Eclesiastés
1 Te bintik ya yal te jtsobaw, snichʼan David te jaʼ ajwalil ta Jerusalén.
2 Te jtsobaw jich ya yal:
«¡Tojolnax! ¡Tojolnax! ¡Tojolnax ta spisil!».
3 ¿Bin ya xlokʼ yuʼun jtul ants winik
ta skaj te tulan ya x-aʼtej liʼ ta balumilal?*
4 Jkaj tsʼumbalil ya xlaj skʼoplal sok jkaj tsʼumbalil ya xchiknaj,
pero te balumilal sbajtelkʼinal ay stukel.
5 Ya xlokʼ tal te kʼajkʼal sok ya xmal bael te kʼajkʼal;
tey-abi, ya sujt bael ta oranax ta lugar te banti ya xchaʼlokʼ talel.
6 Te ikʼ ya xbajt ta stojol sur, tey-abi ya sut sba ta stojol norte.
Sututet bael spisil-ora... Te ikʼe xjoyoyetnanix-a.
7 Spisil te mukʼul jaʼetik* ya xkʼotik ta lokʼel ta mar, pero te mar maba ya xnoj.
Te mukʼul jaʼetik ya xchaʼsujtikxan bael te banti jajchik tal yuʼun ya x-okin* yan buelta.
8 Ya yakʼ lujbel spisil,
maʼyuk machʼa ya xjuʼ ya yalbey skʼoplal te bitʼil aye.
Ma tikʼuk ya yaʼiy te sitil te bin ya yile
sok ma tikʼuk ya yaʼiy te chikinil te bin ya yaʼiy stojole.
9 Te bin kʼoemix ta pasel jaʼnanixme ya xkʼot ta pasel yan buelta,
te bin la yichʼix pasel yananixme yichʼ pasel yan buelta.
Maʼyuk bin yachʼil ay liʼ ta balumilal.
10 ¿Aybal bin ay te ya xjuʼ ta alel ta stojol «Ilawil ini, yachʼilto», te xchie?
Nameyix te chiknajem-abi,
mato ayinemotik-a* te kʼalal chiknajemix-a.
11 Maʼyuk machʼa ya snaʼix ta yoʼtan te antiguo ants winiketik
sok maʼyuk machʼa ya xbajt snaʼ te machʼatik ya xtalik ta patile;
jaʼnix jich maʼyuk machʼa ya xbajt naʼotikuk yuʼun te machʼatik ya xtalikxan ta patil bael.
12 Joʼon, te jtsobaw, la kichʼ otsesel ta ajwalil yuʼun Israel ta Jerusalén. 13 La kakʼ ta koʼtan snopel sok stuuntesel te jpʼijil ta yilbeyel ta lek skʼoplal spisil te bintik pastiklanbil ta yeʼtal chʼulchan..., jaʼme te bin akʼbilik yuʼun Dios te yal snichʼnab te winiketik sok jaʼ baem ta yoʼtanik yuʼun.
14 La kil spisil te bintik pastiklanbil liʼ ta balumilal,
jaʼ ini te bin la jta ta ilel: tojolnax spisil te bintik ay, jich kʼoem te ya jnutstik te ikʼe.
15 Te bin tsʼotol aye ma xjuʼ ta tojobtesel,
sok ma xjuʼ ta ajtayel te bin mato ayuk.
16 Jich yuʼun, jich la kal ta koʼtan: «Ilawil, jtaoj bayal jpʼijil, jaʼ kʼaxemtoxan-a te bin-utʼil spisil te machʼatik nail kuxinik kuʼun ta Jerusalén; la jta bayal spʼijil koʼtan sok bayal bin la jnop». 17 Bajt ta koʼtan ta snaʼbeyel sba te pʼijil oʼtanil, te bin jkʼaxel maʼyuk swentail sok te bol-oʼtanile, jaʼnix jich la kil te jich kʼoem te ya jnutstik te ikʼe.
18 Melel ayme bayal wokolil te banti bayal pʼijil oʼtanil,
jich yuʼun te machʼa ya slexan spʼijilal yame smelxan yoʼtan.