Te lek yach’il k’op ya yal te Juan

13 Te k’alal mato xkʼot skʼajkʼalel-a te Kʼin yuʼun Pascuae, te Jesús snaʼoj te kʼotix yorail te ya yijkitay jilel te balumilal ini yuʼun ya sujt bael ta stojol te Tatile. Kʼux la yaʼiy ta yoʼtan te machʼatik ay yuʼun ta balumilale, kʼux la yaʼiy ta yoʼtan kʼalalto ta slajibal. 2 Te kʼalal yakik ta weʼel ta mal kʼajkʼal-ae, te Judas Iscariote te snichʼan Simón akʼbilix ta yoʼtan yuʼun-a te Pukuj* te ya yakʼ ta kʼabal te Jesuse. 3 Te bitʼil snaʼojix-a te Jesús te akʼbilix ta skʼab yuʼun te Tatil spisil te bintik aye sok te talem ta stojol te Dios sok te ya sujtix bael ta stojole, 4 la stejkʼan sba te banti yak ta weʼele, la slokʼes te snajtil kʼuʼe, la stsak jun toalla sok la schuk ta schʼujt. 5 Tey-abi la yakʼ jaʼ ta jun vasija, jajch spoktiklanbey yok te jnopojeletik yuʼune sok la stakinteslanbey ta toalla te schukoj ta schʼujte. 6 Te kʼalal kʼot ta stojol te Simón Pedro, jich albot yuʼun: «Kajwal, ¿jaʼatbal ya apokbon te koke?». 7 Jich albot yuʼun te Jesús: «Ta ora ini, ma xkʼot ta awoʼtan te bin yakon ta spasele, pero patil ya xkʼot ta awoʼtan». 8 Jich la yal te Pedro: «Maʼyuk bin-ora ya kakʼbat apokbon te koke». Jich albot yuʼun te Jesús: «Teme maba ya jpokbat te awoke, maba kuʼunat». 9 Jich la yal te Simón Pedro: «Kajwal, mame jaʼuknax ya apokbon te koke, jaʼnix jich yame skʼan ya apokbon-euk te jkʼab sok te jole». 10 Jich albot yuʼun te Jesús: «Te machʼa atinemixe skojtol pokbilix, jaʼxanix ya skʼan pokbeyel te yoke. Te jaʼexe pokbilexix, manchukme maba ta apisilik». 11 Melel snaʼojix-a te machʼa ya x-akʼot ta kʼabal yuʼune. Jaʼ yuʼun, jich la yal: «Ma apisilukik te pokbilexixe».

12 Te kʼalal laj yoʼtan ta spoktiklanbeyel yok te jnopojeletike, la schaʼlap te snajtil kʼuʼe. Tey-abi bajt snajkan sba yan buelta te banti yak ta weʼele, jich la yaltiklanbey: «¿Yabal xkʼot ta awoʼtanik te bin la jpas ta atojolike? 13 Te jaʼexe Maestro sok Kajwal ya awalbonik, snujpʼ te jich ya awalbonik, melel joʼon-nix-a. 14 Teme joʼon la jpokbeyex awokik te bitʼil Awajwalonik sok te Maestroon awuʼunike, jaʼnixme jich ya skʼan ya apokbey aba awokik-euk. 15 Joʼonme la kakʼbeyex awilik, yuʼun jich ya apasbey abaik-euk te bin la jpas ta atojolike. 16 Jamal ya kalbeyex, te j-abate ma jaʼuk toyolxan ta stojol te yajwale, sok te machʼa tikunbil tale ma jaʼuk toyolxan ta stojol te machʼa tikunot tal yuʼune. 17 Te bitʼil anaʼojikix ini, tseʼelnaxme awoʼtanik yuʼun teme jich ya apasike. 18 Maba apisilik ya kalbeyex; ya jnaʼbey sba te machʼatik la jtsae. Pero ya skʼan te jich ya xkʼot ta pasel te bin tsʼibaybil ta sJun Dios: ‹Te machʼa jun-nax ya xweʼon soke la skontrainonix›, te xchie. 19 Ya kalbeyex ini te bitʼil mato kʼoem ta pasele, yuʼun jich te kʼalal ya xkʼot ta pasele ya achʼuunik te joʼon te albil skʼoplal ya xtale. 20 Jamal ya kalbeyex te machʼa ya yikʼ ta stojol te machʼa ya jtikune jaʼnix jich ya yikʼon-euk, te machʼa ya yikʼon ta stojole jaʼnix jich ya yikʼ-euk te machʼa la stikunon tale».

