2 Crónicas

16 Te kʼalal ayix 36 jaʼbil ta ajwalil-a te Asá, te Baasá te ajwalil yuʼun Israel bajt yakʼbey guerra te Judá sok la schaʼpas te stsʼajkʼul te Ramá swenta jich maʼyuk machʼa ya xlokʼ ni ya x-och tal ta skʼinal te Asá te ajwalil yuʼun Judá. 2 Jich yuʼun, te Asá la stsob tal te plata sok te oro te ay ta yawil kʼulejalil ta sna te Jehová sok ta yawil kʼulejalil ta sna* te ajwalil, tey-abi la stikunbey bael te Ben-Hadad te ajwalil yuʼun Siria te ay ta nainel ta Damasco. Jich la yalbey bael: 3 «Ayme jchapoj jkʼoptik, jich te bitʼil la spas te atat sok te jtate. Lame jtikunbat tal plata sok oro. Lajinbeya skʼoplal te chapbilkʼop apasoj sok te Baasá te ajwalil yuʼun Israel swenta jich ya xnamaj* bael ta jkʼinal».

4 Jich yuʼun, te Ben-Hadad la schʼuunbey skʼop te ajwalil Asá, la stikun bael te capitanetik yuʼun te soldadoetik ta yakʼbeyel guerra te mukʼul lumetik yuʼun Israel, la yuʼuninik te Ijón, Dan, Abel-Maim sok spisil te banti ya yichʼ kʼejel biluketik te ayik ta mukʼul lumetik yuʼun Neftalí. 5 Te kʼalal la yaʼiy stojol te Baasá, ta oranax la yijkitay spasel te stsʼajkʼul te Ramá sok maba la slajinix spasel. 6 Jich yuʼun, te ajwalil Asá la stsob tal spisil te yajwalul Judá, la yichʼik bael te tonetik sok te teʼetik te la stuuntes te Baasá ta spasel te stsʼajkʼul te Ramá, jaʼ la stuuntes yuʼun la schaʼpas-a te stsʼajkʼul te Gueba soknix te Mizpá.

7 Ta yorail-abi, te Hananí te winik te ya yil najalsitil tal yil te Asá te ajwalil yuʼun Judá sok jich la yalbey: «Ta skaj te jaʼ la smukʼulin awoʼtan* te ajwalil yuʼun Siria te ma jaʼuk la smukʼulin awoʼtan* te Jehová te Dios awuʼun, kolix bael ta akʼab te soldadoetik yuʼun te ajwalil yuʼun Siria. 8 ¿Mabal jaʼuk kʼax bayal soldadoetik yuʼunik-a te etiopeetik sok te libioetik soknix te kʼax bayal scarretaik yuʼun guerra sok te machʼatik ya xkajajik ta caballoetik? Pero la smukʼulin awoʼtan te Jehová, jich la yakʼbat ta akʼab. 9 Melel te sit te Jehová yak ta yilel ta swolol te balumilal yuʼun ya yakʼbey yil te yuʼel ta skoltayel te machʼatik jun yoʼtan yakik ta abatinel ta stojole. Pero, ta ora ini ma la anaʼ kʼinal; jich yuʼun ta ora bael ini yame xtal awichʼ akʼbeyel guerra».

10 Jaʼ ini kʼaxto ilin yuʼun te Asá; ilin ta stojol te winik te ya yil najalsitil, jich yuʼun la yakʼ ta chukel.* Ta yorailnix-abi, te Asá ay machʼatik jajch yutsʼin ta slumal. 11 Te bintik la spas ta skuxlejal te Asá ta sjajchibal kʼalalto ta slajibal tsʼibaybil jilel ta Libro yuʼun te Ajwaliletik yuʼun Judá sok yuʼun Israel.

12 Te kʼalal ayix 39 jaʼbil ta ajwalil-a te Asá, tsakot ta chamel ta yok sok batsʼejxan; manchukme ay ta chamel-a maba la sle te Jehová, jaʼ la sle te jpoxtaywanejetik. 13 Jich te Asá way sbakʼetal sok te antiguo smeʼ stat; laj te kʼalal ayix 41 jaʼbil ta ajwalil-ae. 14 La smukik ta mukenal te kʼax tʼujbil te jaʼnix la spas ta Mukʼul lum yuʼun David. La smejtsʼanik ta jun chajchamteʼ* te malbil ta aceite te sumetnax yikʼ* sok ta pomada te bayal bintik kapbil soke. Jaʼnix jich la spasik mukʼul kʼajkʼ swenta ya yichʼik ta mukʼ.*