1 Crónicas

28 Jich yuʼun, te David la stsob tal spisil te jwolwanejetik yuʼun te lum Israel: jaʼ te jwolwanejetik yuʼun te jujunchajp tsʼumbalil, te comandanteetik yuʼun te grupoetik te ya x-abatinik ta stojol te ajwalil, te capitanetik te swentainojik ta jujun mil ta tul soldadoetik sok ta jujun 100 ta tul soldadoetik, te jwolwanejetik te ay ta swentaik yilel spisil te bintik ay yuʼun te ajwalil sok te snichʼnabe, te jwolwanejetik te ay ta swentaik yilel te schambalam te ajwalil sok te snichʼnabe, te machʼatik yichʼoj mukʼ yaʼtelik ta stojol te ajwalil soknix spisil te winiketik te ay yipik sok te chapalik yuʼun ya spasik aʼtelil. 2 Tey-abi, te ajwalil David la stejkʼan sba sok jich la yal:

«Kermanotak sok lumex kuʼun, aʼiya awaʼiyik stojol te jkʼope. Ay ta koʼtan-a te ya jpas jun na swenta ya kakʼ tey-a te skaxaul chapbilkʼop yuʼun te Jehová sok yuʼun jich ya xkʼot te bin-utʼil skajtajib yok te Dios kuʼuntike. Lame jchajpanix te bintik ya xtuun swenta ya yichʼ pasel te nae. 3 Pero, jich la yalbon te smelelil Dios: ‹Te jaʼate maba ya apasbon jna ta swenta jbiil, melel awakʼoj bayal guerra sok amaloj chʼichʼ›. 4 Pero, te Jehová te Dios yuʼun Israel la stsaon ta yolil te machʼatik ay yuʼun te jtat yuʼun ya x-ochon ta ajwalil ta Israel ta spisil-ora. Melel jaʼ la stsa te Judá jich bitʼil jwolwanej; ta yolil te machʼatik ay yuʼun te Judá, jaʼ la stsa te machʼatik ay yuʼun te jtat; ta spisil te snichʼnab te jtate, jaʼ la stsaon yuʼun ya x-ochon ta ajwalil ta spamal skʼinal Israel. 5 Ta spisil te jnichʼnab —melel yakʼojbon bayal jnichʼnab te Jehová— jaʼ la stsa te jnichʼan Salomón swenta ya xnajkaj ta smukʼul naktajib te Jehová yuʼun ya xmantalaj ta lum Israel.

6 »Jich la yalbon: ‹Te anichʼan Salomón jaʼme ya spasbon te jna sok te yamakʼul jna, melel la jtsa yuʼun jnichʼan ya xkʼot sok joʼon staton ya xkʼoon. 7 Ya kakʼbey yichʼ yip te wentainel yuʼun ta sbajtelkʼinal teme ya yakʼ ta yoʼtan spasel te mantaliletik kuʼun sok te bintik jchapoj, jich te bitʼil yak ta spasel ta ora ini›. 8 Jich yuʼun, ta sit spisil te lum Israel —te lum yuʼun te Jehová— sok ta stojol te Dios kuʼuntik te yak ta yaʼiyel te jkʼoptik jich ya kalbeyex: pasaik tulan ta snopel sok ta schʼuunel spasel ta lek spisil te mantaliletik yuʼun te Jehová te Dios awuʼunik swenta ya x-ayinex ta lekil kʼinal sok te jaʼ ya awakʼbeyik jilel te anichʼnabik ta sbajtelkʼinal.

9 »Yan te jaʼat, jnichʼan Salomón, naʼbeya sba te Dios yuʼun te atat, junukme awoʼtan sok tseʼelukme awoʼtan* ya x-abatinat ta stojol, melel te Jehová ya yil ta lek spisil te bintik ay ta koʼtantik, te bintik ya skʼan te koʼtantik sok te snopojibal kuʼuntik. Teme ya alee, yame yakʼ sba ta leel; pero teme ya awijkitaye, yame spʼajat ta sbajtelkʼinal. 10 Te Jehová la stsaat yuʼun ya apasbey sna te jich ya xkʼot te bin-utʼil chʼul awilal yuʼun. Mame xchebaj awoʼtan sok aʼtejanme».

