2 Crónicas

18 Manchukme ayin skʼulejal sok bayal yutsilal te Jehosafat, la snial mamalin* te Acab. 2 Cheʼoxeb jaʼbil ta patil, te Jehosafat ko bael ta yilel te Acab te ay ta Samaria. Te Acab la yakʼ ta chikʼbil majtanil tuminchijetik sok wakaxetik ta swenta te Jehosafat sok te ants winiketik te jokinbil yuʼune. Jaʼnix jich la stijbey yoʼtan te Jehosafat te yakuk xbajt yakʼbeyik guerra te Ramot-Galaad. 3 Jich yuʼun, te Acab te ajwalil yuʼun Israel jich la yalbey te Jehosafat te ajwalil yuʼun Judá: «¿Yabal ajokinon bael ta Ramot-Galaad?». Jich la yal te Jehosafat: «Yame jokinat bael, yame sjokinat bael te lum kuʼun sok yame skoltayat ta yakʼel guerra».

4 Pero, te Jehosafat jich la yalbey te ajwalil yuʼun Israel: «Awokoluk, jojkʼoybeya nailuk te Jehová te bin xchie». 5 Jich yuʼun, te ajwalil yuʼun Israel la stsob tal te j-alwanejetik te 400 ta tul sok jich la yaltiklanbey: «¿Yabal xboonkotik ta yakʼbeyel guerra te Ramot-Galaad, o maʼuk?». Jich albot yuʼun te j-alwanejetik: «Moan bael, te smelelil Dios yame yakʼbat ta akʼab».

6 Jaʼ yuʼun, jich la yal te Jehosafat: «¿Mabal ayuk jtuluk j-alwanej yuʼun Jehová liʼi? Ya xjuʼ ya kalbeytik te akʼa sjojkʼoybey-euk te Diose». 7 Te ajwalil yuʼun Israel jich la yalbey te Jehosafat: «Ayto jtulxan te ya xjuʼ ya kalbeytik te akʼa sjojkʼoybey te Jehová, pero mero jkontra, melel maʼyuk bin lek ya yal te ya xkʼot ta pasel ta jtojol, spisil-ora jaʼnax ya yal te bintik chopol.* Jaʼ te Micaya snichʼan Imlá». Pero, te Jehosafat jich la yal: «Ajwalil, ma snujpʼuk te jich ya xkʼopojate».

8 Jich yuʼun, te ajwalil yuʼun Israel la stikun ta ikʼel jtul te machʼa yichʼoj mukʼ yaʼtel ta stojol sok jich la yalbey: «Baan, ikʼa tal ta oranax te Micaya snichʼan Imlá». 9 Te ajwalil yuʼun Israel sok te Jehosafat, te ajwalil yuʼun Judá, nakalik ta yochibal te Samaria te banti ya yichʼ majel te sit awal tsʼunubil. Ta jujuntul nakajtik ta smukʼul naktajibik sok slapojik te skʼuʼik yuʼun ajwalil. Spisil te j-alwanejetik te tekʼajtik ta stojolike yakik ta yalel te bin ya xkʼot ta pasele. 10 Jich yuʼun, te Sedequías snichʼan Kenaaná la spas xulubiletik ta hierro sok jich la yal: «Jich ya yal te Jehová: ‹Jaʼme ya aluch* bael te sirioetik sok te xulubiletik ini, jaʼto teme la amiltiklan spisile›». 11 Spisil te yantik j-alwanejetik jich jun-nax yakik ta yalel: «Moan bael ta Ramot-Galaad, yame awaʼiy tsalaw. Te Jehová yame yakʼbat ta akʼab».

12 Te winik te bajt yikʼ tal te Micaya jich la yalbey: «Spisil te j-alwanejetik lek te bin yakik ta yalel ta stojol te ajwalile. Awokoluk, jichme xa awal-euk, lekuk te bin ya awalbey skʼoplale». 13 Pero, jich la yal te Micaya: «Jamal ya kalbat ta stojol Jehová te kuxul Dios te jaʼme ya kal te bin ya yalbon te Dios kuʼune». 14 Jich bajt te Micaya ta stojol te ajwalil sok jich jojkʼoybot yuʼun: «Micaya, ¿yabal xbootik ta yakʼbeyel guerra te Ramot-Galaad, o maʼuk?». Jich la yal ta oranax: «Moan bael, yame awaʼiy tsalaw. Yame awichʼik akʼbeyel ta akʼabik». 15 Te kʼalal jich la yaʼiy stojol te ajwalil, jich la yal: «¿Jayebto buelta ya kalbat te ya skʼan ya awalbon ta jamal te bin smelelil ta swenta sbiil te Jehová?». 16 Jaʼ yuʼun, jich la yal te Micaya: «Ya kil te pujkem ta witstikil spisil te israeletik jich te bin-utʼil tuminchijetik te maʼyuk jkanan yuʼunike. Jaʼ yuʼun, jich ya yal te Jehová: ‹Maʼyuk yajwalik. Junuk yoʼtan akʼa sujtukik bael ta snaik ta jujuntul›».

