Números

11 Te lum jajch ta tulan wulwulkʼop ta stojol te Jehová. Kʼalal la yaʼiy stojol te Jehová, bayal ilin, te kʼajkʼ yuʼun te Jehová jajch ta tilel ta yolilik. Jich jajch slajin chaʼoxtulik ta stiʼil te campamento. 2 Kʼalal te lum jajch skʼanbey koltayel te Moisés, te Moisés la skʼanbey wokol te Jehová, jich tupʼ te kʼajkʼe. 3 Taberá* la yakʼbeyik sbiilin te lugar-abi, melel te kʼajkʼ yuʼun te Jehová til ta yolilik.

4 Te bayal jyanlumetik* te ayik ta yolil te israeletik la yakʼik ta ilel te sbikʼtal yoʼtanik. Te israeletik jaʼnix jich jajchik ta okʼel yan buelta, jich la yalik: «¿Machʼa ya yakʼbotik tiʼbal yuʼun ya jweʼtik? 5 ¡Bayal ya jnaʼtik te chay te la jweʼtik ta Egipto te maʼyuk stojol, te pepino, sandía, tux-ak, cebolla sok axux! 6 Pero, ta ora ini jich ya kaʼiytik te maʼyuk kiptik. Te bin-nax ya kiltike jaʼ te maná ini».

7 Te maná jich yilel te bin-utʼil sbakʼ kulanto sok jteb ma pajal sbonil sok te bedelio.* 8 Spisil te lum ya xlokʼ stamik sok ya sjuchʼik ta chaʼ* o ya stenik ta bojch te pasbil ta ton. Tey-abi ya spayik ta oxom* o ya spasik sepel panetik sok-a, pajal sbujtsʼ jich bitʼil chiʼil galleta te yichʼoj aceite. 9 Kʼalal ya xko tal ta ajkʼabal te tsʼujul ta sba te campamento, jaʼnix jich te maná ya xko tal ta sba.

10 Te Moisés la yaʼiy stojol te yak ta okʼel te lume, jujun familia jich yakik ta spasel, jujuntul ants winik yak ta okʼel ta yochibal te nailpakʼ yuʼun. Ta swenta-abi, te Jehová bayal ilin, jaʼnix jich te Moisés kʼax maba lek la yaʼiy. 11 Tey-abi, te Moisés jich la yalbey te Jehová: «¿Bin yuʼun te ya awakʼbon jwokole? ¿Bin yuʼun ma lek ya awilon sok te ya asujon ta swentainel spisil te lum ini? 12 ¿Yuʼunbal joʼon snanon* te lum ini? ¿Joʼonbal la kalatay yuʼun jich ya awalbon, ‹Pet-tiklana bael jich te bin-utʼil ya spas te jkanan-alal te ya spet te alal te yato snukʼ schuʼ› sok te joʼon ya kikʼtiklan bael ta kʼinal te la awalbey ta jamal te antiguo smeʼ statik te ya yichʼik jilel? 13 ¿Banti ya jta tiʼbal yuʼun ya kakʼtiklanbey sweʼ te lum ini? Melel ya xtalik ta okʼel ta jtojol sok jich yakik ta yalel ‹¡Akʼbonkotik tiʼbal yuʼun ya jweʼtik!›. 14 Ta jtukelnax ma xkujchix kuʼun ya kaʼiy te lum ini. Jaʼ kʼax mukʼ aʼtelil ta jtojol. 15 Teme jich ya apasbone, awokoluk, milawon ta oranax. Teme lek ya awilone, ma xa awakʼbon kilxan jwokol».

16 Te Jehová jich la yalbey te Moisés: «Ikʼbon tal 70 ta tul winiketik ta yolil te jwolwanejetik yuʼun te lum Israel te jaʼik winiketik te lek skʼoplalik awuʼun jich bitʼil jwolwanejetik sok te yichʼojik mukʼ yaʼtelik yuʼun te lume. Ikʼtiklana bael ta nailpakʼ ta swenta tsoblej sok akʼa sjokinatik yuʼun ya amaliyonik tey-a. 17 Ya xkoon tal sok ya jkʼoponat tey-a, ya jlokʼesbat jtebuk te chʼul espíritu* awichʼoje sok ya kakʼ ta stojolik, jaʼik ya skoltayatik ta swentainel te lume yuʼun jich maba atukel ya awil bael. 18 Jichme ya skʼan ya awaltiklanbey te lum: ‹Chʼultesa abaik ta swenta te pajele yuʼun yame aweʼik tiʼbal, melel la yaʼiyix te Jehová te awokʼelik sok te jich yakex ta yalel: «¿Machʼa ya yakʼbotik jweʼtik tiʼbal? Jaʼ lekxan ayotik-a ta Egipto». Jaʼ yuʼun, te Jehová ya yakʼbeyex tiʼbal, jich ya xweʼex. 19 Ma jaʼuknax jun kʼajkʼal ya aweʼik tiʼbal ni cheb kʼajkʼal ni joʼeb kʼajkʼal ni lajuneb kʼajkʼal ni jtab kʼajkʼal, 20 jun u ya aweʼik tiʼbal, jaʼto te kʼalal ya xlokʼ ta aniʼik sok ya awilayik, melel jaʼex la apʼajik te Jehová te ay ta awolilik sok jajch awokʼetay abaik ta stojol, jich la awalik: «¿Bin yuʼun te lokʼotik tal ta Egipto?»›».

