerusalén «Jun-naxme skajtajib chikʼbil majtanil te banti ya skʼan ya anijan abaik sok teyme ya awakʼik te xtomet schʼailel te chikʼbil majtaniletik awuʼunike»? 13 ¿Yuʼunbal ma anaʼojik te bin la jpasbeykotik sok te antiguo jmeʼ jtat spisil te lumetik te ayik ta yantik nacionetik? ¿Juʼbal yuʼunik te diosetik yuʼun te nacionetik-abi skoltayel lokʼel ta jkʼab te skʼinalike? 14 Ta spisil te nacionetik-abi te la slajin te antiguo jmeʼ jtat, ¿aybal junuk dios te juʼ yuʼun skoltayel lokʼel ta jkʼab te skʼinale? Jaʼ yuʼun, ¿bin-utʼil kʼan skoltayex lokʼel ta jkʼab te Dios awuʼunike? 15 ¡Ma xa awakʼ sloʼlayex te Ezequías sok ma xa awakʼ smonbeyex awoʼtanik! Ma xa awakʼ smukʼul awoʼtanik ta stojol. Teme maʼyuk junuk dios yuʼun jun nación o jun dios yuʼun jtul ajwalil te juʼem yuʼun skoltayel lokʼel ta jkʼab te lum yuʼun ni jaʼuk ta skʼab te antiguo jmeʼ jtat, ¡jaʼuktobalix ya xjuʼ ya skoltayex lokʼel ta jkʼab-a te Dios awuʼunike!›».

16 Te j-abatetik yuʼun te Senaquerib bayaltoxan bintik ma lek la yalik ta stojol te Jehová te smelelil Dios sok ta stojol te Ezequías te j-abat yuʼune. 17 Jaʼnix jich la stsʼibay cartaetik ta sbolkʼoptayel te Jehová te Dios yuʼun Israel, sok jich la yal ta skontrainel: «Jich bitʼil te diosetik yuʼun te yantik nacionetik te ma juʼ yuʼunik skoltayel lokʼel ta jkʼab te lum yuʼunike, jaʼnix jich te Dios yuʼun te Ezequías ma xjuʼ ya skoltay lokʼel ta jkʼab te lum yuʼune». 18 Te j-abatetik yuʼun te Senaquerib tulan la skʼoponik te machʼatik ayik ta sba te stsʼajkʼul te Jerusalén, kʼopojik ta skʼop te judioetik yuʼun ya yakʼbeyik xiwel sok yuʼun ya yakʼbey xnijk yoʼtanik te jich ya yuʼuninik te mukʼul lume. 19 La sbolkʼoptayik te Dios yuʼun te Jerusalén jich bitʼil la sbolkʼoptayik te diosetik yuʼun te lumetik te ayik ta yantik nacionetik te pasbilik ta skʼab ants winiketik. 20 Pero, te ajwalil Ezequías sok te j-alwanej Isaías snichʼan Amoz la skʼoponik Dios ta swenta-abi sok la yalbeyik wokol te Dios te ay ta chʼulchan.

21 Jich yuʼun, te Jehová la stikun jtul chʼul-abat ta slajinel spisil te winiketik te ay yipik ta yakʼel guerra, te jwolwanejetik sok te capitanetik yuʼun te scampamento te ajwalil yuʼun Asiria te jich kʼexawen sujtel ta slumal. Ta patil och bael ta templo yuʼun te sdiose, tey kʼot ta milel ta espada yuʼun chaʼoxtul snichʼnab. 22 Jich la yichʼ koltayel yuʼun Jehová te Ezequías sok te yajwalul Jerusalén ta skʼab te Senaquerib te ajwalil yuʼun Asiria sok ta skʼab spisil te machʼatik talik ta akʼbeyel guerra yuʼune. Jich akʼbot lamalkʼinal* yuʼun Dios ta bayuk. 23 Bayal machʼatik la yichʼbeyik tal smajtan te Jehová ta Jerusalén sok bayal bintik lek la yichʼbeyik tal te Ezequías te ajwalil yuʼun Judá. Jaʼ yuʼun, te yantik nacionetik la yichʼik ta mukʼ te Ezequías ta swenta te bin kʼot ta pasele.

24 Ta yorail-abi, te Ezequías tsakot ta chamel sok jtebxanix kʼan lajuk yuʼun. La skʼopon te Jehová, aʼiybot te skʼope sok akʼbot yil jun señail. 25 Pero, te Ezequías ma la yal wokol yuʼun te bin lek la yichʼ pasbeyele. La stoy sba, jich la yakʼ ilinuk te Dios ta stojol soknix ta stojol te Judá sok Jerusalén. 26 Pero, te Ezequías la spejkʼan sba ta swenta te stoybail yoʼtan, jichnix la spas-euk te yajwalul Jerusalén. Jich yuʼun, te Jehová maba ilin ta stojolik te jayeb kʼajkʼal kuxul ta kʼinal te Ezequías.

27 Te Ezequías ayin kʼax bayal skʼulejal sok bayal yutsilal. Jaʼnix jich la spasbey yawil te banti ya skʼej te plata, oro, tʼujbil tonetik, aceite te sumetnax yikʼ,* te majkilaletik sok spisil te bintik bayal stojole. 28 Jaʼnix jich la spasbey yawil te banti ya skʼej te sit awal tsʼunubiletik, yachʼil vino sok aceite, sok la spasbey yawil te banti ya x-ayin te jujunchajp schambalam soknix la spasbey scorral te tuminchijetik yuʼune. 29 Soknix la yuʼunin mukʼul lumetik sok bayal chambalametik, tuminchijetik sok wakaxetik, melel kʼax bayal bintik akʼbot yuʼun te Diose. 30 Te Ezequías la smak te slokʼib jaʼ yuʼun Guihon sok la spasbey bael sbe ta alan, ta stojol smalib kʼajkʼal, ta Mukʼul lum yuʼun David. Spisil te bintik la spas te Ezequías lek kʼot ta lokʼel yuʼun. 31 Pero, te kʼalal la yichʼik tikunel te winiketik yuʼun te machʼatik yichʼoj mukʼ yaʼtelik ta Babilonia ta sjojkʼoyel ta swenta te seña te kʼot ta pasel ta lume, te smelelil Dios la yijkitay te Ezequías yuʼun ya spas ta prueba sok yuʼun ya skʼan ya snaʼ te bin ay ta yoʼtan.

32 Te bintik la spas ta skuxlejal te Ezequías sok te bintik la spas ta swenta te skʼuxul yoʼtan te ma x-ijkitaywan, tsʼibaybil jilel te banti tsʼibaybil te najalsitil yuʼun te j-alwanej Isaías snichʼan Amoz sok tsʼibaybil jilel ta Libro yuʼun te Ajwaliletik yuʼun Judá sok yuʼun Israel. 33 Jich te Ezequías way sbakʼetal sok te antiguo smeʼ stat sok la smukik ta ajkʼolxan* moel te banti ay te smukenal te snichʼnab te David. Te kʼalal laj te Ezequías, spisil te machʼatik nainemik ta Judá sok ta Jerusalén la yichʼik ta mukʼ. Tey-abi, jaʼ och jilel ta ajwalil te Manasés, te snichʼane.