Yaʼtel te Jpuk-kʼopetik
11 Te jpuk-kʼopetik sok te hermanoetik te ayik ta Judea jaʼnix jich la yaʼiyik stojol te la schʼuunikix skʼop Dios te jyanlumetike. 2 Jaʼ yuʼun, te kʼalal mo bael ta Jerusalén te Pedroe, tijot ta kʼop yuʼun te machʼatik ya skoltaybeyik skʼoplal te circuncisione.* 3 Jich la yalbeyik: «Ochat ta sna winiketik te maba yichʼojik circuncisión* sok la ajokinlan ta weʼel». 4 Jich yuʼun, te Pedro jajch scholtiklanbey yaʼiyik te bin kʼot ta pasele. Jich la yal:
5 «Te kʼalal yakon ta skʼoponel Dios ta mukʼul lum Jope, ay bin la kil ta najalsitil,* jich yilel te bin-utʼil mukʼul sábana pakʼ te pasbil ta lino te likbil ta schanebal schikin te yak ta koel tal ta chʼulchane, tey jul te banti ayon-ae. 6 La jtʼojan jsit ta yilel ta sba te sábana pakʼe, ay la kil chambalametik tey-a te chaneb yokik, jtiʼawal chambalametik, chambalametik te staslajan ya xbeenik ta lum sok jaʼmal mutetik te ya xwilik ta chʼulchane. 7 Jaʼnix jich ay machʼa la kaʼiy te jich la yalbone: ‹¡Jajchan, Pedro, mila atiʼ!›. 8 Pero, jich la kalbey: ‹Maʼuk, Kajwal, maʼyuk bin-ora jweʼoj te bin ma lekuk skʼoplal o te boloben skʼoplale›. 9 Te machʼa kʼopoj tal ta chʼulchan jich la yalbon ta schebal buelta: ‹Te bin lekubenix skʼoplal yuʼun te Diose ma xa awal te ma lekuke›. 10 Oxeb buelta jich kʼot ta pasel, tey-abi spisil la yichʼ ikʼel moel ta chʼulchan yan buelta. 11 Ta yorailnix-abi, oxtul winiketik la yichʼik tikunel tal k’alalto ta Cesarea yuʼun ya sleonik, jich kʼotik ta na te banti jmajanojkotik-ae. 12 Te chʼul espíritu* la yalbon te manchuk xchebetuk koʼtan ya jokinlan baele. Jaʼnix jich la sjokinonik bael te waktul kermanotaktik ini, jich ochotik ta sna te winike.
13 »La scholbotik kaʼiykotik te la yil jtul chʼul-abat ta sna sok te jich albot yuʼune: ‹Tikuna bael chaʼoxtul winiketik ta Jope yuʼun ya yikʼik tal te Simón te jaʼnix jich naʼbil sba bitʼil Pedro, 14 jaʼme ya yalbat awaʼiy te bin-utʼil ya xjuʼ ya ata akolel sok spisil te machʼatik ay ta anae›. 15 Pero, te kʼalal jajchon ta kʼope, jul ta stojolik te chʼul espíritu* jich te bin-utʼil jul ta jtojoltik ta sjajchibale. 16 Ta yorail-abi jul ta koʼtan te bin la yalulan te Kajwaltike: ‹Te Juan la yakʼbeyex awichʼik jaʼ* ta swenta jaʼ, yan te jaʼexe yame awichʼik jaʼ ta swenta chʼul espíritu›.* 17 Jich yuʼun, teme yakik ta akʼbeyel yuʼun Dios te majtanil te la kichʼtik akʼbeyel-euk ta swenta te la jchʼuuntikix te Kajwaltik Jesucristoe, ¿machʼaon-a te ya jmakbey sbe te Diose?».
18 Te kʼalal la yaʼiyik stojol ini, maʼyuk bin la yalikix yuʼun-a sok la yalbeyik yutsil skʼoplal te Diose. Jich la yalik: «¡Aʼiya awaʼiy jiche, jaʼnix te Dios te ya yakʼ sujtes yoʼtanik te jyanlumetik yuʼun jich ya sta skuxlejalik!».
19 Te machʼatik pujkik bael ta skaj te utsʼinel te jajch ta swenta te Esteban kʼotik kʼalal ta Fenicia, Chipre sok Antioquía. Pero, jaʼnax la scholbeyik skʼop Dios te judioetike. 20 Ay chaʼoxtul winiketik te talemik ta skʼinal Chipre sok ta lum Cirene bajtik ta Antioquía, jajch scholbeyik skʼop Dios te ants winiketik te ya xkʼopojik ta griego sok la scholbeyik yaʼiy te lek yachʼil kʼop ta swenta te Kajwaltik Jesús. 21 Jaʼnix jich jokinbilik yuʼun te Jehová* sok bayal ta tul ants winiketik la schʼuunik sok la sujtes yoʼtanik ta stojol te Kajwaltike.
22 Te kʼalal la yaʼiy stojol te congregación te ay ta Jerusalén te bin yak ta kʼoel ta pasele, jich la stikunik bael te Bernabé ta Antioquía. 23 Te kʼalal kʼot tey-a te Bernabé, la yil te slekil yoʼtan Dios te ma snujpʼuk ya kichʼtike, akʼbot bayal stseʼelil yoʼtan sok la stijbey yoʼtan ta spisilik te junuk yoʼtan ya yakʼ sbaik ta stojol te Kajwaltik sok yip yoʼtanik sok spisil yoʼtanik, 24 melel te Bernabé jaʼ jtul winik te lek yoʼtan, nojel ta yoʼtan te chʼul espíritu* sok bayal schʼuunel yoʼtan. Kʼax bayal ta tul ants winiketik jajch schʼuunik te Kajwaltike. 25 Jich yuʼun bajt ta Tarso ta sleel te Saulo, bayuk la sle. 26 Te kʼalal la stae, la yikʼ bael ta Antioquía. Jun jaʼbil la stsob sbaik sok te congregación sok bayal ta tul ants winiketik la snojptesik. Ta Antioquía jaʼ te banti sbabial buelta la sbiilinik jchʼuunjeletik yuʼun Cristo* te jnopojeletik te jaʼnix akʼbotik snaʼ yuʼun te Diose.
27 Ta yorail-abi ay chaʼoxtul j-alwanejetik ta Jerusalén te koik bael ta Antioquía. 28 Ay jtul j-alwanej te Ágabo sbiil la yal ta swenta chʼul espíritu* te nopol* ya xtal tulan wiʼnal ta spamal te balumilale, jaʼ-abi kʼot ta pasel ta skʼajkʼalel te Claudio. 29 Jich yuʼun, te jnopojeletik la staik ta nopel te ya stikunik koltayel ta stojol te hermanoetik te ayik ta Judea, jaʼ chikan te bin-utʼil ya xjuʼ yuʼunik ta jujuntule. 30 Jich la spasik. La stikunik bael te koltayel ta stojol te ancianoetik, jaʼ la yakʼbeyik bael ta skʼab te Bernabé sok te Saulo.