Proverbios
11 Te Jehová ya yilay te balanza te ma tsʼakal bin ya slik,
pero tseʼel yoʼtan yuʼun te bin tsʼakal ya yichʼ likel.*
2 Te kʼalal ya xtal te toybail, jaʼnix jich ya xjul-euk te kʼexlal,
pero te pʼijil oʼtanil jaʼ ay sok te machʼatik pekʼel yoʼtanik.*
3 Te machʼatik toj yoʼtanik jaʼ ya xtojobtesotik yuʼun te jun yoʼtanik,
te machʼatik ya xloʼlaywanik jaʼ ya xjinotik yuʼun te schopolil yoʼtanik.*
4 Te kʼulejalil* maʼyuk skʼoplal ya xkʼot ta skʼajkʼalel yilinba te Diose,
pero te bin stojil ta pasel ya xkoltaywan lokʼel ta lajel.
5 Ta swenta te toj bin ya spas te machʼa maʼyuk smul, toj te sbee,
pero te machʼa chopol* ya xyal ta skaj te schopolil.
6 Ta swenta te toj bin ya spas te machʼa toj yoʼtan jaʼme ya xkoltayot yuʼun,
pero te jloʼlaywanej jaʼ ya xchukot yuʼun te bin ya skʼan te yoʼtane.
7 Te kʼalal ya xlaj te machʼa chopol,* ya xlaj-euk te bin ya smaliy,
jaʼnix jich ya xlaj te smukʼul yoʼtan ta swenta te bintik ya xjuʼ ya spas.
8 Te machʼa toj yoʼtan ya yichʼ koltayel lokʼel ta swokol,
te machʼa chopol* jaʼ ya x-och jilel tey-a.
9 Ta skaj te bin ya yal te machʼa ya swalakʼpatiy* te Diose, ya yikʼ bael ta chʼayel te spatxujke,
pero ta swenta te bin ya snaʼ te machʼa toj yoʼtan ya xkol lokʼel.
10 Te slekil yoʼtan te machʼa toj yoʼtan ya yakʼbey stseʼelil yoʼtan te mukʼul lum,
pero ya x-awun yuʼun stseʼelil yoʼtan te kʼalal ya xlaj te machʼatik chopolik.*
11 Te bendición yuʼun te machʼatik toj yoʼtanik ya stoybey skʼoplal te mukʼul lum,
pero te bin ya yal te machʼatik chopolik* ya sjin koel.
12 Te machʼa maʼyuk spʼijil yoʼtan ya spʼaj te spatxujk,
pero te machʼa ay bintik ya snaʼ stsajtayel* ta lek maʼyuk bin ya yal stukel.
13 Te jleaw ta kʼop ya spukbey skʼoplal te bintik snaʼoj te ma xjuʼ ta alel,
pero te machʼa jun yoʼtan ya skʼej ta yoʼtan te bin ma xjuʼ ta alele.
14 Te kʼalal maʼyuk lekil tojobtesel,* ya yil swokol te lum,
pero te kʼalal ay bayal jtojobteswanejetik, lek ya xlokʼ te bintik ya yichʼ pasel.*
15 Te machʼa ya stejkʼan sba ta stojbeyel sbet te machʼa ma snaʼbey sba yananix sta swokol-a,
pero te machʼa ma xyakʼ skʼab yuʼun ya spas trato junme yoʼtan ya xkuxin.
16 Te ants te ay yutsil yoʼtan* ya yichʼ albeyel yutsilal,
pero te winiketik te kʼax chopolik* ya sta skʼulejalik.
18 Te machʼa chopol* maʼyuk skʼoplal ya xkʼot te stojol,
pero te machʼa ya stsʼun te bin stojil ta pasel yame sta te lekil majtanil.
19 Te machʼa yakʼoj ta yoʼtan spasel te bin stojil ta pasel ayme ta sbelal kuxlejalil,
pero te machʼa stʼunoj te bin chopol* ayme ta sbelal lajel.
20 Te Jehová ya yilay te machʼatik ma toj yoʼtanik,
pero tseʼel yoʼtan ta stojol te machʼatik maba chopol* te sbeike.
21 Yame xjuʼ ya schʼuun awoʼtan ini: te machʼa chopol* yananixme yichʼ castigo-a,
pero te snichʼnab te machʼatik toj yoʼtanik yame xkolik stukelik.
22 Te tʼujbil ants te ya swalakʼpatiy te pʼijil oʼtanil
jaʼ jich kʼoem te bin-utʼil chʼokowil te pasbil ta oro te xojol ta sniʼ te chitame.
23 Te bin ya skʼan yoʼtan te machʼatik toj yoʼtanik lek te banti ya x-ikʼawanik bael,
pero te bin ya smaliyik te machʼatik chopolik* jaʼ te ilinba.
24 Te machʼa bayal bin ya yakʼe bayalxan bin ya yichʼ akʼbeyel yuʼun,
pero te machʼa ma skʼan ya yakʼ te bintik ay yuʼune pobre ya xjil yuʼun.
25 Te machʼa ay bin ya yakʼ yame yichʼ majtantesel,*
te machʼa ya yakʼbey smukʼul yoʼtan te yantik yame yichʼ akʼbeyel smukʼul yoʼtan-euk.
26 Te lum yame sbolobtesbey skʼoplal te machʼa stukel ya skʼan ya yuʼunin jilel te sit awal tsʼunubil,
pero lekme skʼoplal ya yalbey stukel te machʼa ya schon te sit awal tsʼunubile.
27 Te machʼa ya spas tulan yuʼun ya spas te bin lek lekme ya yichʼ ilel,
pero te machʼa ya spas te bin chopol,* jaʼnixme ya xjul ta stojol te bin chopol.
28 Te machʼa ya smukʼulin yoʼtan te skʼulejal yame xyal,
pero te machʼa toj yoʼtan lek ya xkʼot jich te bin-utʼil teʼ te bayal yabinal.
29 Te machʼa ya yakʼbey swokol* te machʼatik ay yuʼun ta sna jaʼme smajtan ya xkʼot te ikʼ,
te machʼa ma snaʼ kʼinal yame yichʼ abatinel yuʼun te machʼa ay spʼijil yoʼtan.
30 Te sit ya yakʼ te machʼa toj yoʼtan jaʼ teʼ yuʼun kuxlejalil,
te machʼa ya stijbey yoʼtan te yantik ta spasel te bin lek yuʼunme ay spʼijil yoʼtan.
31 Jamal chikan ta ilel: teme ta balumilal ya yichʼ akʼbeyel te bin snujpʼ ya yichʼ akʼbeyel te machʼa toj yoʼtan,
¡¿jaʼuktobal ma xyichʼ akʼbeyel-a te bin snujpʼ ya yichʼ akʼbeyel te machʼa chopol* sok te machʼa jmulawil?!