Eclesiastés
6 Ay yan bin kiloj ta balumilal te ya yakʼ tulan wokolil sok jaʼ te bin spisil-ora ya xkʼot ta stojol te ants winiketik: 2 te smelelil Dios ya yakʼbey skʼulejal, sbiluk jtul winik sok ya yakʼ te ya yichʼ ichʼel ta mukʼ yuʼun jich ay yuʼun-a te bintik ya skʼan yoʼtane, pero te smelelil Dios ma xyakʼ te ya smulanbey yutsilal te bintik ay yuʼune, jaʼ ya yakʼ te yan machʼa ya smulanbey yutsilal-a. Tojolnax spisil-abi sok ya yakʼ tulan wokolil te kʼax mel-oʼtantik sbae. 3 Ayniwan te jtul winik te 100 ta tul yal snichʼnab, bayal ya xkuxin sok ya xmamalub, pero teme maba ya smulanbey yutsilal te bintik lek ay yuʼun te kʼalal mato xbajt ta mukenal, yame kal ta jamal te jaʼ lektoxan skʼoplal jtul alal te lajem ayine.* 4 Melel tojolnax tal te alal sok sujt bael ta ijkʼal kʼinal, ta ijkʼal kʼinal potsol jil te sbiile. 5 Maʼyuk bin-ora la yil te kʼajkʼal sok maʼyuk bin la snaʼ, pero jaʼ lektoxan yak ta skuxel yoʼtan-a te bin-utʼil te winik-abi. 6 ¿Bin swentail te chaʼmil jaʼbil ya xkuxin teme maba ya smulanbey yutsilal te skuxlejale? ¿Mabal junuknax te banti ya xbajtik ta spisilik?
7 Jtul winik tulan ya x-aʼtej yuʼun ya snojes schʼujt; manchukme jich-abi ma tikʼuk ya yaʼiy te bin ya skʼan te yoʼtane. 8 Melel, ¿bin lekilal ya sta te machʼa pʼij yoʼtan te ma jichuk ya sta stukel te machʼa maʼyuk spʼijil yoʼtane? O ¿bin ya xlokʼ yuʼun-a te pobre te ya snaʼ sleel te bitʼil ya xkuxin? 9 Jaʼ lekxan te ya jmulantik te bin ya yil te jsitik te bin-utʼil ya xtal xbootik ta sleel te bin ya smulan te koʼtantike. Jaʼ-abi tojolnax-euk, jich kʼoem te ya jnutstik te ikʼe.
10 Spisil te bin chiknajeme ayix sbiil sok naʼbilix te bin yilel te winike; ma xjuʼ ya stsal sba sok te machʼa bayalxan yip ta stojol. 11 Kʼalal bayalxan ya xkʼopojotik, bayalxan te bin tojolnax ya kaltik. Maʼyuk bin ya xlokʼ kuʼuntik-a. 12 ¿Machʼa ya snaʼ te bin lek ya xjuʼ ya spas te winik te komnax skuxlejal te tojolnax, te jich ya xkʼax te bin-utʼil axinal? Melel, ¿machʼa ya x-akʼbot snaʼ te winik te bin ya xkʼot ta pasel liʼ ta balumilal te kʼalal lajemix-ae?