2 Crónicas

20 Ta patil, te moabitaetik, te ammonitaetik sok chaʼoxtul ammonimetik* tal yakʼbeyik guerra te Jehosafat. 2 Jich yuʼun la yalbeyik yaʼiy te Jehosafat: «Talme skontrainat kʼax bayal ta tul ants winiketik te jajchemik tal ta skʼinal te mar Muerto* jaʼto kʼalal ta skʼinal Edom, stsoboj sbaik ta Hazazón-Tamar, jaʼ te En-Guedí». 3 Ta swenta-abi, te Jehosafat och xiwel ta yoʼtan, jich yuʼun sok spisil yoʼtan la sle te Jehová. Tey-abi la yal ta mantal te akʼa skom sweʼelik spisil te yajwalul Judá. 4 Jich te ants winiketik yuʼun Judá la stsob sbaik ta skʼanbeyel koltayel te Jehová; tal skʼanbeyik koltayel te Jehová spisil te machʼatik nainemik ta mukʼul lumetik yuʼun Judá.

5 Jich yuʼun, te Jehosafat la stejkʼan sba ta stojol te ants winiketik yuʼun Judá sok te Jerusalén tey ta sna te Jehová, ta yelaw te yachʼil amakʼ, 6 jich la yal:

«Kajwal, Jehová, Dios yuʼun te antiguo jmeʼ jtatik, ¿mabal jaʼuk Diosat ta chʼulchan? ¿Mabal jaʼuk ay ta akʼab spisil te nacionetike? Te awip sok te awuʼel ay ta akʼab, maʼyuk machʼa ya xjuʼ ya stsalat. 7 Kajwal, Dios kuʼuntik, ¿mabal jaʼukat te la atentiklan lokʼel te yajwalul te kʼinal ini ta stojol te lum awuʼun swenta jaʼ la awakʼbey te stsʼumbal te awamigo Abrahán ta sbajtelkʼinal? 8 Nainik tey-a sok la spasik jun chʼul awilal ta swenta abiil. Jich la yalik: 9 ‹Teme ay tal wokolil ta jtojoltik —chikan teme ta swenta espada, ta swenta castigo, ta swenta tulan chamel* o wiʼnal—, yame jtejkʼan jbatik ta atojol ta na ini (melel liʼ ay ta na ini te abiile), yame xtal jkʼantik koltayel ta atojol ta swenta te jwokoltike, jich yuʼun yame awaʼiy te jkʼoptik sok yame akoltayotik›. 10 Ta ora ini liʼ ayik te winiketik yuʼun Ammón, Moab sok te winiketik te talemik ta witstikil yuʼun Seír. Te kʼalal lokʼik tal ta skʼinal Egipto te israeletik, ma la awakʼ te ya yochintaybeyik te skʼinalik te winiketik-abi; la sjoy sbeik, jich maba la slajinik. 11 Pero ilawil te bitʼil ya xtal stojbotike, ya skʼan ya stenotik lokʼel ta akʼinal, jaʼ te kʼinal te la awakʼbotike. 12 Kajwal, Dios kuʼuntik, ¿mabal yakuk awakʼtiklanbey castigo? Melel ma xjuʼ kuʼuntik yochintayel te winiketik ini te kʼax bayalik te tal yakʼbotik guerra. Ma jnaʼtik te bin ya jpastike, jich yuʼun kakʼoj jsitik ta atojol».

13 Te kʼalal jich yak ta kʼoel ta pasel-ae, spisil te yajwalul Judá tekʼajtik ta stojol te Jehová, tey ayik-a te yinamik sok te yal snichʼnabik, jaʼnix jich te chʼin alaletike.

14 Jich yuʼun, ta yolil te banti stsoboj sbaike, te chʼul espíritu* yuʼun te Jehová jul ta stojol te Jahaziel —te snichʼan Zacarías, snichʼan Benaya, snichʼan Jeiel, snichʼan Matanías te levita-winik te jaʼ snichʼan te Asaf—. 15 Jich la yal te Jahaziel: «¡Chʼama awaʼiyik stojol, spisil yajwalul Judá, te machʼatik nainemex ta Jerusalén sok jaʼat, ajwalil Jehosafat! Jich ya yal te Jehová: ‹Mame xnijk awoʼtanik sok mame xiwex ta stojol te winiketik ini te kʼax bayalike, melel te guerra ini mame jaʼuk awuʼunik, jaʼme yuʼun te Diose. 16 Koanik ta yakʼbeyel guerra pajel, melel yame xmoik tal ta sbelal Ziz, teyme ya xkʼot ataik ta slokʼibal te spamlej kʼinal te ay ta yelaw te jochol takin kʼinal yuʼun Jeruel. 17 Maba jaʼex ya awakʼik te guerrae. Tejkʼana abaik ta alugarik, lamana abaik sok ilawilik te bitʼil ya skoltayex te Jehová. Ants winiketik yuʼun Judá sok Jerusalén, mame xnijk awoʼtanik sok mame xiwex. Lokʼan akʼbeyaik guerra te pajele, melel yame sjokinex te Jehová›».