21 Te k’alal laj yoʼtan ta yalel ini, kʼaxto la smel yoʼtan te Jesús sok jich la yal: «Jamal ya kalbeyex te ay jtul ta awolilik te ya yakʼon ta kʼabale». 22 Te jnopojeletik jajch yilbey sba sitik, melel ma snaʼik te machʼa yak ta yalbeyel skʼoplal te Jesuse. 23 Ay jtul jnopojel te kʼux aʼiybil ta oʼtanil yuʼun te Jesús te ay ta stsʼeel ta weʼel soke. 24 Jich yuʼun, te Simón Pedro la spas seña ta sjol sok jich la sjojkʼoybey te jnopojel-abi: «¿Machʼa yak ta yalbeyel skʼoplal?». 25 Jich yuʼun, te jnopojel-abi la spajkan sba ta stan te Jesús sok jich la sjojkʼoybey: «Kajwal, ¿machʼa-a?». 26 Jich albot yuʼun te Jesús: «Jaʼ te machʼa ya kakʼbey te xejtʼelul pan te ya jmule». Te kʼalal smulojix-a te pane, la yakʼbey te Judas te snichʼan Simón Iscariote. 27 Te kʼalal la stsak te Judas te jxejtʼ pane, te Satanás och ta yoʼtan. Jaʼ yuʼun, jich albot yuʼun te Jesuse: «Te bin anopoj ya apase, pasame ta oranax». 28 Te machʼatik yakik ta weʼele maʼyuk jtuluk la snaʼ te bin yuʼun te jich la yalbeye. 29 Jich bitʼil te jaʼ yichʼoj yawil takʼin te Judase, ay machʼatik la skuyik te Jesús jich yak ta yalbeyel «Baan, mana tal te bintik ya xtuun kuʼuntik ta swenta te kʼine», o te jaʼ ay bin ya yakʼbey jtebuk te pobreetike. 30 Jich yuʼun, te kʼalal la stsak te jxejtʼ pane, oranax lokʼ bael. Ajkʼabalix-a.

31 Te kʼalal lokʼemix bael-a te Judase, jich la yal te Jesús: «Ta ora ini, la yichʼix yutsilal te sNichʼan te Winike,* sok la yichʼix yutsilal te Dios ta swenta te sNichʼan te Winike. 32 Jaʼnix ya x-akʼbot yutsilal yuʼun te Diose, sok oranaxme ya x-akʼbot te yutsilale. 33 Kal jnichʼnab, maba jalix kʼajkʼal ya jokinex. Yame aleonik; jichnix ya kalbeyex-euk te bin la kalbey te judioetik: ‹Ma xjuʼ ya xbaex te banti ya xboone›. 34 Ya kakʼbeyex yachʼil mantalil: talel kʼaxel kʼuxme xa awaʼiy aba ta awoʼtanik, jich te bin-utʼil kʼux ya kaʼiyex ta koʼtane, jaʼnixme jich talel kʼaxel kʼuxme xa awaʼiy aba ta awoʼtanik. 35 Jichme ya snaʼik spisil te ants winiketik te jaʼex jnopojelex kuʼun: teme talel kʼaxel kʼux ya awaʼiy aba ta awoʼtanike».

36 Jich la sjojkʼoy te Simón Pedroe: «Kajwal, ¿banti ya xbaat?». Jich albot yuʼun te Jesús: «Te banti ya xboon, ma xjuʼ ya atʼunon bael ta ora ini, pero yame atʼunon bael ta patil». 37 Jich la yal te Pedro: «Kajwal, ¿bin yuʼun te ma xjuʼ ya jtʼunat bael ta ora ini? Ya xjuʼ ya kakʼ jba ta lajel ta atojol». 38 Jich albot yuʼun te Jesús: «¿Te yalaj awakʼ aba ta lajel ta jtojol? Jamal ya kalbat, te kʼalal mato x-okʼ-a te tat mute, oxeb buelta amukojonix ta awoʼtan-a».