2 Crónicas

10 Te Rehoboam bajt ta Siquem, melel la stsob sbaik spisil te lum Israel ta Siquem yuʼun ya yotsesik ta ajwalil. 2 Kʼalal te Jeroboán snichʼan Nebat la yaʼiy stojol te bin kʼot ta pasele, oranax lokʼ tal ta Egipto (te Jeroboán ayto ta Egipto-a, melel lokʼem ta anel ta stojol te ajwalil Salomón). 3 Tey-abi la stikunik ta ikʼel te Jeroboán, jich te Jeroboán sok spisil te lum Israel bajt yilik te Rehoboam sok jich la yalbeyik: 4 «Te yugo-teʼ* te la yakʼbotik te atate al ta kuchel. Pero, teme ya apejkʼanbonkotik te aʼtelil te ya jpastik sok teme ya apejkʼanbey yalal te yugo-teʼ te la yakʼbonkotik jkuchtik te atate, yame x-abatinonkotik ta atojol».

5 Jich albotik yuʼun te Rehoboam: «Laʼik ta yoxebal kʼajkʼal». Jich sujtik bael te ants winiketike. 6 Jich yuʼun, te Rehoboam la sjojkʼoybey te mamaletik* te abatinik ta stojol te Salomón te jaʼ te stat te kʼalal kuxulto-ae. Jich la sjojkʼoy: «¿Bin ya xjuʼ ya jsutbey awaʼiyik ta swenta te bin la yal te lume?». 7 Jich albot yuʼun te mamaletik:* «Teme lek awoʼtan ta stojol te lum ini, teme ya apas te bin ya skʼanbatike sok teme lek ya asujtesbey te skʼopike, jichme spisil-ora jaʼ j-abatetik ya xkʼot awuʼun».

8 Pero la spʼaj te tojobtesel akʼbot yuʼun te mamaletik,* jaʼ bajt sjojkʼoybey te machʼatik keremikto te pajal schʼielik soke, te jaʼ yakikix ta abatinel ta stojole. 9 Jich la sjojkʼoy te Rehoboam: «¿Bin ya xjuʼ ya jsutbey awaʼiyik ta swenta te jich la yal te lume: ‹Pejkʼanbeya yalal te yugo-teʼ te la yakʼbonkotik jkuchtik te atate›?». 10 Jich albotik yuʼun te keremetik te pajal schʼielik soke: «Te ants winiketik te jich la yalbat: ‹Te yugo-teʼ te la yakʼbotik jkuchtik te atate kʼax al; pejkʼanbeya yalal›, te xchiike, jichme xa awaltiklanbey: ‹Teme tulan la yakʼ sba te jtat ta atojolik, kʼaxemtoxan tulan ya kakʼ jba-a te joʼone. 11 Te jtate la yakʼbeyex akuchik jun yugo-teʼ te ale, yan te joʼone kʼaxtoxan al ya kakʼbeyex akuchik-a. Te jtate la smajex ta chicote, yan te joʼone yame jmajex ta chicote te ay stakʼinal te tsʼupajtik sniʼ›».

12 Te Jeroboán sok spisil te lum Israel bajt yilik te Rehoboam ta yoxebal kʼajkʼal jich te bitʼil albotik yuʼun te ajwalile: «Laʼik ta jtojol ta yoxebal kʼajkʼal». 13 Pero, te ajwalil tulan la sutbey skʼop te ants winiketik. Jich te ajwalil Rehoboam maba la schʼuun te tojobtesel akʼbot yuʼun te mamaletik.* 14 Jaʼ la yal te bin albot yuʼun te keremetik te pajal schʼielik soke, jich la yal: «Te joʼone yame kakʼbeyex akuchik jun yugo-teʼ te kʼax ale, te kʼaxtoxan ale. Te jtate la smajex ta chicote, yan te joʼone ya jmajex ta chicote te ay stakʼinal te tsʼupajtik sniʼ». 15 Jich te ajwalil maba la yaʼiy stojol te bin la yal te lum Israel, melel jich la skʼan te smelelil Dios te ya xkʼot ta pasel. Yuʼun jich ya xkʼot ta pasel te bin la yal te Jehová ta stojol te Jeroboán snichʼan Nebat ta swenta te Ahíya te talem ta Siló.

16 Kʼalal spisil te lum Israel la yil te maba aʼiybot skʼopik yuʼun te ajwalile, jich la yalbeyik te ajwalile: «¿Bin jwentatik-a te David? Maʼyuk bin yakʼojbotik te snichʼan Jesé. ¡Lum Israel, baanik ta stojol te diosetik awuʼunike! David, ilawil jilel atukel te atsʼumbale». Jich sujtik bael ta snaik* te lum Israel.

17 Pero, te Rehoboam wentainwan ta stojol te israeletik te ayik ta nainel ta mukʼul lumetik yuʼun Judá.

18 Jich yuʼun, te ajwalil Rehoboam la stikun ta stojolik te Hadoram, te jaʼ swentainoj te machʼatik ikʼbilik tal yuʼun ya x-aʼtejik ta stojol te ajwalil, pero te israeletik la schʼojik ta ton, jich la smilik. Te ajwalil Rehoboam juʼ yuʼun moel ta scarreta, jich an bael ta Jerusalén. 19 Te lum Israel la stoy sbaik ta stojol te stsʼumbal David, jaʼto ta ora ini.