2 Crónicas

14 Jich te Abías way sbakʼetal sok te antiguo smeʼ stat sok la smukik ta Mukʼul lum yuʼun David. Tey-abi, jaʼ och jilel ta ajwalil te Asá, te snichʼane. Ta skʼajkʼalel te Asá ayin lamalkʼinal* lajuneb jaʼbil ta skʼinalik.

2 Te Asá jaʼ la spas te bintik lek sok te bintik toj ya yil te Jehová te Dios yuʼune. 3 La slokʼes te skajtajib chikʼbil majtaniletik yuʼun te diosetik yuʼun te jyanlumetik sok te toyol awilaletik, la swuytiklan te balal tonetik sok la sjintiklan te chʼul teʼetik yuʼun Aserá.* 4 Jaʼnix jich la yalbey te ants winiketik yuʼun Judá te akʼa sleik te Jehová te Dios yuʼun te antiguo smeʼ statik sok te yakuk schʼuunik spasel te Ley sok te mantaliletik yuʼune. 5 Jich yuʼun la slokʼes te toyol awilaletik sok te skajtajib schikʼojibal pom te ayik ta mukʼul lumetik yuʼun Judá, jich ayin lamalkʼinal yuʼunik te ants winiketik te kʼalal wentainwane. 6 Ta swenta te ayin lamalkʼinal ta skʼinalik la spas mukʼul lumetik ta Judá te joytaybilik ta tsʼajkʼetik te yichʼoj lek yip. Ta yorail-abi, maʼyuk machʼa la yakʼbey sba guerra sok, melel akʼbot skux yoʼtan yuʼun te Jehová. 7 Te Asá jich la yalbey te Judá: «Yame jpastik te mukʼul lumetik ini sok yame joytaytik ta tsʼajkʼetik, yame kakʼbeytik toyol tsʼajkʼetik, yame kakʼbeytik puertaetik* sok skʼatal teʼel. Te jkʼinaltik ayto ta jkʼabtik ta swenta te jleojtik te Jehová te Dios kuʼuntike. Ta swenta te jleojtik te Diose, yakʼojbotik lamalkʼinal* ta bayuk». Jich lek juʼ yuʼun spasel spisil te aʼtelil la spase.

8 Te Asá ay 300 mil ta tul soldadoetik yuʼun ta Judá te chapalik sok mukʼul majkilaletik yuʼunik sok slanzaik. Ta skʼinal Benjamín ay 280 mil ta tul winiketik te ay yipik ta yakʼel guerra sok ay chʼin majkilaletik* yuʼunik soknix te chapalik sok stʼimalteʼik.

9 Ta patil, te Zérah te etiope-winik tal yakʼbey guerra te Asá, yikʼoj tal jun millón ta tul soldadoetik sok 300 carretaetik yuʼun guerra. Te kʼalal kʼot ta Maresá, 10 te Asá lokʼ yakʼbey guerra te Zérah, sok la schol sbaik ta yakʼel guerra ta spamlej yuʼun Zefata te ay ta stsʼeel Maresá. 11 Te Asá la skʼanbey wokol te Jehová te Dios yuʼun sok jich la yalbey: «Kajwal, Jehová, te jaʼate pajal ya akoltay te machʼatik bayalik ta tul sok te machʼatik ma bayalike. Jehová Dios kuʼuntik, koltayawotik, melel ay smukʼul koʼtantik* ta atojol sok jaʼ ta swenta abiil te talotik ta yakʼbeyel guerra te soldadoetik ini te kʼax bayalike. Jehová, jaʼat Diosat kuʼuntik. Mame xa awakʼ stsalat winiketik te jaʼnax pasbilik ta tsʼubil lum».

12 Jich yuʼun, te Jehová la stsal te etiopeetik ta stojol te Asá sok te Judá, jich lokʼik bael ta anel te etiopeetike. 13 Te Asá sok te swiniktak la snutsik bael te etiopeetik kʼalalto ta Guerar, la smilik te etiopeetik jaʼto te kʼalal maʼyuk machʼa kuxul jil yuʼunike, melel te Jehová sok te soldadoetik yuʼune la stsalik te etiopeetik. Tey-abi, te winiketik yuʼun Judá bayal la spojik tal biluketik. 14 Jaʼnix jich la yochintayik spisil te mukʼul lumetik te ayik ta sjoyobal te Guerar, melel te ants winiketik och xiwel ta yoʼtanik ta stojol te Jehová. La spojik tal spisil te biluketik yuʼun te mukʼul lumetik, melel bayal bintik ay yuʼunik. 15 Jaʼnix jich la yochintaybeyik te snailpakʼ te machʼatik ay schambalamik, la spojik tal bayal ta kojt tuminchijetik sok camelloetik. Tey-abi sujtik tal ta Jerusalén.