2 Crónicas
17 Tey-abi, jaʼ och jilel ta ajwalil te Jehosafat, te snichʼane, sok la yakʼbeyxan yichʼ yip te wentainel yuʼun ta Israel. 2 La yakʼ bayal soldadoetik ta mukʼul lumetik yuʼun Judá te joytaybilik ta tsʼajkʼetik te yichʼoj lek yip. Jaʼnix jich la yakʼ soldadoetik ta skʼinal Judá sok ta mukʼul lumetik yuʼun Efraín te la yuʼunin te Asá te state. 3 Te Jehová maba la yijkitay te Jehosafat, melel jaʼnix jich la spas-euk te bin la spas te David te antiguo state, ma jaʼuk la stʼun te Baaletike. 4 Jaʼ la sle te Dios yuʼun te state sok jaʼ la schʼuun spasel te mantaliletik yuʼune ma jaʼuk la stʼun te bintik la spas te lum Israel. 5 Te Jehová la yakʼbey yichʼ yip te wentainel te ay ta skʼabe. Spisil te yajwalul Judá ma la skom sbaik ta yakʼbeyel smajtan te Jehosafat, jich ayin skʼulejal sok bayal yutsilal. 6 Sok yip yoʼtan la stʼun te beetik yuʼun te Jehová. Jaʼnix jich la slokʼes te toyol awilaletik sok te chʼul teʼetik yuʼun Aserá ta Judá.
7 Te kʼalal ayix oxeb jaʼbil ta ajwalil-a te Jehosafat la stikun ta ikʼel te machʼatik yichʼoj mukʼ yaʼtelik yuʼune jaʼik te Ben-Hail, Abdías, Zacarías, Netanel sok te Micaya swenta ya xnojpteswanik ta mukʼul lumetik yuʼun Judá. 8 Jokinbilik yuʼun te levitaetik ini: te Semaya, Netanías, Zebadías, Asahel, Semiramot, Jehonatán, Adonías, Tobiya sok te Tob-Adonías. Jaʼnix jich jokinbilik yuʼun te Elisamá sok te Jehoram te jaʼik sacerdoteetik. 9 Jajchik ta nojpteswanej ta Judá, yichʼojik bael te libro yuʼun te Ley yuʼun te Jehová. La sbeentayik spisil te mukʼul lumetik yuʼun Judá ta snojptesel te ants winiketike.
10 Spisil te ajwaliletik te ayik ta sjoyobal te skʼinal Judá och xiwel ta yoʼtanik ta swenta te Jehová te jich ma la yakʼbeyik guerra te Jehosafat. 11 Te filisteoetik la yichʼbeyik tal majtaniletik sok takʼin te Jehosafat swenta jich kʼot te bitʼil spatanik. Te arabeetik la yichʼbeyik tal 7 mil 700 ta kojt tat tuminchijetik sok 7 mil 700 ta kojt tat tentsunetik.
12 Te Jehosafat bejbe* la stsakxan yip te wentainel yuʼune. La spasxan mukʼul tsʼajkʼetik sok mukʼul lumetik ta Judá te banti ya skʼej te weʼelile. 13 La spas bayal ta chajp aʼteliletik ta mukʼul lumetik yuʼun Judá sok ay soldadoetik yuʼun ta Jerusalén te ay yipik ta yakʼel guerra. 14 Jujuntsojb ayik jaʼ chikan te jujunchajp stsʼumbal te antiguo smeʼ statike. Ta stsʼumbal Judá jaʼik ini te capitanetik te swentainojik ta jujun mil ta tul soldadoetik: jaʼ te capitán Adná te jokinbil yuʼun 300 mil ta tul winiketik te ay yipik ta yakʼel guerra. 15 Te Adná jaʼ swentainoj te capitán Jehohanán te jokinbil yuʼun 280 mil ta tul soldadoetik. 16 Te Adná jaʼnix jich jaʼ swentainoj te Amasíah snichʼan Zicrí, te spasemal yoʼtan la sjap sba ta abatinel ta stojol te Jehová, jokinbil yuʼun 200 mil ta tul winiketik te ay yipik ta yakʼel guerra. 17 Ta stsʼumbal Benjamín jaʼ te Eliadá, te jaʼ jtul winik te ay yip ta yakʼel guerra, jokinbil yuʼun 200 mil ta tul winiketik te chapalik sok stʼimalteʼik sok smajkilik. 18 Te Eliadá jaʼ swentainoj te Jehozabad te jokinbil yuʼun 180 mil ta tul winiketik te chapalik ta yakʼel guerra. 19 Jaʼik-abi te ya x-abatinik ta stojol te ajwalil, parteme-a te la yakʼ te ajwalil ta mukʼul lumetik te joytaybilik ta tsʼajkʼetik te yichʼoj lek yip ta spamal skʼinal Judá.