Números
23 Jaʼ yuʼun, te Balaam jich la yalbey te Balac: «Pasbon jukeb kajtajib liʼi sok chajpanbon juk-kojt toroetik sok juk-kojt tat tuminchijetik». 2 Te Balac la spas ta oranax jich te bitʼil albot yuʼun te Balaam. Te Balac sok te Balaam la yakʼik jkojt toro sok jkojt tat tuminchij ta jujun kajtajib. 3 Tey-abi, te Balaam jich la yalbey te Balac: «Jilan liʼ ta stsʼeel te chikʼbil majtanil awuʼune, joʼon ya xboon. Repenta te Jehová ya skʼoponon. Chikan te bin ya yakʼbon jnaʼ, yame kalbat». Jich te Balaam bajt ta chʼin wits.*
4 Patil, te Dios la skʼopon te Balaam. Te Balaam jich la yalbey te Dios: «La jcholan jukeb kajtajib, la kakʼ jkojt toro sok jkojt tat tuminchij ta jujun kajtajib». 5 Te Jehová la yakʼbey ta ye te Balaam te bin ya yal, jich la yalbey: «Sujtan bael te banti ay te Balac, jichme ya skʼan ya awalbey». 6 Jich sujt bael te Balaam, tey kʼot sta te Balac, la yil te tekʼel sok spisil te machʼatik yichʼoj mukʼ yaʼtelik ta Moab te ayik ta stsʼeel te chikʼbil majtanil yuʼun. 7 Te Balaam jich la yal ta skʼop j-alwanej:
«Kʼalalto ta Aram la yikʼon tal te Balac, te ajwalil yuʼun Moab;
kʼalalto ta witstikil te banti ya xlokʼ tal te kʼajkʼale:
‹Laʼ sok bolkʼoptaybon te Jacob.
Jich, laʼ sok akʼa te ya xkʼot castigo ta stojol te Israel›.
8 ¿Bin yuʼun ya jbolkʼoptay te machʼa maba bolkʼoptaybil yuʼun te Diose?
¿Bin yuʼun ya kakʼ te ya yichʼ castigo te machʼatik maba yaloj te Jehová te ya yichʼike?
9 Kʼalalto ta sba te mukʼul tonetik ya kil;
kʼalalto ta chʼin witsetik ya kil.
Jaʼ jpam lum te stukel yak ta nainel tey-a,
sok maba mukʼ skʼoplal ya yakʼ sba ta stojol te yantik nacionetik.
10 ¿Machʼa ya xjuʼ ya yajtay te tsʼubil lum yuʼun te Jacob?
¿Machʼa ya xjuʼ ya yajtay junuk ta schanebal parte te lum yuʼun Israel?
Akʼa lajukon jich te bin-utʼil ya xlaj te machʼatik toj yoʼtanik,
jichuknix ya xlaj jkʼoplal te bin-utʼil ya xlaj skʼoplalike».
11 Tey-abi, te Balac jich la yalbey te Balaam: «¿Bin la apasbon? La kikʼat tal yuʼun ya abolkʼoptay te jkontratake, pero te bin-nax la apase jaʼ te la akʼanbey bendición». 12 Te Balaam jich la yal: «¿Mabal jaʼuk ya skʼan te ya kal spisil te bin ya yakʼbon ta ke te Jehová?».
