Lamentaciones
א [álef]
2 ¡Te Jehová la spots ta yilinba te achʼix yuʼun Sion jich te bin-utʼil ya spas te tokal!
Kʼalalto ta chʼulchan la schʼoj koel tal ta balumilal te stʼujbilal te Israel.
Ta skʼajkʼalel te yilinba ma jul ta yoʼtan te skajtajib yok.
ב [bet]
2 Te Jehová maba la snaʼbey yoʼbolil sba te naetik yuʼun te Jacob te kʼalal la slajinlane.
Ta yorail yilinba la sjin te mukʼul tsʼajkʼetik yuʼun te achʼix yuʼun Judá.
La schʼoj ta lum, la sbolobtesbey skʼoplal te wentainel yuʼun soknix te machʼatik yichʼoj mukʼ yaʼtelik.
ג [guímel]
3 Ta yorail yilinba la slajinbey yip* ta jkʼaxel te Israel.
La skʼej bael te swaʼel skʼab te kʼalal noptsaj* tal te skontratak,
maba kom ta tilel jich te bin-utʼil kʼajkʼ ta stojol te Jacob jaʼto te kʼalal laj ta kʼajkʼel spisil te bintik ay ta sjoyobal.
ד [dálet]
4 La skox* ta lek te stʼimalteʼ jich te bin-utʼil ya spas te jkontrainwanej;
te swaʼel skʼab chapalix yuʼun ya xlajinwan;
la smiltiklan spisil te machʼatik lek ilbilik.
La smal te yilinba jich te bin-utʼil te kʼajkʼ ta stojol te snailpakʼ te yantsil nichʼan Sion.
ה [he]
5 Te Jehová jich kʼoem te bin-utʼil jkontrainwanej;
la slajin te Israel.
La slajin spisil te toyol tsʼajkʼetik yuʼun;
la sjin te mukʼul tsʼajkʼetik yuʼun.
La snajtubtesbey stiempoil te mel-oʼtan yuʼun sok te ajkan yuʼun swokol te achʼix yuʼun Judá.
ו [waw]
6 La sjin te axibal na yuʼun, jich bitʼil axibal na te ay ta tsʼunbil nichimaltik.
La slajinbey skʼoplal te kʼin yuʼun.
Te Jehová la yakʼ te maba ya yichʼix naʼel te kʼinetik sok te sabadoetik ta Sion,
ta swenta te kʼaxto ilin maba la snaʼbey yoʼbolil sba te ajwalil ni jaʼuk te sacerdote.
ז [zayin]
7 Te Jehová la spʼaj te skajtajib chikʼbil majtanil yuʼun;
la spʼaj te chʼul awilal yuʼun.
La yakʼbey ta skʼab te skontratak te toyol tsʼajkʼetik te yichʼoj lek yip.
Awunik ta yutil sna te Jehová jich bitʼil ya yichʼ pasel ta skʼajkʼalel kʼin.
ח [jet]
8 Te Jehová la sta ta nopel te ya slajin te stsʼajkʼul te mukʼul lum yuʼun Sion.
La spʼis ta chʼajan te tsʼajkʼe.
Ma la skom skʼab ta lajinwanej.
La yakʼbey smel yoʼtan te latsbil tonetik sok te tsʼajkʼetik;
la slajinbey yip ta spisilik.
ט [tet]
9 Mukul jilel ta lum te puertaetik yuʼun.
La sjinbey te skʼatal teʼel sok la swakʼtiklan* ta jkʼaxel.
Te ajwalil sok te machʼatik yichʼoj mukʼ yaʼtelik la yichʼik ikʼel bael ta yantik nacionetik.
Maʼyukix ley;* te j-alwanejetik yuʼun maba ya yichʼix akʼbeyel yilik najalsitil* yuʼun te Jehová.
י [yod]
10 Te jwolwanejetik yuʼun te yantsil nichʼan Sion nakajtik ta lum sok ma xkʼopojik.
Ya sbujkʼiy tsʼubil lum ta sjolik sok slapojik chʼixal pakʼ.*
Te achʼixetik* yuʼun Jerusalén snijanoj sjolik kʼalal ta lum.
כ [kaf]
11 Lujbix ta okʼel te jsite.
Ya stij sba te jchʼujte.*
Malix koel ta lum te jsejkub ta skaj te la yichʼ lajinel te achʼix yuʼun te lum kuʼune,
ta skaj te chʼin achʼix keremetik sok te alaletik te ya xchʼay kʼinal yaʼiyik ta plazaetik* yuʼun te lume.
