Eclesiastés

2 Jaʼnix jich la kal ta koʼtan: «Ya jpas prueba kil te bin ya skʼan koʼtan yuʼun ya kil bin ya jta sok-a». Pero la jta ta ilel te tojolnax-euk.

 2 Jich la kalbey skʼoplal te tseʼeje «¡Maʼyuk swentail!»,

sok jich la kalbey skʼoplal te bin ya skʼan te oʼtanile «¿Bin ya xtuun-a?».

3 La jmulanbey yutsilal te vino pero maba jelawon ta yuchʼel te chʼay spʼijil koʼtan yuʼun. Hasta la kakʼ jba ta spasel te bin ya spas te machʼa ma snaʼ kʼinal. La jkʼan kil bin-a te lekxan ya skʼan ya spas te ants winiketik te jayebnax kʼajkʼal kuxul ta yeʼtal chʼulchan. 4 La jpas mukʼul aʼteliletik. La jpas mukʼul naetik sok la jtsʼun tsʼusubiltik te jaʼ kuʼun kʼot. 5 La jpas yawil nichimetik sok la jtsʼun teʼetik ta sejpelsejp kʼinal, tey la jtsʼun bayal ta chajp teʼetik te ya yakʼ sit te ya xjuʼ ta loʼel. 6 La jpas mukʼul yawil jaʼetik yuʼun ya yichʼ akʼbeyel yaʼlel te teʼetik te yakikto ta chʼiele. 7 La jlexan bayal mosoetik sok criadaetik, ay mosoetik te ayinik* ta jna. Jaʼnix jich la jle bayal chambalametik —wakaxetik sok tuminchijetik—, jaʼ kʼaxemtoxan-a te bin-utʼil spisil te machʼatik nail kuxinik kuʼun ta Jerusalén. 8 La jtsob bayal plata sok oro, kʼulejaliletik te jaʼ yuʼun te ajwaliletik sok te yantik lumetik. La jtsob winiketik sok antsetik te ya snaʼik kʼayoj, jaʼnix jich ayin kuʼun te bin ya smulanbey yutsilal te snichʼnab te winiketik: jtul ants, jich, bayal antsetik. 9 Jich yuʼun mukʼ jkʼoplal kʼot, jaʼ kʼaxemtoxan-a te bin-utʼil spisil te machʼatik nail kuxinik kuʼun ta Jerusalén. Sjokinojon te pʼijil oʼtanil.

10 La kakʼbey spisil te bin la smulan te jsite. La kakʼbey spisil te bin la skʼan te koʼtane. Tseʼel koʼtan yuʼun te bitʼil tulan aʼtejemone, jaʼ jmajtan kʼot yuʼun spisil te tulan kaʼtele. 11 Pero, kʼalal jajch jnop ta koʼtan te yaʼtel jkʼab sok spisil te tulan aʼtelil jpasoje, la jta ta ilel te tojolnax spisil, jich kʼoem te ya jnutstik te ikʼe. Spisil te bintik ay liʼ ta balumilal jkʼaxel maʼyuk skʼoplal.

12 La jtʼojan jsit ta swenta te pʼijil oʼtanil, te bin jkʼaxel maʼyuk swentail sok te bol-oʼtanil. (Melel, ¿bin ya xjuʼ ya spas te winik te ya xtal ta spat te ajwalil? Jaʼnax ya spas te bin pasbilix-ae). 13 La kil te jaʼ lekxan skʼoplal te machʼa ay spʼijil yoʼtan te bin-utʼil te machʼa ma snaʼ kʼinal, jich bitʼil jaʼ lekxan te sakal kʼinal te bin-utʼil te ijkʼal kʼinal.

14 Te machʼa ay spʼijil yoʼtan wikʼil sit, yan stukel te machʼa maʼyuk spʼijil yoʼtan ya xbeen ta ijkʼal kʼinal. Pero la jta ta ilel te pajal te bin ya xkʼot ta stojolik. 15 Tey-abi, jich la kal ta koʼtan: «Te bin ya xkʼot ta stojol te machʼa maʼyuk spʼijil yoʼtan, jaʼnix jich ya xkʼot ta jtojol-euk». Ta skaj te la jta bayal spʼijil koʼtan, ¿bin kʼot ta lokʼel kuʼun-a? Jaʼ yuʼun, jich la kal ta koʼtan: «Jaʼ-abi tojolnax-euk». 16 Melel te machʼa pʼij yoʼtan sok te machʼa maʼyuk spʼijil yoʼtan maʼyuk bin-ora ya xbajt yichʼik naʼel. Nopol yame yichʼik chʼayel ta oʼtanil ta spisilik. Pajal ya xlajik te machʼa pʼij yoʼtan sok te machʼa maʼyuk spʼijil yoʼtan.

17 Jich yuʼun jajch jpʼaj te kuxlejalil, melel jich la kil te mel-oʼtantik sba spisil te bin ya yichʼ pasel liʼ ta balumilal; tojolnax spisil-abi, jich kʼoem te ya jnutstik te ikʼe. 18 Jajch jpʼaj spisil te bintik aʼtejemon yuʼun liʼ ta balumilal, melel ya kakʼbey jilel te machʼa ya xtal ta patil kuʼun. 19 Ma jnaʼ teme ay spʼijil yoʼtan o teme ma snaʼ kʼinale. Chikan te bin yilel stalel, jaʼme ya swentain spisil te bintik la jpas tulan ta stael liʼ ta balumilal sok te la jta ta swenta spʼijil koʼtan. Jaʼ-abi tojolnax-euk. 20 La jmel koʼtan yuʼun spisil te tulan aʼtejemon liʼ ta balumilal. 21 Melel, manchukme ay machʼa tulan ya x-aʼtej sok spʼijil yoʼtan, ya snaʼ ta lek sok pʼijuben ta spasel, yananixme yakʼbey jilel spisil te bintik ay yuʼun te machʼa maba aʼtejem ta sleele. Jaʼ-abi tojolnax-euk sok kʼax mel-oʼtantik sba.

22 ¿Bin-nix ya sta-a te winik te tulan ya x-aʼtej sok te ya smil sba ta aʼtel liʼ ta balumilal ta stael te bin ya skʼan te yoʼtane? 23 Te jayeb kʼajkʼal kuxule, ya x-akʼbot swokol yuʼun te yaʼtel sok ma snaʼix te bin ya spas yuʼun, ni jaʼuk ta ajkʼabal ya skux yoʼtan. Jaʼ-abi tojolnax-euk.

24 Te bin lek ya xjuʼ ya spas jtul winik jaʼ te ya xweʼ x-uchʼaj sok te ya smulanbey yutsilal te tulan yaʼtele. La jta ta ilel te jaʼnix jich ini talem ta stojol te smelelil Dios.* 25 Melel, ¿machʼa lekxan ya xweʼ x-uchʼaj jich te bin-utʼil te joʼone?

26 Te machʼa lek ya x-ilot yuʼun te Dios ya x-akʼbot spʼijil yoʼtan, snopojibal sok stseʼelil yoʼtan, yan stukel te jmulawil ya x-akʼbot yaʼtel ta sleel sok ta stsobel kʼulejalil yuʼun jaʼ ya yakʼbey te machʼa lek ilbil yuʼun te smelelil Dios. Jaʼ-abi tojolnax-euk, jich kʼoem te ya jnutstik te ikʼe.