Te lek yachʼil kʼop ya yal te Lucas

3 Te kʼalal ayix 15 jaʼbil yochel ta ajwalil-a te Tiberio César, jaʼ ay ta gobernador-a te Poncio Pilato ta skʼinal Judea. Te Herodes* jaʼ ay ta ajwalil ta skʼinal* Galilea, jaʼ ay ta ajwalil ta skʼinal Iturea sok ta Traconítide te Filipo te sbankil te Herodese, jaʼnix jich te Lisanias jaʼ ay ta ajwalil ta skʼinal Abilene 2 sok ay ta jwolwanej sacerdote-a te Anás sok te Caifás. Ta yorail-abi ay bin albot yuʼun Dios te Juan, te snichʼan Zacarías, ta jochol takin kʼinal.

3 Jich te Juan jajch yokliy spisil te skʼinal Jordán, yak ta yalbeyel skʼoplal te ichʼjaʼ* te jaʼ señail sujtesel oʼtanil swenta stael perdón yuʼun te mulile. 4 Jich kʼot ta pasel te bin la stsʼibay jilel te j-alwanej Isaías te jich ya yale: «Te machʼa ay ta aw ta jochol takin kʼinal: ‹¡Chajpanbeyaik te be yuʼun te Jehová!* Tojobtesaik te beetik yuʼune. 5 Spisil te kʼinal te banti lomajtike yame yichʼ butʼtiklanel sok spisil te mukʼul witsetik sok te chʼin witsetik yame yichʼik pamanel; te beetik te maba tojike yame yichʼik tojobtesel, te beetik te chujkulike yame yichʼik pamanel. 6 Spisil te ants winiketik yame yilik te kolel yuʼun te Diose›», te xchie.

7 Te Juan jich la yalbey te ants winiketik te talik ta stojol yuʼun ya yakʼtiklanbey yichʼ jaʼ:* «Stsʼumbalex jtiʼawal chanetik, ¿machʼa la yalbeyex te ya xjuʼ ya x-anex lokʼel ta stojol yilinba te Diose? 8 Nail akʼaik ta ilel ta awaʼtelik te sujtemix awoʼtanike. Mame jichuk xa awalik ‹Jaʼ jtatik te Abrahán›. Melel te Diose ya xjuʼ ya schiknajtes yal snichʼnab Abrahán ta tonetik ini. 9 Chapalix te echej yuʼun ya sbojbey slojpʼ o yisim* te teʼetike. Jaʼ yuʼun, spisil te teʼetik te ma xyakʼ lek site yame yichʼ tsʼetel sok yame yichʼ otsesel ta kʼajkʼ».

10 Jich jojkʼoybot yuʼun te ants winiketike: «¿Bin ya skʼan ya jpaskotikix-abi?». 11 Jich la yal te Juan: «Te machʼa ay chaʼlijk’ skʼuʼe, akʼa yakʼbey jlijk’uk te machʼa maʼyuk yuʼune; jaʼnix jich te machʼa ay sweʼele, akʼa yakʼbey-euk te machʼa maʼyuk yuʼune». 12 Jaʼnix jich talik ta stojol te jkʼanpatanetik yuʼun ya skʼan ya yichʼik jaʼ* sok jich la sjojkʼoybeyik te Juane: «Maestro, ¿bin ya skʼan ya jpaskotik?». 13 Jich albotik yuʼun te Juane: «Mame kʼaxemukto ya akʼanikxan-a te patanil te bitʼil albil skʼoplale». 14 Jich jojkʼoybot yuʼun-euk te soldadoetike: «¿Bin ya skʼan ya jpaskotik?». Jich albotik yuʼun te Juane: «Mame ayuk machʼa ya apojbeyik stakʼin sok mame ayuk machʼa ya alebeyik smul; junukme awoʼtanik yuʼun te bitʼil ya awichʼik tojele».

15 Spisil te ants winiketik yakik ta smaliyel yilik teme jaʼnix Cristo-a te Juane. 16 Jich jamal albotik yuʼun te Juane: «Te joʼone jaʼnax ya kakʼbeyex awichʼik jaʼ,* pero te machʼa yak ta talel ta jpate jaʼ mukʼxan yaʼtel stukel sok ma snujpʼuk ya kaʼiy te ya jtilbey* te schujkil step o xanab. Jaʼme ya yakʼbeyex awichʼik jaʼ ta swenta chʼul espíritu* sok kʼajkʼ. 17 Yichʼojix ta skʼab te swelojibal trigo sok yame slokʼesbey ta jkʼaxel te stsʼubil te trigoe. Jaʼnax ya stsobey te sit sok ya skʼej ta yawil, pero te stsʼubile yame yotses ta kʼajkʼ te maʼyuk bin-ora ya xtupʼe».

18 Jaʼnix jich la yakʼbeyxan yantik tsitsel* te ants winiketike sok la scholbeyxan yaʼiyik te lek yachʼil kʼope. 19 Pero, te Herodes —te jaʼ ajwalil ta skʼinal Galilea— bayal buelta albot ta jamal smul yuʼun te Juan ta skaj te la yinamin te Herodías —te jaʼ yinam-a te sbankile— soknix ta spisil te bintik ma lek spasoje. 20 Aytoxan bin ma lek la spas, jaʼ te la yakʼ ta chukojibal te Juane.

21 Te kʼalal la yichʼ jaʼ* spisil te ants winiketike, jaʼnix jich la yichʼ jaʼ-euk te Jesuse. Te kʼalal yak ta skʼoponel-a te Diose, jam te chʼulchane 22 sok ko tal te chʼul espíritu* yuʼun Dios ta stojol te Jesús jich bin-utʼil stsumut,* jaʼnix jich ay machʼa kʼopoj tal ta chʼulchan te jich la yale: «Jaʼat jNichʼanat te mero kʼuxat ta koʼtane. Kʼax lek koʼtan yuʼun te bin ya apase».