2 Crónicas

15 Te chʼul espíritu* yuʼun Dios jul ta stojol te Azarías snichʼan Oded. 2 Jich yuʼun, te Azarías bajt skʼopon te Asá sok jich la yalbey: «¡Jaʼat Asá, spisil yajwalul Judá sok Benjamín! ¡Aʼiya awaʼiyik stojol te jkʼope! Teme maba ya awijkitayik te Jehová, yame sjokinex. Teme ya aleik, yame yakʼ sba ta leel; teme ya awijkitayik, yame yijkitayex. 3 Bayalix tiempo* te maba jokinbil yuʼun te smelelil Dios te israeletik, maʼyuk ni jtuluk sacerdote te ya xnojptesotik-a sok maʼyuk ley yuʼunik-a. 4 Pero, te kʼalal la sta swokolik te jich sujtik ta stojol te Jehová te Dios yuʼun Israel sok te la sleike, la yakʼ sba ta leel. 5 Ta yorail-abi, maʼyuk te machʼa jun yoʼtan ya xlokʼ ta beel,* melel jajchem bayal kʼop yuʼunik spisil te ants winiketik ta lumetike. 6 Talel kʼaxel la sjin sbaik te lumetik soknix te mukʼul lumetik, melel te Dios ma la yakʼ te ya x-ayin lamalkʼinal ta stojolik ta swenta te bayal ta chajp wokolile. 7 Yan te jaʼexe ayukme yip awoʼtanik sok mame xchebaj awoʼtanik, melel yame awichʼik majtantesel yuʼun te awaʼtelike».

8 Jaʼnax te kʼalal la yaʼiy stojol te Asá te kʼopetik-abi sok te albilkʼop yuʼun te j-alwanej Oded, la stsak yip yoʼtan, jich yuʼun la slokʼes spisil te lokʼombaetik te ilobtik sba ta spamal skʼinal Judá, ta Benjamín sok ta mukʼul lumetik te la yuʼunin te ayik ta witstikil yuʼun Efraín. Jaʼnix jich la slekubtes te skajtajib chikʼbil majtanil yuʼun te Jehová te ay ta stojol te slejchelul sna te Jehová. 9 Jaʼnix jich la stsob spisil te yajwalul Judá, Benjamín sok te jyanlumetik te nainemik ta skʼinal Efraín, ta Manasés sok ta Simeón, melel kʼax bayalik ta tul te jaʼ sjokinojik-a te Israel, pero ta patil kʼaxik bael ta stojol te Asá te kʼalal la yilik te jokinbilik yuʼun te Jehová te Dios yuʼunike. 10 La stsob sbaik ta Jerusalén ta yoxebal u te kʼalal ayix 15 jaʼbil ta ajwalil-a te Asá. 11 Ta kʼajkʼal-abi la yakʼik ta milbil majtanil ta stojol Jehová 700 ta kojt wakaxetik sok 7 mil ta kojt tuminchijetik te la spojik tale. 12 Jaʼnix jich la schap skʼopik te banti jamal la yalik te ya sleik sok spisil yoʼtanik sok spisil skuxlejalik te Jehová te Dios yuʼun te antiguo smeʼ statike. 13 Machʼauk-a te maba ya sle te Jehová te Dios yuʼun Israel, yame yichʼ milel, chikan teme mukʼ bikʼit, o teme ants o winik. 14 Jich yuʼun ay bin tulan la yalik ta jamal ta stojol te Jehová, tseʼelnax yoʼtanik yakik ta aw sok ta yokʼesinel te trompetaetik sok te xulubiletik. 15 Kʼax tseʼelnax yoʼtanik spisil te yajwalul Judá ta swenta te bin jamal la yalike, melel sok spisil yoʼtan la yalik. La spasik tulan ta sleel te Jehová, jich la yakʼ sba ta leel-euk sok la yakʼtiklanbey lamalkʼinal* ta bayuk.

16 Jaʼnix jich, te ajwalil Asá la slokʼes ta ajwalil ants te Maacá te schuchuʼe,* melel la spas jun lokʼomba te ilobtik sba yuʼun ya yichʼik ta mukʼ te chʼul teʼ yuʼun Aserá. Te Asá la sjin te lokʼomba te ilobtik sba, la swuy sok la schikʼ ta spamlej yuʼun Cedrón. 17 Pero maba la yichʼ lajinel te toyol awilaletik ta Israel. Manchukme jich-abi, te Asá jun yoʼtan la yakʼ sba ta abatinel ta stojol te Dios te jayeb kʼajkʼal kuxul ta kʼinale. 18 La yichʼ tal ta sna te smelelil Dios te biluketik te la schʼultes sok te state: jaʼ te plata, oro sok spisil ta chajp aʼtejibaletik. 19 Maba ayin guerra jaʼto te kʼalal ayix 35 jaʼbil ta ajwalil-a te Asá.