Deuteronomio
1 Te Moisés la skʼopon te lum Israel ta jochol takin kʼinal ta nopol* mukʼul jaʼ Jordán, ta jochol takin kʼinal, ta stojol bael Suf te ay ta olil yuʼun Parán, Tófel, Labán, Hazerot sok Dizahab. 2 11 kʼajkʼal ya yichʼ beentayel ta Horeb jaʼto kʼalal ta Cadés-Barnea ta sbelal te wits Seír. 3 Ta jaʼbil 40, ta sbabial kʼajkʼal yuʼun te sbuluchebal u, te Moisés la yalbey yaʼiy te israeletik spisil te bin albot ta mantal yuʼun Jehová. 4 Jaʼ ini kʼot ta pasel te kʼalal tsalbilix-a te Sehón, te ajwalil yuʼun te amorreoetik te yak ta nainel ta Hesbón, sok te Og te ajwalil yuʼun Basán te yak ta nainel ta Astarot, ta Edréi. 5 Ta stojol slokʼib kʼajkʼal yuʼun Jordán, ta skʼinal Moab, te Moisés jajch scholbey skʼoplal te Ley ini:
6 «Te Jehová te Dios kuʼuntik, jich la yalbotik ta Horeb: ‹Te jaʼex bayalix tiempo liʼ ayex ta witstikil ini. 7 Chajpana abaik sok baanik ta witstikil yuʼun te amorreoetik sok spisil te kʼinal te slakʼoj sba ta Arabá, ta witstikil, ta Sefelá, ta Négueb sok ta stiʼil mar, ta skʼinal te cananeoetik sok ta wits Líbano, jaʼto kʼalal ta mukʼul jaʼ yuʼun Éufrates. 8 Ilawilik, la kakʼbeyex ta atojolik te kʼinale. Ochanik sok uʼuninaik te kʼinal te la yal ta jamal te Jehová te ya yakʼbey te ameʼ atatik, jaʼ te Abrahán, Isaac, Jacob sok te stsʼumbalike›.
9 »Ta yorail-abi, jich la kalbeyex: ‹Ma xjuʼ ya kikʼex bael ta jtukel. 10 Te Jehová te Dios awuʼunik la yakʼ pʼolukex, jaʼ yuʼun ta ora ini kʼax bayalix te atsʼumbalik jich te bin-utʼil te ekʼetik ta chʼulchan. 11 Te Jehová te Dios yuʼun te antiguo ameʼ atatik, akʼa yakʼ pʼolukex jmil bueltaxan te bitʼil ayex ta ora ini sok akʼa yakʼbeyex bendición jich te bitʼil yalojbeyex ta jamal. 12 ¿Bin-utʼil ya xjuʼ ya kikʼex bael ta jtukel sok te ya xkujch kuʼun te awokolik soknix te bitʼil ya atsak abaik ta kʼope? 13 Tsaa ta atsʼumbalik winiketik te ay spʼijilik, te ya snaʼik kʼinal sok te ay bin pʼijubenik ta spasel, joʼon ya kakʼ ya x-ochik ta jolaletik ta atojolik›. 14 Jich la awalbonik: ‹Lek ya kiltik te bin la awalbotik te ya jpastike›. 15 Jaʼ yuʼun la jtsa jolaletik ta jujunchajp atsʼumbalik, winiketik te ay spʼijilik sok te ay bin pʼijubenik ta spasel, la kakʼbey yaʼtelik ta jolaletik ta atojolik, jolaletik yuʼun jmil, yuʼun 100, yuʼun 50, yuʼun 10 ta tul sok te machʼatik yichʼoj mukʼ yaʼtelik ta jujunchajp atsʼumbalik.
16 »Ta yorail-abi, jich la kalbey ta mantal te juecetik awuʼunik: ‹Te kʼalal ya awaʼiyik te ay bin yak ta kʼaxel ta stojol te awermanotak, yame skʼan te stojiluk ya achajpanik te kʼop jajchem chikan teme sok jtul israel-winik sok yan israel-winik o jtul jyanlum. 17 Mame stsaawanex te kʼalal ya x-ichʼawanex ta kʼop. Pajalme ya skʼan ya awaʼiybeyik skʼop chikan teme pekʼel skʼoplal o mukʼ skʼoplal. Mame ayuk machʼa ya axiʼik, melel jaʼnax ya xjuʼ ya x-ichʼawan ta kʼop te Diose. Teme ay bin wokol ya awaʼiyik schajpanele, yame awalbonik, joʼonme ya kaʼiybeyex te akʼopike›. 18 Ta yorail-abi la kalbeyex spisil te bin ya skʼan ya apasike.
19 »Tey-abi lokʼotik bael ta Horeb, la jbeentaytik spisil te mukʼul jochol takin kʼinal te xiweltik sba te jaʼexnix la awilik ta sbelal te witstikil yuʼun te amorreoetik, jich te bitʼil la spasotik ta mantal te Jehová te Dios kuʼuntik. Jich kʼootik ta Cadés-Barnea. 20 Jich la kalbeyex: ‹Julexix ta witstikil yuʼun te amorreoetik te ya yakʼbotik te Jehová te Dios kuʼuntik. 21 Ilawilik, te Jehová te Dios awuʼunik la yakʼbeyex te kʼinal. Moanik bael, ochintayaik jich te bitʼil la yal te Jehová te Dios yuʼun te antiguo ameʼ atatik. Mame xnijk awoʼtanik sok mame xiwex›.
