Proverbios

16 Te ants winik ya schajpan te bintik ya snop ta yoʼtan,

pero te sujtib ya yakʼ* talem ta stojol te Jehová.

 2 Te ants winik ya skuy te toj* spisil te beetik yuʼune,

pero te Jehová jaʼ ya yil ta lek te bin-nix ya stij-a te oʼtanile.

 3 Akʼbeya ta skʼab Jehová spisil te bintik anopoj ya apas,

yuʼun jich lek ya xkʼot ta lokʼel.

 4 Te Jehová ya stuuntes spisil te bintik ay swenta ya skʼotes ta pasel te skʼanojel yoʼtan,

sok yame slajin ta jkʼaxel te machʼatik chopolik.*

 6 Ta swenta te kʼuxul oʼtanil te ma x-ijkitaywan sok te jun-oʼtanil ya yichʼ tael perdón yuʼun te mulil,

sok teme jxiʼojtik te Jehová maba ya jpastik te bintik chopol.*

 7 Kʼalal te Jehová lek ya yil te beetik yuʼun te ants winik, tseʼel yoʼtan yuʼun,

sok ya yakʼ te ay lamalkʼinal yuʼun sok te machʼatik ya xkontrainot yuʼune.

 8 Jaʼ lekxan te jtebnax te bin ay kuʼuntik pero te stojil yichʼoj tael,

ma jaʼuk te bayal bin ay kuʼuntik pero te ma stojiluk yichʼoj tael.

 9 Te ants winik ya xjuʼ ya snop ta yoʼtan te bin beil ya stʼun,

pero jaʼ ya xtojobtesbot sbe yuʼun te Jehová.

10 Te bin ya xlokʼ ta ye te ajwalil ya skʼan te pajaluk sok te bin ya snop te Diose,

pero ma skʼan ya spas te bin ma stojiluk ta pasele.

11 Te balanzaetik sok basculaetik te tsʼakal bintik ya slik jaʼ talem ta stojol te Jehová,

jaʼnix la yal te jayeb yalal ya skʼan te chʼin tonetik te ayik ta bolsa te ya xtuun ta slikel biluketik.

12 Te ajwaliletik ya yilayik te bintik chopol* ta pasel,

melel ya yichʼ yip te wentainel yuʼunik te kʼalal jaʼ ya spasik te bin stojil ta pasel.

14 Ta skaj yilinba te ajwalil ya xjuʼ ya sta slajel jtul ants winik,

pero te machʼa ay spʼijil yoʼtan ya skombey yilinba te ajwalil.

15 Te kʼalal tseʼelnax sit yelaw te ajwalil, ay kuxlejalil;

te slekil yoʼtan te ajwalil jaʼ jich te bin-utʼil tokal te ay yaʼlel te ya xtal ta yorail.

18 Te toybail ya x-ikʼawan bael ta jinel,

te toyba-oʼtanil ya xyalteswan.*

19 Jaʼ lekxan te ayuk spekʼelil koʼtantik ta yolil te machʼatik manso yoʼtanik,

ma jaʼuk te ya kichʼtik-euk te bintik la spojik tal te machʼatik ya stoy sbaik.

20 Te machʼa ay spʼijil yoʼtan ta schajpanel kʼop lek ya xkʼot ta lokʼel*

sok te machʼa ya smukʼulin yoʼtan te Jehová ay stseʼelil yoʼtan.

21 Te machʼa ay spʼijil yoʼtan yame yichʼ albeyel te ay bintik ya yichʼbey swentail,

te machʼa ya xkʼopoj sok slekil yoʼtan* ya stij koʼtantik ta schʼuunel te bin ya yale.

22 Te machʼa ay spʼijil yoʼtan jaʼ kuxlejalil ya xkʼot ta stojol,

pero te machʼatik ma snaʼik kʼinale jaʼnix ya sta swokolik yuʼun te ma snaʼik kʼinal.

23 Te machʼa ay spʼijil yoʼtan ay spʼijil ya xkʼopoj

sok ya stij koʼtantik ta schʼuunel te bin ya yale.

24 Te kʼopetik te tʼujbiliknax ta aʼiyel jaʼ jich te bin-utʼil chab,

chiʼnax ta aʼiyel sok ya slekubtes te baketik.

25 Ay jun be te lek skuyoj te ants winik,

pero ya x-ikʼawan bael ta lajel.

26 Ta skaj te ya skʼan ya xweʼ te machʼa ya x-aʼtej, tulan ya x-aʼtej,

sok jaʼnix ya sujot yuʼun te wiʼnal.

27 Te winik te ma xtuun jaʼ ya slokʼes tal te bintik chopol;*

te skʼop jaʼ jich te bin-utʼil kʼajkʼ te xpulpunaxe.

28 Te machʼa ya sjach kʼop ya yakʼ xat sbaik te yantik,

te jleaw ta kʼop ya yakʼ xat sbaik te machʼatik yamigoinoj sbaik ta leke.

29 Te machʼa ya x-utsʼinwan* ya sloʼlaybey yoʼtan te spatxujk

sok ya yikʼ bael ta chopol* be.

31 Te machʼa sakix sjol jaʼ jich kʼoem te ay tʼujbil corona ta sjol

te kʼalal jaʼ stʼunoj te be yuʼun te bin stojil ta pasel.

32 Te machʼa lamal yoʼtan jaʼ lekxan-a te bitʼil te winik te ay yip ta yakʼel guerra,

te machʼa ya snaʼ skomel te yilinba jaʼ lekxan-a te bitʼil te machʼa ya yuʼunin jpam mukʼul lum.

33 Ya schupik tonetik ta skʼuʼik ta swenta spasel suerte,*

pero chikan te bin ya yakʼ ta naʼel te suerte jaʼ talem ta stojol te Jehová.