Génesis

12 Te Jehová jich la yalbey te Abrán: «Ijkitaya jilel te alumal sok te jayeb machʼatik ay bin awutoj aba soke, sok te machʼatik ayik ta sna te atate, baan ta kʼinal te ya kakʼbat awile. 2 Ya kakʼ ya xkʼoat ta jun mukʼul nación, ya kakʼbat bendición, ya kakʼ te mukʼ skʼoplal ya xkʼot te abiil sok jaʼat bendición ya xkʼoat ta stojol yantik. 3 Ya kakʼbey bendición te machʼa ya yakʼbat bendición sok ya jbolobtesbey skʼoplal te machʼa ya sbolobtesbat akʼoplal sok spisil te familiaetik ta balumilal yame staik bendición ta awenta».

4 Jich bajt te Abrán, la spas te bitʼil albot yuʼun te Jehová sok jokinot bael yuʼun te Lot. Kʼalal te Abrán la yijkitay jilel te Harán, 75 yaʼbilal-a. 5 Lokʼ bael tey-a, bajt ta skʼinal Canaán, la yikʼ bael te Sarái te jaʼ yinam sok te Lot te jaʼ snichʼan te sbankil soknix te j-abatetik yuʼun te la sta ta Harán, jaʼnix jich la yichʼ bael spisil te bintik ay yuʼune. Kʼalal kʼotik ta skʼinal Canaán, 6 te Abrán kʼax bael ta kʼinal-abi, kʼot jaʼto kʼalal ta skʼinal Siquem te nopol* ay te banti te mukʼul teʼetik yuʼun Moré. Ta yorail-abi, tey yakik ta nainel-a te cananeoetike. 7 Te Jehová la yakʼ sba ta ilel ta stojol te Abrán sok jich la yalbey: «Ya kakʼbey atsʼumbal te kʼinal ini». Jich yuʼun, te Abrán la spasbey skajtajib chikʼbil majtanil te Jehová, jaʼ te machʼa la yakʼ sba ta ilel ta stojole. 8 Ta patil lokʼ bael tey-a, bajt ta jun wits te ay ta stojol te banti ya xlokʼ tal kʼajkʼal ta Betel, tey la spas snailpakʼ-a. Te banti la spas te snailpakʼe, te Betel jil ta smalib kʼajkʼal, te Hai jil ta slokʼib kʼajkʼal. Tey la spasbey skajtajib chikʼbil majtanil te Jehová sok jajch yalbey sbiil te Jehová. 9 Ta patil, te Abrán la stsob te scampamento sok bayuk banti la spas te scampamento ta stojol bael te skʼinal Négueb.

10 Tal yorail wiʼnal ta kʼinal-abi. Ta skaj te tulan te wiʼnale, te Abrán ko bael ta nainel cheʼoxeb kʼajkʼal ta Egipto. 11 Te kʼalal ya x-ochix bael ta Egipto-ae, jich la yalbey te Sarái te jaʼ yiname: «Kaltik awaʼiy. Ya jnaʼ te mero tʼujbil antsate. 12 Te kʼalal ya yilat te egipcioetik, ya jnaʼ te jich ya yalik ‹Jaʼ yinam ini›. Ta swenta-abi yame smilonik, yan te jaʼate kuxulme ya xjilat yuʼunik. 13 Awokoluk, altiklanbeya yaʼiyik te jaʼ kijtsʼinat, jich lek ya yilonik-a sok maba ya smilonik-a».

14 Kʼalal och bael ta Egipto te Abrán, te egipcioetik la yilik te kʼax tʼujbil te antse. 15 Jaʼnix jich, te machʼatik yichʼoj mukʼ yaʼtelik yuʼun te faraón la yilik te antse sok la yalbeyik skʼoplal stʼujbilal ta stojol te faraón. Jich yuʼun la yikʼik bael ta sna te faraone. 16 Te faraón lek la yil te Abrán ta swenta te antse, jich te Abrán la sta tuminchijetik, wakaxetik, burroetik, burraetik sok camelloetik, jaʼnix jich la sta j-abatetik yuʼun. 17 Pero, te Jehová la yakʼbey tulan wokoliletik te faraón sok te machʼatik ay yuʼun ta sna ta swenta te Sarái, te yinam te Abrán. 18 Jaʼ yuʼun, te faraón la stikun ta ikʼel te Abrán sok jich la yalbey: «¿Bin-a te la apasbone? ¿Bin yuʼun ma la awalbon te jaʼ awiname? 19 ¿Bin yuʼun te la awalbon te jaʼ awijtsʼine? ¿Mabal lajuk awil te jtebxanix kʼan kikʼ kinamine? Liʼ ay te awiname. ¡Ikʼa bael, baan sok!». 20 Te faraón la yalbey ta mantal te swiniktak te yakuk sjokinik bael te Abrán sok te yinam jaʼto te kʼalal ya xlokʼik bael ta Egipto sok spisil te bintik ay yuʼune.