13 Te Balac jich la yal: «Awokoluk, laʼ jokinawon bael ta yan lugar te banti ya xjuʼ ya ata ta ilel te lume. Jaʼnax ya ata ta ilel te machʼatik nopol* ayik, maba ya ata ta ilel spisilik. Kʼalalto tey-a bolkʼoptaybon te lum». 14 Jich yuʼun la yikʼ bael ta skʼinal Zofim ta sba wits Pisgá, la spas jukeb kajtajib sok la yakʼ jkojt toro sok jkojt tat tuminchij ta jujun kajtajib. 15 Te Balaam jich la yalbey te Balac: «Jilan liʼ ta stsʼeel te chikʼbil majtanil awuʼune, joʼon ya xbajt jkʼopon Dios lum ine». 16 Te Jehová la skʼopon te Balaam sok la yakʼbey ta ye te bin ya yale, jich la yalbey: «Sujtan bael te banti ay te Balac jichme ya skʼan ya awalbey». 17 Jich yuʼun, te Balaam bajt te banti ay te Balac, la yil te yak ta maliywanej ta stsʼeel te chikʼbil majtanil yuʼune sok te jokinbil yuʼun te machʼatik yichʼoj mukʼ yaʼtelik ta Moab. Te Balac jich la sjojkʼoybey: «¿Bin la yalbat te Jehová?». 18 Te Balaam jich la yal ta skʼop j-alwanej:
«Balac, jajchan, sok chʼama awaʼiy.
Aʼiybon te jkʼop, snichʼanat Zipor.
19 Te Dios ma jichuk te bin-utʼil winik te ya yaʼiy lot
sok ma jichuk te bin-utʼil snichʼan winik te ya sut skʼop.
Te kʼalal ay bin ya yal, ¿mabal yakuk spas?
Te kʼalal ay bin jamal ya yal, ¿mabal yakuk skʼotes ta pasel?
20 ¡Ilawil! La kichʼ ikʼel tal ta skʼanel bendición;
te Dios yakʼoj bendición, te joʼone ma xjuʼ ya jelbey skʼoplal.
21 Ma xyakʼ te ya yichʼ pasel magia ta skontrainel te Jacob
sok ma xyakʼ te ya xkʼax swokol te lum yuʼun Israel.
Jokinbilik yuʼun te Jehová te Dios yuʼunik,
sok ya yalik te jaʼ ajwalil yuʼunik.
22 Te Dios la slokʼeslan tal ta Egipto.
Jich kʼoem yuʼunik te bin-utʼil xulubiletik yuʼun jaʼmal toro.
23 Melel ma xtuun te bin chopol* skʼoplal ya yichʼ alel ta skontrainel te Jacob
ni te naʼojel ta skontrainel te lum yuʼun Israel.
Ta ora ini, jich ya xjuʼ ya yichʼ albeyel skʼoplal te Jacob sok te lum yuʼun Israel:
‹¡Ilawilik te bin spasoj te Diose!›.
24 Te lum ini jich ya xjajch te bin-utʼil león-choj,
jich ya stejkʼan sba te bin-utʼil león-choj.
Maba ya spajkan sba jaʼto te kʼalal stiʼojix-a te bin stsakoje
sok te kʼalal yuchʼojix-a te schʼichʼel te bin smiltiklanoje».
25 Jaʼ yuʼun, te Balac jich la yalbey te Balaam: «Teme maba ya xjuʼ ya abolkʼoptaylan, jaʼnix jich ma xa akʼanbey bendición». 26 Te Balaam jich la yalbey te Balac: «¿Mabal lajuk kalbat te ya jpas spisil te bin ya yalbon te Jehová?».
27 Te Balac jich la yalbey te Balaam: «Awokoluk, laʼ, ya kikʼat bael ta yan lugar. Repenta lek ya yil te smelelil Dios te teyto ya abolkʼoptaybon-a te lume». 28 Jaʼ yuʼun, te Balac la yikʼ bael te Balaam ta sba wits Peor, te ay ta stojol bael te Jesimón.* 29 Tey-abi, te Balaam jich la yalbey te Balac: «Pasbon jukeb kajtajib liʼi sok chajpanbon juk-kojt toroetik sok juk-kojt tat tuminchijetik». 30 Jaʼ yuʼun, te Balac jichnix la spas te bitʼil albot yuʼun te Balaam. Jich te Balac la yakʼ jkojt toro sok jkojt tat tuminchij ta jujun kajtajib.