Proverbios
17 Jaʼ lekxan te ya jweʼtik jxejtʼuk takin pan te banti ay lamalkʼinal,
ma jaʼuk te banti ay bayal weʼelil* te aynanix kʼop tey-ae.
2 Te j-abat te pʼij yoʼtan yame xmantalaj ta stojol te nichʼanil te kʼexlaltik sba te bintik ya spase,
ayme bin ya yichʼ akʼbeyel jilel-euk jich bitʼil te yantikxan snichʼnab te yajwale.
3 Te oro sok te plata ya yichʼik lekubtesel ta kʼajkʼ,
pero te Jehová jaʼ te machʼa ya yil ta lek te bin-nix ay ta koʼtantik-ae.
4 Te machʼa chopol* ya smulan yaʼiyel stojol te kʼopetik te kʼux ta aʼiyel,
te machʼa ya xloʼlaywan ya schʼam yaʼiy te chopol kʼopetik.
5 Te machʼa ya slaban te pobre ya sbolkʼoptay te Jpaswanej yuʼun,
te machʼa ya stseʼlaybey swokol te yantike yananixme yichʼ castigo-a.
6 Te machʼatik ayix yaʼbilalik jaʼ scoronaik te smamatakik,*
te alnichʼanetik jaʼ yutsilalik te smeʼ statik.
7 Te machʼa ma snaʼ kʼinal ma snujpʼuk te ya stuuntes te tʼujbil kʼopetik.
¡Kʼaxtoxan-a te ajwalil ma snujpʼuk te ya stuuntes lotil kʼopetik!
8 Te machʼa ya yakʼ jun majtanil jich ya yil te bin-utʼil tʼujbil ton te majtanil ya yak’e:
chikan te banti ya xbajt, lek ya xkʼot ta lokʼel te bintik ya spas.
9 Te machʼa ya xchʼay mulil yak ta sleel te bitʼil ya yakʼ ta ilel kʼuxul oʼtanil,
pero te machʼa jaʼnax ya yalulan te mulile ya yakʼ xat sbaik te machʼatik yamigoinoj sbaik ta leke.
10 Te machʼa ay bintik ya yichʼbey swentail tikʼnax-a te jun buelta ya yichʼ tojobtesel,
yan stukel te machʼa maʼyuk spʼijil yoʼtan ma schʼuun kʼop, manchukme 100 buelta ya yichʼ majel.
11 Te bin-nax ya sle te machʼa chopol* jaʼ te sjachel kʼop,
pero ayme machʼa kʼax chopol ya yichʼ tikunel ta stojol swenta ya x-akʼbot castigo yuʼun.
12 Jaʼ lekxan te ya jtatik ta be jkojt meʼ oso te la yichʼ tsakel bael te yalatak,
jaʼ ma lek te ya jtatik ta be te machʼa ya yakʼ ta ilel te ma snaʼ kʼinal.
13 Teme ay machʼa ma lek ya sut te bin lek ya yichʼ pasbeyel,
ma xlokʼ bael ta sna te bin chopol.*
14 Te sjachel kʼop jaʼ jich te bin-utʼil ya yichʼ jambeyel sbe te jaʼ te makbile;
te kʼalal mato xjajch-a te kʼope, lokʼan bael tey-a.
15 Te machʼa ya yal te maʼyuk smul te machʼa chopol*
sok te machʼa ya yal te ay smul te machʼa toj yoʼtan
ilaybilik yuʼun te Jehová.
16 ¿Bin swentail te ya xjuʼ ya sta spʼijil yoʼtan te machʼa ma snaʼ kʼinal
teme ma jichuk yoʼtan ya skʼan ya slee?
17 Te smelelil amigo spisil-ora ay skʼuxul yoʼtan
jich ya xkʼot te bin-utʼil bankilal ta yorail wokol.
18 Te machʼa maʼyuk spʼijil yoʼtan ya yakʼ skʼab yuʼun ya spas trato
swenta ya stejkʼan sba ta stojel betil, jaʼme testigoetik ya xkʼot te spatxujk.
19 Te machʼa ya smulan sjachel kʼop yame sta smul.
Te machʼa toyol ya spas te stiʼ sna ya sta swokol.
20 Te machʼa ma toj yoʼtan maʼyuk bin lek ya xkʼot ta lokʼel yuʼun,
te machʼa ya xloʼlaywan sok te skʼop yame sta swokol.
21 Te tatil te ay snichʼan te ma schʼuun kʼop bayal ya smel yoʼtan yuʼun;
te stat te machʼa maʼyuk spʼijil yoʼtan maʼyuk stseʼelil yoʼtan.
23 Te machʼa chopol* muken ya stsak majtanil
yuʼun ma xyichʼ pasel te bin stojil ta pasel.
24 Te pʼijil oʼtanil mero ay ta sit te machʼa ay bintik ya snaʼ stsajtayel,*
pero te machʼa maʼyuk spʼijil yoʼtan bayuknax yak ta sleel kʼalalto ta stiʼil balumilal.
25 Te nichʼanil te maʼyuk spʼijil yoʼtan ya yakʼbey smel yoʼtan te stat
sok ya yakʼbey smel yoʼtan te machʼa ayintesot* yuʼune.
26 Ma lek te ya yichʼ castigo* te machʼa toj yoʼtan
sok ma stojiluk te ya yichʼ majel te ajwaliletik.
27 Te machʼa ay spʼijil yoʼtan ya snaʼ skomel te yee,
te machʼa ay bintik ya snaʼ stsajtayel* ya x-ayin slamalil yoʼtan.
28 Hasta te machʼa ma snaʼ kʼinal ay spʼijil yoʼtan ya xkʼot te kʼalal ma xkʼopoj,
te machʼa maʼyuk bin ya yal jich ya xkʼot te bitʼil te machʼa ay bintik ya snaʼ stsajtayel.*