ל [lámed]
12 Ma xkomik ta yalbeyel te snanik* «Ay jwiʼnal sok takin koʼtan».*
Jich ya yalik te kʼalal ya xchʼay kʼinal yaʼiyik jich te bin-utʼil te machʼatik ejchenajemik ta plazaetik yuʼun te lum,
sok te kʼalal yakik ta lajel ta skʼab te snanike.
מ [mem]
13 ¿Bin ejemplo ya xjuʼ ya jtuuntes ta atojol?
O ¿bin ya xjuʼ ya jpajbat akʼoplal-a, achʼix yuʼun Jerusalén?
¿Bin ya xjuʼ ya jpajbat akʼoplal-a yuʼun ya kakʼbat smukʼul kʼinal awaʼiy, achʼix yuʼun Sion te maba tabilat ta winik?
Te lajinel jul ta atojole jaʼ jich smukʼul te bin-utʼil te mar. ¿Machʼa ya xjuʼ ya slekubtesat?
נ [nun]
14 Te j-alwanejetik awuʼun la yilik lotil najalsitiletik ta atojol soknix te maʼyuk swentail kʼote,
te jamaluk la yalbatik te amule maba la awichʼ chukel bael te jichuke,
jaʼ la scholbatik awaʼiy te lotil najalsitiletik sok te ya xloʼlaywane.
ס [sámekh]
15 Spisil te machʼatik ya xkʼaxik ta be ya spakʼ skʼabik ta labanwanej.
Te kʼalal ya yilik te achʼix yuʼun Jerusalén, chamnax yoʼtanik,* jaʼ yuʼun ya xuxubajik sok ya sjimulan sjolik te jich ya yalik:
«¿Jaʼbal te mukʼul lum ini te jich ya yalik ta stojol-ae ‹Jelawen stʼujbilal sok ya yakʼ tseʼel oʼtanil ta swolol balumilal›, te xchiike»?
פ [pe]
16 Spisil te akontratak la sjam yeik ta skontrainbelat.
Ya xuxubajik, stiʼojnax yeik sok jich ya yalik: «Juʼ kuʼuntik slajinel.
¡Jaʼ te kʼajkʼal ini te yakotik smaliyel-ae! ¡Kʼotix ta pasel sok la kiltikix!».
ע [ayin]
17 La spas te bin la skʼan yoʼtan te Jehová;
la skʼotes ta pasel te skʼope, jaʼ te bin namey yalojix-ae.
Maba la snaʼbey yoʼbolil sba te kʼalal la slajine.
La yakʼ te tseʼeluk yoʼtan ta atojol te akontra;
jaʼ la yakʼ te ya stsakxan yip te akontratak.
צ [sadé]
18 Jaʼat tsʼajkʼetik yuʼun te mukʼul lum Sion, te lume sok spisil yoʼtan ya yawtayik te Jehová.
Ta kʼajkʼal ajkʼabal akʼa okinuk yaʼlel sitik jich te bin-utʼil mukʼul jaʼ te sok yip yak ta okinel.*
Mame xa akux awoʼtan jtsʼinuk,* mame xa awakʼbey skux yoʼtan te asit.
ק [qof]
19 ¡Jajchan! Okʼan ta sjunal ajkʼabal.
Mala ta stojol Jehová spisil te bintik ay ta awoʼtan jich te bin-utʼil ya xmal te jaʼe.
Toya akʼab ta stojol, pasa ta swenta skuxlejal te awalatak
te yak ta chʼayel kʼinal yaʼiyik ta jujun esquinaetik yuʼun te calleetik ta skaj te wiʼnal.
ר [resh]
20 Ilawil, Kajwal, Jehová, ilawil te machʼa la awakʼbey tulan castigo.
¿Lekbal te jaʼnix ya sweʼik te yalatakik te naniletik,* alaletik te lek ayinike?*
¿Lekbal te ya yichʼik milel te sacerdoteetik sok te j-alwanejetik ta chʼul awilal yuʼun te Jehová?
ש [shin]
21 Te sbakʼetal te jchʼieletik sok te meʼel mamaletik tasajtik* jilel ta calleetik.
Te achʼixetik sok te keremetik kuʼun la yichʼik milel ta espada.
La amiltiklan ta skʼajkʼalel awilinba; maba la anaʼtiklanbey yoʼbolil sba te kʼalal la amiltiklane.
ת [taw]
22 Bayuknax ya awikʼ tal te xiwel jich te bin-utʼil ya yichʼ ikʼel tal te ants winiketik ta yorail kʼin.
Ta skʼajkʼalel yilinba te Jehová, maʼyuk machʼa kol sok maʼyuk machʼa kuxul jilel;
te jkontratak la slajin ta jkʼaxel te machʼatik la kalatay sok te la jchʼijtese.