11 Ta patil, te David la yakʼbey te Salomón jaʼ te snichʼane te sjunil te bitʼil ya skʼan ya yichʼ pasel te slejchelul na sok spisil te cuartoetik, jich bitʼil te cuartoetik yuʼun te yawil biluketik, te cuartoetik te ay ta ba na, te cuartoetik te ay ta yutil na sok te cuarto te banti ya yichʼ tael perdón.* 12 La yakʼbey-euk spisil te sjunil te bin akʼbot snaʼ ta swenta te chʼul espíritu* te bitʼil ya yichʼ pasel te yamakʼul sna te Jehová, spisil te weʼojibal naetik te ay ta sjoyobal, te yawil kʼulejalil ta sna te smelelil Dios sok te yawil kʼulejalil yuʼun te bintik chʼultesbile;* 13 jaʼnix jich la yalbey te bitʼil chapal te jujuntsojb sacerdoteetik sok levitaetik, te bitʼil ay spisil te aʼtelil te ya yichʼ pasel ta sna te Jehová sok spisil te aʼtejibaletik te ya yichʼ tuuntesel ta spasel te aʼtelil ta sna te Jehová. 14 La yal te jayeb yalal te oro —jaʼ te oro te ya yichʼ pasel spisil-a te aʼtejibaletik te ya xtuun ta jujunchajp aʼtelil te ya skʼan pasele— sok te yalal te plata te ya yichʼ tuuntesel yuʼun ya yichʼ pasel-a te aʼtejibaletik, jaʼ te aʼtejibaletik te ya yichʼ tuuntesel yuʼun ya yichʼ pasel te jujunchajp aʼtelile; 15 soknix te yalal te oro te ya yichʼ pasel-a te skajtajib kʼajkʼetik sok te yawil kʼajkʼetik, jaʼ te jujun skajtajib kʼajkʼ sok te yawil kʼajkʼetik yuʼune, soknix te yalal te plata te ya yichʼ pasel-a te skajtajib kʼajkʼetik, jaʼ te jujun skajtajib kʼajkʼ sok te yawil kʼajkʼetik yuʼune, jaʼ chikan te bitʼil ya yichʼ tuuntesel ta jujune; 16 jaʼnix jich la yal te yalal te oro te ya yichʼ pasel-a te mesaetik te banti ya yichʼ akʼel te panetik te ya yichʼ latsel,* jaʼ te jujun mesa, soknix te yalal te plata te ya yichʼ pasel-a te mesaetike; 17 te yalal te batsʼil oro te ya yichʼ pasel-a te trincheetik, tazaetik sok te jarraetik, sok te yalal te oro te ya yichʼ pasel-a te chʼin tazaetik, jaʼ te yalal te jujun chʼin taza, soknix te yalal te plata te ya yichʼ pasel-a te chʼin tazaetik, jaʼ te jujun chʼin tazae. 18 La yal te jayeb yalal te lekil oro te ya yichʼ pasel-a te skajtajib schikʼojibal pom sok te señail te scarreta te Dios, te jaʼ skʼoplal te querubinetik te slichʼoj xikʼik te jich ya yaxintesik te skaxaul chapbilkʼop yuʼun te Jehová. 19 Jich la yal te David: «Jaʼ la stojobteson te Jehová sok la yakʼbon jpʼijil yuʼun ya jtsʼibay jilel ta jun spisil te bintik ya skʼan ya yichʼ pasele».

20 Jich yuʼun, te David jich la yalbey te Salomón te snichʼane: «Ayukme yip awoʼtan, mame xchebaj awoʼtan sok aʼtejanme. Mame xnijk awoʼtan sok mame xiwat, melel te Jehová Dios, te Dios kuʼun, sjokinojatme. Maʼyuk bin-ora ya yijkitayat sok maʼyuk bin-ora ya spijtesat. Yame sjokinat jaʼto te kʼalal ya xjuʼ ta pasel spisil te aʼtelil ta sna te Jehová. 21 Jichme chapal te bitʼil ay te jujuntsojb sacerdoteetik sok levitaetik ta swenta spisil te aʼtelil te ya skʼan pasel ta sna te smelelil Diose. Ayme j-aʼteletik awuʼun te spisil yoʼtan ya skʼan ya x-aʼtejik sok te ya snaʼik spasel spisil ta chajp aʼtelil soknix te jwolwanejetik sok spisil te yajwalul te lume, yame schʼuunik spasel spisil te mantaliletik ya awale».