21 Jaʼ yuʼun, jich la yal te Moisés: «Ayon ta yolil te lum sok 600 mil ta tul winiketik te chapalik ta yakʼel guerra, ¡manchukme jich-abi, yato xtal awal ‹Ya kakʼtiklanbey bayal tiʼbal te ya stiʼik ta jun u›! 22 Teme ya jmil bayal ta tsojb tuminchijetik sok bayal ta tsojb wakaxetik, ¿tikʼbal ya yaʼiyik-a? O, teme ya jtsak spisil te chayetik te ay ta mar, ¿tikʼbal ya yaʼiyik-a?».

23 Jaʼ yuʼun, te Jehová jich la yalbey te Moisés: «¿Yuʼunbal jtebnax yip* skʼab te Jehovae? Ta ora ini yame awil teme ya xkʼot ta pasel o maʼuk te bin la kalbatixe».

24 Te Moisés lokʼ bael sok la yalbey yaʼiy te lum te bin albot yuʼun te Jehová. Jaʼnix jich la stsob te 70 ta tul winiketik te ayik ta yolil te jwolwanejetik yuʼun te lum sok la yakʼtiklan ta sjoyobal te nailpakʼ. 25 Tey-abi, te Jehová ko tal ta tokal sok kʼopoj sok te Moisés. La slokʼesbey jtebuk te chʼul espíritu* yichʼoj te Moisés sok la yakʼbey ta jujuntul te 70 ta tul jwolwanejetik. Te kʼalalnax kʼot te chʼul espíritu ta stojolik, jajch yakʼik ta ilel stalelik jich te bin-utʼil j-alwanejetik, pero jaʼnax ta yorail-abi te jich la spasik.

26 Ay chaʼtul winiketik te jilemik ta campamento, Eldad sbiil te jtule sok Medad te yane. Te chʼul espíritu* jajch ta kʼoel ta stojolik, melel ochem sbiilik-euk ta lista, pero maba bajtik ta nailpakʼ, jich jajch yakʼik ta ilel stalelik ta campamento jich te bin-utʼil j-alwanejetik. 27 Tey-abi, ay jtul kerem te jich animal bajt yalbey yaʼiy te Moisés: «¡Te Eldad sok te Medad ya yakʼik ta ilel te jich stalelik te bin-utʼil j-alwanejetik ta campamento!». 28 Jich yuʼun, te Josué snichʼan Nun te jaʼ jkoltaywanej yuʼun te Moisés jaʼto tal ta skeremil, jich la yalbey: «¡Kajwal, Moisés, komtiklana!». 29 Pero, te Moisés jich la yalbey: «¿Bin yuʼun te ya amel awoʼtan ta jtojol? ¡Jaʼ lek ya kaʼiy te jaʼuk j-alwanejetik spisil te lum yuʼun te Jehová sok te yakuk x-akʼbotik yuʼun te Jehová te chʼul espíritu* yuʼune!». 30 Ta patil, te Moisés sujt bael ta campamento sok te jwolwanejetik yuʼun te lum Israel.

31 Jich yuʼun, te Jehová la yakʼ taluk ikʼ te la yikʼ tal codorniz-mut te jajch tal kʼalalto ta mar sok la yakʼ kouk ta sjoyobal te campamento te cheb xujkʼubil* stoyolil ta lumkʼinal, la smuk ta codorniz-mut sjoyobal te campamento te jun kʼajkʼal ta beentayel ta jujunjejch. 32 Jich yuʼun, te lum la stsobik codorniz-mut ta sjunal kʼajkʼal-abi, ta sjunal ajkʼabal sok ta sjunal kʼajkʼal ta yan kʼajkʼal. Spisil la stamik lajuneb homer* o kʼaxem-a. Jajch skʼiyik ta kʼajkʼal ta sjoyobal te campamentoe. 33 Pero ayto tiʼbal ta yeik sok mato xlaj yoʼtanik ta sweʼel-a, jajch yilinba te Jehová ta stojolik, te Jehová jajch yakʼbey castigo te lum kʼalal la yakʼ lajuk bayal ta tul ants winiketik.

34 Jich yuʼun la yakʼbeyik sbiilin Quibrot-Hataavá* te lugar-abi, melel tey la smukik te ants winiketik te la yakʼik ta ilel sbikʼtal yoʼtanik. 35 Tey-abi, te lum la yijkitayik jilel te Quibrot-Hataavá, bajtik ta Hazerot, tey jilik-a.