22 »Pero, ta apisilik talex ta jtojol sok jich la awalbonik: ‹Jtikuntik bael winiketik te ya xbajt yilik te kʼinal, ta patil ya sujtik tal yuʼun ya yalbotik te bin beil ya skʼan ya xbootik sok te bin yilel te mukʼul lumetik te banti ya xkʼootike›. 23 Lek la kaʼiy te bin la awalbonik, jaʼ yuʼun la jtsa 12 ta tul winiketik, jujuntul ta jujunchajp tsʼumbalil. 24 Bajtik te winiketik, moik bael ta witstikil. Kʼotik kʼalal ta spamlej yuʼun Escol, la stsajtay* yilik te kʼinal. 25 La stulbeyik tal sit te bintik ya yakʼ ta lum-abi sok la yichʼbotik tal, jich la yalik: ‹Mero lek te kʼinal te ya yakʼbotik te Jehová te Dios kuʼuntik›. 26 Pero, te jaʼexe maba la akʼan moex bael sok la akʼaxuntaybeyik smantal te Jehová te Dios awuʼunike. 27 Maba la skom sbaik ta wulwulkʼop ta nailpakʼetik yuʼunik, jich la yalik: ‹Ya yilintayotik te Jehová, jaʼ yuʼun la slokʼesotik tal ta skʼinal Egipto yuʼun ya yakʼotik ta skʼab te amorreoetik yuʼun jich ya kichʼtik lajinel. 28 ¿Banti ya xbootik? Te kermanotaktik la yotsesbotik jxiweltik te kʼalal jich la yalik: «Te machʼatik ya xnainik tey-ae ay yipik sok jaʼ najtikxan te bin-utʼil te joʼotik, sok joytaybilik ta toyol tsʼajkʼetik te mukʼul lumetik te ya xkʼot kʼalalto ta chʼulchan. Sok tey la kiltik-a te stsʼumbal Anac»›.
29 »Jaʼ yuʼun, jich la kaltiklanbey: ‹Mame xiwex, mame xnijk awoʼtanik ta stojolik. 30 Te Jehová te Dios awuʼunik ya xnailaj bael ta atojolik sok ya yakʼ guerra ta atojolik, jich te bitʼil la awilik te la spas ta Egipto. 31 Ta jochol takin kʼinal la awilik te la yikʼex bael ta beetik te Jehová te Dios awuʼunik jaʼto te julex ta kʼinal ini jich te bin-utʼil jtul winik ya yikʼ bael te snichʼane›. 32 Manchukme jich-abi maba la awakʼik schʼuunel awoʼtanik ta stojol te Jehová te Dios awuʼunik, 33 te nailajem bael awuʼunik ta be yuʼun ya sle jun lugar te banti ya apas acampamentoik. Te Dios ya xchiknaj ta balal kʼajkʼ ta ajkʼabal sok ta kʼajkʼaleltik ya xchiknaj ta swenta balal tokal yuʼun jich ya yakʼbeyex awilik te be te banti ya skʼan ya xbaexe.
34 »Te jayeb tiempo kʼax-abi, te Jehová la yaʼiy stojol te bin la awalike, bayal ilin sok jich la yal ta tulan mantal: 35 ‹Ni jtuluk winik yuʼun te chopol tsʼumbalil* ini ya yil te lekil kʼinal te jamal la kalbey te ya kakʼbey te antiguo ameʼ atatik, 36 jaʼnax te Caleb snichʼan Jefuné. Te Caleb jaʼme ya yil, ya kakʼbey sok te snichʼnab te kʼinal te banti been, melel jun yoʼtan la yakʼ sba ta stojol te Jehová. 37 (Jaʼnix jich ta skaj amulik ilin ta jtojol te Jehová sok jich la yal: «Jaʼnix jichat maba ya x-ochat. 38 Te Josué snichʼan Nun te tekʼel ta atojol, jaʼ te machʼa ya x-och ta kʼinal-abi. Koltaya yuʼun ayuk yip yoʼtan, melel jaʼ ya yikʼ ochel ta kʼinal te lum Israel»). 39 Ma jaʼuknax-abi, te alaletik awuʼunik te la awalik te ya yichʼik pojel bael sok te awal anichʼnabik te mato snaʼik ta ora ini te bin lek sok te bin ma lekuk jaʼ ya x-ochik tey-a sok jaʼ ya kakʼtiklanbey skʼinalinik. 40 Yan te jaʼexe, akʼaik buelta, baanik ta jochol takin kʼinal ta sbelal mar Rojo›.
41 »Jaʼ yuʼun, jich la awalbonik: ‹La jta jmultik ta stojol te Jehová. ¡Ta ora ini ya xmootik bael sok ya xbajt kakʼtik guerra, jich te bitʼil la spasotik ta mantal te Jehová te Dios kuʼuntik!›. Jaʼ yuʼun, ta apisilik la atsakik te awaʼtejibik yuʼun guerra, la akuyik te maba wokol te ya xmoex bael ta witstikil. 42 Pero, te Jehová jich la yalbon te ya kalbeyex: «Mame xmoex bael ta yakʼel guerra, melel maba jokinojex. Teme ya xmoex bael, yame awichʼik tsalel yuʼun te akontratakike». 43 Jich la kalbeyex, pero maba la achʼam awaʼiyik. Te bin la apasike, jaʼ te la akʼaxuntaybeyik smantal te Jehová sok ta swenta atoybailik moex bael ta witstikil. 44 Jich te amorreoetik te nainemik tey ta witstikil lokʼ staex sok la snutsex bael jich te bin-utʼil schanul chab, la snutstiklanex bael ta Seír kʼalalto ta Hormá. 45 Jaʼ yuʼun chaʼsujtex tal sok la awokʼetay abaik ta stojol te Jehová, pero maba la yaʼiybeyex akʼopik te Jehová sok maba la yichʼex ta wenta. 46 Jich yuʼun jilex ta nainel bayal tiempo ta Cadés.