Habacuc
1 Jaʼ ini jaʼ te bin la yichʼ albeyel te Habacuc* ta swenta jun najalsitil:*
2 Kajwal, Jehová, ¿jayebto buelta ya kawtayat ta skʼanel koltayel yuʼun ya awaʼiybon te jkʼope?
¿Jayebto buelta ya jkʼanbat koltayel yuʼun ya awakʼon ta libre ta stojol te bintik chopole?*
3 ¿Bin yuʼun ya awakʼbon kil te bintik chopole?*
¿Bin yuʼun ya awakʼ te ya kichʼkotik utsʼinel?*
¿Bin yuʼun ya awakʼbon kil utsʼinel sok jinel?
¿Bin yuʼun ay bayal majtamba sok jpaskʼopetik?
4 Ta swenta-abi ya xchʼay yip te ley
sok maʼyuk bin-ora ya yichʼ pasel te bin stojile.
Te machʼatik chopolik* ya sjoytayik te machʼatik toj yoʼtanik,
jaʼ yuʼun ma stojiluk te bin ya yichʼ chajpanele.
5 «¡Ilawilik te nacionetik sok chʼama awaʼiyik ta lek!
Yanuknaxme ya awilik-a sok ayukme xiwel ta awoʼtanik,
melel ay bin ya xbajt kʼotuk ta pasel
te maba ya achʼuunik manchukme ya awichʼik cholbeyel awaʼiyik.
6 Ya xbajt jtejkʼan ta asitik te caldeoetik,
jun nación te kʼax chopol yoʼtan* sok ya spas te bin ya skʼan yoʼtane.
Ya spojtiklanik lumkʼinaletik
sok ya yuʼuninik naetik te ma jaʼuk yuʼunike.
7 Kʼax xiʼbantik sbaik,
ya xchajpanwanik jich te bitʼil ya skʼan yoʼtanik.
8 Te caballoetik yuʼunik jaʼ kʼaxtoxan ya x-animajik jich te bin-utʼil te leopardo-chojetik.
Sok mero ya xtiʼawanik jich te bin-utʼil te jaʼmal tsʼiʼetik te ya xbeenik ta ajkʼabal.
Te caballoetik yuʼun guerra oranax yakik ta talel.
Te caballoetik yuʼunik namal* yakik ta talel.
Ya xwilik talel jich te bin-utʼil te águila kʼalal ya stsak te sweʼele.
9 Yakʼoj ta yoʼtanik yuʼun ya x-utsʼinwanik.*
Kʼalal ya stsob sbaik jich ya xkʼotik te bin-utʼil ikʼ te ya xtal te banti ya xlokʼ tal te kʼajkʼale.
Te machʼatik ya schukik bael kʼax bayalik jich te bin-utʼil te jiʼ.
10 Ya slabanik te ajwaliletik
sok ya stseʼlayik te machʼatik yichʼoj mukʼ yaʼtelik.
Ya stseʼlayik spisil te tsʼajkʼetik.
Ya sbusanik lum yuʼun ya spas smoibik ta yochintayel te lume.
11 Jich yakik ta talel te bin-utʼil ikʼ sok ya sbeentayik tal te lumkʼinal.
Pero ya sta smulik yuʼun,
melel ya yalik te jaʼ ya x-akʼbotik yuʼelik yuʼun te sdiosike».*
12 Kajwal, Jehová, ¿yuʼunbal ma sbajteluk kʼinal ayat?
Chʼul Dios kuʼun, te jaʼate maba ya xlajat.*
Jehová, jaʼat la awakʼ ta swentaik yuʼun ya xkʼot ta pasel te ichʼel ta kʼop awuʼune.
Mukʼul Ton kuʼun, jaʼat la atsatiklan yuʼun ya yakʼik castigo.*
13 Te bitʼil kʼax toj te asite maba ya akʼan ya awil te bintik ma lek
sok ya apʼaj te bintik chopole.*
Pero, ¿bin yuʼun-nix-a te lek ya awil te machʼatik ya xkontrainwanik
sok te maʼyuk bin ya awal kʼalal te machʼa chopol ya yutsʼin* te machʼa tojxan yoʼtane?
14 ¿Bin yuʼun ya awakʼ te jich ya yichʼik ilel te winiketik te bin-utʼil te chayetik ta mar,
te chambalametik te staslajan ya xbeenik sok te maʼyuk machʼa ya xwentainotik yuʼune?
15 Te jkontrainwanejetik* ya stsaktiklan lokʼel ta spisilik sok te slukojibal chay* yuʼunike.
Ya stsaktiklanik ta stsakojibal chay yuʼunik
sok ya stsobtiklanik ta stsakojibal chay.
Jaʼ yuʼun ya x-akʼbot stseʼelil yoʼtanik.
16 Jich yuʼun ya yakʼbeyik milbil majtaniletik te stsakojibal chay te ya yichʼ nitel
sok ya yakʼbeyik milbil majtaniletik* te stsakojibal chay yuʼunike,
ta swenta-abi bayalnax te bin ya sweʼik
sok bujtsʼan-nax ya yaʼiyik.
17 Jaʼ yuʼun, ¿aybal bin-ora jochol ya xjil te stsakojibal chay yuʼunike?*
¿Yabal slajinlan bael te nacionetike?