2 Crónicas

19 Jich yuʼun, te Jehosafat te ajwalil yuʼun Judá lek sujt tal sok jun yoʼtan sujt tal ta sna* ta Jerusalén. 2 Te Jehú snichʼan Hananí, jaʼ te winik te ya yil najalsitil, bajt skʼopon te ajwalil Jehosafat sok jich la yalbey: «¿Yuʼunbal ya akuy te lek te ya akoltay te machʼatik chopolik* sok te kʼux ta awoʼtan te machʼatik ya spʼajik te Jehová? Jaʼ yuʼun, te Jehová ma lek yoʼtan ta atojol. 3 Pero ay bin lek ilbil ta atojol, melel la alajin te chʼul teʼetik yuʼun Aserá ta akʼinal sok la achajpan awoʼtan* yuʼun ya ale te smelelil Diose».

4 Te Jehosafat nainxan ta Jerusalén, tey-abi bajt yiltiklan yan buelta te machʼatik nainemik ta Beer-Seba kʼalalto ta witstikil yuʼun Efraín swenta ya stijbey yoʼtanik yuʼun ya yichʼikxan ta mukʼ te Jehová te Dios yuʼun te antiguo smeʼ statike. 5 Ay machʼatik la yakʼbey yaʼtel ta juecetik ta spamal te lum, tey ta jujun mukʼul lumetik yuʼun Judá te joytaybilik ta tsʼajkʼetik te yichʼoj lek yip. 6 Jich la yaltiklanbey te juecetik: «Ilame awilik ta lek te bin ya apasike, melel ma jaʼuk ta swenta jtul ants winik te ya xchajpanwanex, jaʼme ta swenta te Jehová. Jaʼme sjokinojex te kʼalal ya xchajpanwanexe. 7 Jich yuʼun xiʼaikme te Jehová. Tsajtayame* te bin ya apasike, melel te Jehová te Dios kuʼuntik jkʼaxel ma lek ya yil te bintik ma toj ta pasel, te tsabilnax te machʼa lek ya awilik sok te ya atsakik majtanil te kʼalal ya xchajpanwanexe».

8 Jaʼnix jich ta Jerusalén, te Jehosafat la stsa chaʼoxtul levitaetik sok sacerdoteetik soknix chaʼoxtul jolaletik yuʼun te jujunchajp stsʼumbal te antiguo smeʼ statik te ayik ta Israel swenta ya x-abatinik jich bitʼil juecetik ta stojol te Jehová sok yuʼun ya schajpanik te kʼopetik te ya xjajch yuʼunik te yajwalul te Jerusalén. 9 Jich albotik ta mantal yuʼun te Jehosafat: «Te kʼalal ya xchajpanwanex yame skʼan axiʼojik te Jehová, te jun awoʼtanik ta stojol sok te ya achʼuunbeyik smantal sok spisil awoʼtanik, 10 jich te kʼalal ya xtal skʼanik chajpanel te awermanotakik te nainemik ta yantik mukʼul lumetik ta skaj te ay machʼa ya smilik o ay bin ya sjojkʼoyik ta swenta jun ley, ta swenta jun mantalil, ta swenta leyetik o ta swenta te bintik schapoj te Dios, yame skʼan ya anojptesik yuʼun jich ma sta smulik ta stojol te Jehová, melel teme ma jichuk ya apasike, yame x-ilin ta atojolik sok ta stojol te awermanotakike. Jaʼ yuʼun, jichme ya skʼan ya apasik yuʼun maba ya ata amulik. 11 Liʼme ay te Amarías te jwolwanej yuʼun te sacerdoteetik, jaʼme ya swentainex yuʼun spisil te aʼtelil yuʼun te Jehová. Te Zebadías snichʼan Ismael jaʼme jwolwanej ya xkʼot ta stsʼumbal Judá ta swenta spisil te aʼtelil yuʼun te ajwalil. Te levitaetik jaʼme ya skoltayex. Ayukme yip awoʼtanik sok aʼtejanikme, akʼame jokinotuk yuʼun Jehová te machʼa ya spas te bin leke».