Eclesiastés

4 La jtaxan ta ilel spisil te utsʼinel* te ya yichʼ pasel liʼ ta balumilal. La kilbey yaʼlel sitik te machʼatik tulan utsʼinbilik, sok maʼyuk machʼa ya x-akʼbot smukʼul kʼinal yaʼiyik. Te machʼatik tulan ya x-utsʼinwanik jaʼ ya xmantalajik ta stojolik, pero maʼyuk machʼa ya x-akʼbot smukʼul kʼinal yaʼiyik. 2 Jaʼ yuʼun la kutsilkʼoptay te machʼatik lajemikixe, ma jaʼuk te machʼatik kuxuliktoe. 3 Jaʼ lektoxan ayik te machʼatik matoba ayinemik,* melel matoba yilojik te wokoliletik te ya xkʼax liʼ ta balumilal.

4 La kil te ya stsal sbaik te ants winiketik te kʼalal tulan ya x-aʼtejik sok te leknax ya snaʼ spasel te yaʼtelik, jaʼ-abi tojolnax-euk jich kʼoem te ya jnutstik te ikʼe.

5 Te machʼa maʼyuk spʼijil yoʼtan jaʼnax ya spet skʼab sok ya xlaj bael te sbakʼetale.

6 Jaʼ lekxan te ya jkux koʼtantik jtebuk te bin-utʼil ya jmil jbatik ta aʼtel sok te ya jnutstik te ikʼe.

7 Ay bin la jtaxan ta ilel te tojolnax liʼ ta balumilal: 8 teme jtul ants winik te jkʼaxel stukelnax ay te maʼyuk machʼa ya xjokinot yuʼune; manchukme maʼyuk yal snichʼnab ni sbankil yijtsʼinab, maʼyuk bin-ora ya xlaj te tulan yaʼtele; ya skʼanxan bayal skʼulejal. Maniwan jichuk ya sjojkʼoybey sba: «¿Machʼa ta stojol te yakon ta tulan aʼtele, sok te ya jkom jba ta stael te bin ya skʼan te koʼtane?». Jaʼ-abi tojolnax-euk sok ma snaʼix te bin ya spas yuʼun.

9 Jaʼ lekxan te chebik te bin-utʼil jtulnax, melel ya staikxan bayal slekilalik* ta skaj te tulan ya x-aʼtejike. 10 Melel teme ay jtul te ya xyale, te yane ya xjuʼ ya sjach te sjoye. Pero, ¿bin ya xkʼot ta stojol te machʼa ya xyal teme maʼyuk machʼa ya xkoltayot yuʼune?

11 Jaʼnix jich, teme ay chaʼtul te jun-nax ya xwayik, talel kʼaxel ya skʼixnajtes sbaik. Pero, ¿bin-utʼil ya skʼixnajtes sba te machʼa stukel aye? 12 Jaʼnix jich, te machʼa stukel aye ya xjuʼ ya yichʼ tsalel, pero teme chebike ya xjuʼ ya sitintayik te machʼa ya x-utsʼinwane.* Te jlijkʼ chʼajan te oxlijkʼ tsʼotbile, ma orauknax ya xtuchʼ.

13 Jaʼ lekxan jtul chʼin kerem te pobre pero te ay spʼijil yoʼtan te bin-utʼil jtul ajwalil te mamalix pero te maʼyuk spʼijil yoʼtan, te ma schʼuun tsitsel* ta skaj te maʼyuk spʼijil yoʼtan. 14 Melel lokʼ talel* ta chukojibal yuʼun ya x-och ta ajwalil, manchukme pobre ayin* kʼalal wentainbil yuʼun-a te ajwalile. 15 La jnopilan ta swenta te machʼatik kuxajtik te xtal xbajtik ta yantik lugaretik liʼ ta balumilal, jaʼnix jich la jnop te bin ya xkʼot ta pasel ta stojol te jchʼiel kerem te ya sjelolin jilel te ajwalile. 16 Manchukme bayal ants winiketik ya xkoltayot yuʼun, te machʼatik ya xtalik ta patile maba tseel yoʼtanik ta stojol. Jaʼ-abi tojolnax-euk, jich kʼoem te ya jnutstik te ikʼe.