Habacuc
2 Ta jujun kʼajkʼal ayon ta jkanan
sok ya jtejkʼan jba ta sba te tsʼajkʼetik.
Wikʼil jsit ya kakʼ jba yuʼun ya jnaʼ-a te bin ya yalbon*
sok jich ya jnaʼ-a te bin ya jsutbey te kʼalal ya stojobteson.
2 Tey-abi, te Jehová jich la yalbon:
«Tsʼibaya te bin la awil ta najalsitil sok tsʼibaya ta lek ta lejchel ton,*
yuʼun jich te machʼa ya skʼopon ta tulan ma chujkuluk ya yaʼiy skʼoponel-a.
3 Melel ayto skʼan yuʼun ya xkʼot skʼajkʼalel yuʼun ya xkʼot ta pasel te najalsitil,
sok oranax yak ta noptsajel* tal skʼajkʼalel, yuʼun-nix ya xkʼot ta pasel-a.*
Manchukme jich yilel te ma xkʼot ta pasel ta orae, ¡mame xlujbat ta smaliyel!
Yananixme xkʼot ta pasel-a.
¡Maba ya xjalaj!
4 Ilawil te machʼa ya stoy sbae:
maba toj te bin ay ta yoʼtan.
Pero, te machʼa toj yoʼtan ya xkuxin ta swenta te jun yoʼtane.*
5 Ta skaj te ya xloʼlaywan te vino,
te jtoyba-oʼtan ma skʼotes ta pasel te bin snopoj ya spase.
Bayal swiʼnal jich te bin-utʼil te Mukenal.*
Jich te bin-utʼil te lajel sok maʼyuk bin-ora ya xnoj schʼujt.
Yakto ta stsobel spisil te nacionetik
sok yak ta yuʼuninel spisil te lumetik.
6 ¿Mabal yakuk yalik pʼijil kʼopetik, te bintik ma jamaluk ta aʼiyel
sok kʼopetik te chujkulik ta ichʼbeyel swentail?
Jich ya yalik:
‹¡Oʼbol sba te machʼa ya stsob te bin ma jaʼuk yuʼun
—¿binto-ora ya yijkitay spasel?—
sok te yato yotsesxan sba ta betil!
7 ¿Mabal chʼayemuk awoʼtan-a te kʼalal ya xtal te machʼatik ay abet soke?
Yame xjajchik tal, ya stsakatik ta majel
sok ya awichʼ pojbeyel te bintik ay awuʼune.
8 Te bitʼil la apojbey te bintik ay yuʼun te nacionetik,
te yantik lumetik ya spojbat te bintik ay awuʼune,
melel la amalbey schʼichʼel te ants winiketik
sok la awutsʼin* te lumkʼinal,
te mukʼul lumetik sok te machʼatik nainemik tey-a.
9 ¡Oʼbol sba te machʼa ma stojiluk ya spas ganar stakʼin te ya stuuntes ta sna,
yuʼun toyol ya yakʼ te spechech
swenta ma xtaot yuʼun-a te tulan wokoliletik!
10 Te bin la anop ya apase la yakʼ ta kʼexlal te machʼatik ay awuʼun ta anae.
Te bitʼil bayal lumetik la ajin, jaʼatnix la ata amul yuʼun.
11 Jpʼij ton ya x-awun kʼalalto ta tsʼajkʼ
sok jaʼ ya xbajt sjakʼ te stsʼamteʼal te na.
12 ¡Oʼbol sba te machʼa ya smal chʼichʼ ta sjachel jun mukʼul lum
sok ya yakʼbey stsak yip ta swenta te bin ma stojiluk ta pasele!
13 ¡Ilawil! ¿Mabal jaʼuk te Jehová te jwolwanej yuʼun te chʼul-abatetik te ya yakʼ te tulan ya x-aʼtej te ants winiketik yuʼun ta patil tojolnax ya xkʼot
sok ya yichʼ lajinel ta kʼajkʼ te yaʼtelik sok te tojolnax ya xlaj yip te nacionetike?
14 Melel te balumilal ya xnoj ta ants winiketik te ya snaʼik ta swenta te yutsilal te Jehová
jich te bin-utʼil te jaʼ te ay ta mar.
15 ¡Oʼbol sba te machʼa ay bin ya yakʼbey yuchʼ te sjoʼtak
te kapbil sok ilinba, lab-oʼtanil yuʼun ya yakʼ xyakub-a
sok yuʼun ya yilbey-a te sbakʼetal te tʼanale!
16 Jkʼaxel ma xa awichʼ ichʼel ta mukʼ sok ma xa awichʼ albeyel awutsilal.
Jaʼnix jich uchʼa-euk sok akʼa ta ilel te maba awichʼoj circuncisión.*
Te copa te ay ta swaʼel skʼab te Jehová yame xkʼot ta atojol
sok te awutsilale yame yichʼ kʼexlaltesel ta jkʼaxel.
17 Te bitʼil la awutsʼin* te Líbano jichnix ya xkʼot ta atojol-euk
sok te jinel te la xiʼik te chambalametik jaʼnix jich ya xkʼot ta atojol,
melel la amalbey schʼichʼel te ants winiketik
sok la awutsʼin te lumkʼinal,
te mukʼul lumetik sok te machʼatik nainemik tey-a.
18 ¿Aybal skʼoplal ya xkʼot te lokʼomba te pasbile?
¿Bin-utʼil ya xjuʼ ya skoltayat te lokʼomba te pasbil ta ultesbil takʼin
sok te machʼa ya yakʼ ta nopel lotiletik?
Te jpaslokʼombaetik ya yakʼ smukʼul yoʼtanik
ta stojol te diosetik te ma xtuunik sok te ma xkʼopojik.
19 ¡Oʼbol sba te machʼa ya yalbey te xejtʼelul teʼ «¡Wikʼa asit!»,
o te ya yalbey «¡Wikʼa asit! ¡Nojptesawotik!» jpʼij ton te ma xkʼopoje!
¡Ilawil! Potsbilik ta oro sok ta plata,
pero ma xyichʼik ikʼ.
20 Yan stukel te Jehová ay ta schʼul templo.
¡Akʼa chʼabukik ta kʼop spisil te ants winiketik ta stojol!›».