17 Jich yuʼun, te ajwalil yuʼun Israel jich la yalbey te Jehosafat: «¿Mabal lajuk kalbat ‹Maʼyuk bin lek ya yal te kʼalal ya jojkʼoybey te bin ya xkʼot ta pasel ta jtojol, jaʼnax ya yal te bintik chopol›?».*

18 Jich la yal te Micaya: «Ta ora ini aʼiya awaʼiy te bin ya yal te Jehová. La kil te Jehová te nakal ta smukʼul naktajib sok spisil te chʼul-abatetik te tekʼajtik ta swaʼel sok ta skʼexam.* 19 Jich la yal te Jehová: ‹¿Machʼa ya xjuʼ ya sloʼlay te Acab te ajwalil yuʼun Israel yuʼun ya xmo bael ta Ramot-Galaad sok te tey ya xlaj-ae?›. Yanyantik-a te bin yakik ta yalel ta jujuntule. 20 Tey-abi, jtul chʼul-abat noptsaj* ta stojol te Jehová sok jich la yalbey: ‹Joʼon ya jloʼlay›. ‹¿Bin-utʼil ya aloʼlay?›, xchi te Jehová. 21 Jich la yal te chʼul-abat: ‹Yame kakʼ te ya yalik lotil kʼopetik te j-alwanejetik yuʼune›. Jaʼ yuʼun, jich la yalbey: ‹Ya xjuʼ awuʼun sloʼlayel, lekme ya xlokʼ awuʼun. Baan, pasa te bin la awale›. 22 Jaʼ yuʼun, te Jehová la yakʼ te ya yalik lotil kʼopetik te j-alwanejetik awuʼune, pero ta smelelil te Jehová yalojix te ya ata awokole».

23 Te Sedequías snichʼan Kenaaná noptsaj* ta stojol te Micaya, la spakʼbey ta majel yelaw sok jich la yalbey: «¿Jaʼbal ya akʼan ya awal te la yijkitayon te chʼul espíritu* yuʼun te Jehová yuʼun jaʼ bajt skʼoponat?». 24 Te Micaya jich la sjakʼ: «Jaʼtome ya anaʼ-a te bin kʼajkʼalil ya xbajt anakʼ aba ta yutil cuarto». 25 Jaʼ yuʼun, jich la yal te ajwalil yuʼun Israel: «Ikʼaik bael te Micaya sok akʼaik ta skʼab te Amón, te jwolwanej yuʼun te mukʼul lum, soknix ta skʼab te Joás, te snichʼan te ajwalil. 26 Jichme xa awalbeyik: ‹Jich ya yal te ajwalil: «Otsesaik ta chukojibal te winik ini sok jtebnax pan sok jaʼ xa awakʼbeyik, jaʼto teme sujton tal ta tsalawe»›». 27 Pero, jich la yal te Micaya: «Teme la awaʼiy tsalawe, yuʼunme ma jaʼuk la skʼoponon te Jehová». Jich la yalxan: «Jaʼex, ants winiketik, ichʼaikme ta wenta-euk».

28 Jich yuʼun, te ajwalil yuʼun Israel sok te Jehosafat, te ajwalil yuʼun Judá, moik bael ta Ramot-Galaad. 29 Jaʼ yuʼun, te ajwalil yuʼun Israel jich la yalbey te Jehosafat: «Te joʼone yame jel bael te jkʼuʼ te kʼalal ya x-ochon ta guerra, yan te jaʼate jaʼme ya alap bael te akʼuʼ yuʼun ajwalil». Jich la sjel te skʼuʼ te ajwalil yuʼun Israel, ochik bael ta guerra. 30 Jich yuʼun, te ajwalil yuʼun Siria jich yalojbeyix ta mantal-a te capitanetik yuʼun te carretaetik: «Mame machʼauknax ya awakʼbeyik guerra ni jaʼuk te soldadoetik sok te capitanetik yuʼun te soldadoetik, jaʼnaxme te ajwalil yuʼun Israel». 31 Jaʼnax te kʼalal la yilik te Jehosafat te capitán yuʼun te carretaetik, jich la yalik: «Jaʼme te ajwalil yuʼun Israel». Jich bajt yakʼbeyik guerra. Te Jehosafat tulan jajch ta aw ta skʼanel koltayel, jich koltayot yuʼun te Jehová. Te Diose ta oranax la slokʼes bael ta stojol te skontratak. 32 Te kʼalal la yilik te capitanetik yuʼun te carretaetik te ma jaʼuk te ajwalil yuʼun Israel, oranax la yijkitayik snutsel.

33 Pero ay jtul winik te jichnax la stʼimuy bael te sflecha, la yejchentes te ajwalil yuʼun Israel te banti stsʼakoj sba te smajkil yoʼtane. Jich yuʼun, te ajwalil jich la yalbey te machʼa yak ta stijel te carreta yuʼune: «Sujtukotik bael, lokʼesawon bael ta yolil te guerrae, melel tulan la yejchentesonik». 34 Ta sjunal kʼajkʼal, tulan la yakʼbey sbaik te guerrae. Jaʼ yuʼun la skoltayik te ajwalil yuʼun Israel yuʼun ya stejkʼan sba ta scarreta, te sit yelaw ay ta stojol bael te sirioetik jaʼto ta mal kʼajkʼal. Te kʼalal malix bael-a te kʼajkʼale, laj te ajwalile.