Proverbios

 2 Te yutsilal te Dios jaʼ te ay bin ma xyakʼ ta naʼel,

te yutsilal te ajwaliletik jaʼ te ay bin ya yilbeyik ta lek skʼoplal.

 3 Te yoʼtan te ajwaliletik jaʼ jich te bin-utʼil te stoyolil chʼulchan

sok te skʼubulil balumilal: ma xkʼot ta koʼtantik.

 4 Lokʼesbeya yabakul te plata,

jichme lekubtesbil ya xjil.

 5 Lokʼesa bael ta stojol te ajwalil te machʼa chopol,*

jich te smukʼul naktajib ya yichʼ yip ta swenta te bin stojil ta pasel.

 6 Mame mukʼuk akʼoplal ya awaʼiy aba ta stojol te ajwalil

ni jaʼuk ya ale te lugar ta yolil te machʼatik ichʼbilik ta mukʼ,

 7 melel jaʼ lekxan te jich ya yalbat te ajwalil «Naklan liʼi»,

 8 Mame orauknax ya awikʼ bael ta chajpanel te apatxujk,

melel ¿bin ya apas teme la yakʼ ta ilel te jaʼat ay amule?

 9 Koltaya aba ta schajpanel te kʼop jajchem awuʼun sok te apatxujk,

pero mame xa awakʼ ta naʼel te bin muken la awichʼ cholbeyel,*

10 mame jaʼuk te ya skʼexlaltesat te machʼa yak ta yaʼiyel te akʼop

sok te maʼyuk bin ya xjuʼix ta pasel yuʼun te bintik chopol* la apuk ta alel.

11 Te kʼalal ay bin ya yichʼ alel ta yorail,

jaʼ jich te bin-utʼil manzanaetik te pasbilik ta oro te chʼalbil ta plata.

12 Te machʼa ya xtojobteswan sok spʼijil yoʼtan

jaʼ jich te bin-utʼil stakʼinal chikinil te pasbil ta oro sok chʼalilal te pastiklanbil ta lekil oro ta stojol te machʼa ya schʼam yaʼiy ta lek te kʼope.

13 Te winik te jun yoʼtan te ay bin ya xbajt yalbey skʼoplal

jaʼ jich kʼoem te bin-utʼil siketnax kʼinal yuʼun te meʼsik o toyiw ta yorail stsobel sit awal tsʼunubil ta stojol te machʼatik tikunot bael yuʼune,

melel ya skuxesbey kʼinal yaʼiy te yajwale.

14 Te ants winik te ya stoy sba te ya yakʼ jun majtanil, pero te maʼyuk bin-ora ya yakʼ

jaʼ jich te bin-utʼil tokal sok ikʼ te maʼyuk yaʼlel.

15 Ta swenta lamal oʼtanil ya xjuʼ ta kʼunubtesbeyel yoʼtan jtul comandante,

te machʼa lamalnax yoʼtan ya xkʼopoj ya xjuʼ ya swakʼ* te bake.

16 Teme ay la ata chab, jtebnaxme xa aloʼ,

melel teme bayal ya aloʼe, yaniwan axejtay lokʼel.

17 Mame spisiluk-ora ya xbaat ta sna te apatxujk

yuʼun jich ma xchʼajub awuʼun-a sok te ya spʼajate.

18 Te machʼa ya yal lot ta stojol te spatxujk

jaʼ jich te bin-utʼil jchʼix teʼ te ya yichʼ tuuntesel ta guerra, espada sok flechaetik te tsʼupul sniʼik.

19 Te machʼa ma skʼotes ta pasel te bin ya yal* ta yorail tulan wokol

jaʼ jich te bin-utʼil sbakel eal te jepen o akanil te ma lek ya xtejkʼaj te ma xjuʼ ya smukʼulin koʼtantik.

20 Te machʼa ya skʼayojtay kʼayojil ta stojol te machʼa ay ta mel-oʼtan

jaʼ jich te bin-utʼil te machʼa ya slokʼes skʼuʼ ta yorail sik

o jaʼ jich te bin-utʼil te machʼa ya yakʼbey vinagre te bicarbonato.*

21 Teme ay swiʼnal te akontra,* akʼbeya pan sweʼ;

teme takin yoʼtan, akʼbeya jaʼ yuchʼ,

22 melel jichme ya abusanbey kʼajkʼal akʼal ta sjol,*

sok jichme ya smajtantesat te Jehová.

23 Te ikʼ te ya xtal ta norte ya yikʼ tal tulan jaʼal,

te machʼa ya spukbey skʼoplal yantik ya yakʼ xjajch ilinba.

24 Jaʼ lekxan te nainel ta xujk ba na,

ma jaʼuk te sjokinel ta nainel te inamil te ya smulan sjachel kʼop.*

25 Te lekil kʼop te kʼax namalto* ya xtal,

jaʼ jich te bin-utʼil sikil jaʼ te ya skuxesbey kʼinal yaʼiy te machʼa lujbene.

26 Te machʼa toj yoʼtan te ya yakʼ sba ta tsalel yuʼun te machʼa chopol*

jaʼ jich te bin-utʼil te slokʼib jaʼ te ya xtatub sok te pozo te boloben yaʼlel.

27 Ma lek te bayal ya yichʼ loʼel te chab,

jaʼnix jich ma lek te ay machʼa jaʼnix ya sle yutsil skʼoplal stukel.

28 Te machʼa ma snaʼ skomel te yilinba

jaʼ jich te bin-utʼil jpam mukʼul lum te ya yichʼ ochintayel ta skaj te maʼyuk stsʼajkʼul.