18 Ta oranax, te Jehosafat la spajkan sba kʼalal ta lum, spisil te yajwalul Judá sok te machʼatik nainemik ta Jerusalén jaʼnix jich la spajkan sbaik kʼalal ta lum ta stojol te Jehová yuʼun ya yichʼik ta mukʼ te Jehová. 19 Jich yuʼun, te levitaetik te talemik ta stsʼumbal cohatitaetik sok ta stsʼumbal coreitaetik tulan jajch yalbeyik yutsil skʼoplal te Jehová te Dios yuʼun Israel.

20 Ta yan kʼajkʼal, buen sab jajchik yuʼun ya xbajtik ta jochol takin kʼinal yuʼun Tecoa. Te kʼalal ya xbajtikix-ae, te Jehosafat la stejkʼan sba sok jich la yal: «¡Chʼama awaʼiyik stojol yajwalul Judá sok te machʼatik nainemex ta Jerusalén! Ayukme schʼuunel awoʼtanik ta stojol te Jehová te Dios awuʼunik swenta ay yip awoʼtanik.* Jaʼnix jich ayukme schʼuunel awoʼtanik ta stojol te j-alwanejetik yuʼun, jichme lek ya xkʼoex ta lokʼel».

21 Te kʼalal laj yoʼtan ta kʼop sok te ants winiketik, la stsa winiketik yuʼun ya skʼayojtayik te Jehová sok te slapojuk schʼul kʼuʼik ta yalbeyel yutsil skʼoplal. Jaʼme ya xnailajik bael ta stojol te winiketik te chapalik sok yaʼtejibik yuʼun guerra sok jichme ya yalik: «Albeyaik wokol te Jehová, melel sbajtelkʼinal ay te skʼuxul yoʼtan te ma x-ijkitaywan».

22 Te kʼalal sok stseʼelil yoʼtan jajchik ta kʼayoj, te Jehová chʼayem yoʼtan kʼot sta te winiketik yuʼun Ammón, Moab sok te machʼatik talemik ta witstikil yuʼun Seír te talemik ta yochintayel te Judá, jich yuʼun talel kʼaxel jajch smil sbaik. 23 Te ammonitaetik sok te moabitaetik la skontrainik te machʼatik talemik ta witstikil yuʼun Seír jaʼto te kʼalal la slajinik ta jkʼaxel. Te kʼalal laj yoʼtanik ta smilel te machʼatik talemik ta Seír, talel kʼaxel jajch smil sbaik-euk.

24 Te kʼalal kʼotik te winiketik yuʼun Judá ta toyol tsʼajkʼ yuʼun yilojibal kʼinal te ay ta jochol takin kʼinal sok te la yilik bael te banti ay te soldadoetik te kʼax bayalike, la yilik te tasajtik* jilel te soldadoetik, maʼyuk machʼa kuxul jilel. 25 Jich yuʼun, te Jehosafat sok te swiniktak bajt spojbeyik tal te sbiluk te skontratak. Jajch spojbeyik sbiluk te machʼatik lajemik jaʼto te kʼalal ma juʼix yuʼunik skuchel tal, bayal bintik lek la staik, jaʼnix jich la staik lekil kʼuʼul pakʼal sok te bintik bayal stojole. Oxeb kʼajkʼal la stsobik te biluketik ta skaj te kʼax bayale. 26 Ta schanebal kʼajkʼal la stsob sbaik ta spamlej yuʼun Beracá te banti la yalbeyik yutsil skʼoplal te Jehová. Jich yuʼun la yakʼbeyik sbiilin spamlej yuʼun Beracá* te lugar-abi, jich sbiil jaʼto ta ora ini.

27 Jich yuʼun, spisil te winiketik yuʼun Judá sok Jerusalén, te jaʼ jolal yuʼunik te Jehosafat, tseʼelnax yoʼtan sujtik tal ta Jerusalén, melel akʼbotik stseʼelil yoʼtanik yuʼun te Jehová ta swenta te la stsalik te skontratakike. 28 Te kʼalal kʼotik ta Jerusalén, yakik ta stijel te aʼtejibaletik yuʼun música te ay scuerdail, te arpaetik sok yakik ta yokʼesinel te trompetaetik. Bajtik ta sna te Jehová. 29 Te kʼalal la yaʼiyik stojol spisil te nacionetik te jaʼ la yakʼ guerra te Jehová ta stojol te skontratak te Israel, och xiwel ta yoʼtanik ta stojol te Diose. 30 Jich ayin lamalkʼinal te banti wentainwan te Jehosafat sok akʼbotxan lamalkʼinal* ta bayuk yuʼun te sDiose.

31 Te Jehosafat wentainwan ta Judá. Ay 35 yaʼbilal-a te kʼalal och ta ajwalil sok wentainwan 25 jaʼbil ta Jerusalén. Azubá sbiil te snan,* jaʼ yantsil nichʼan te Silhí. 32 Jaʼnix jich la spas-euk te bintik la spas te stat, jaʼ te Asá, maba jowij ta stʼunel. Jaʼ la spas te bintik lek ya yil te Jehová. 33 Pero maba la yichʼ lajinel te toyol awilaletik, jaʼnix jich te lume maba la schajpan te yoʼtanik ta sleel te Dios yuʼun te antiguo smeʼ statike.

34 Te bintik la spas ta skuxlejal te Jehosafat tsʼibaybil jilel ta sjajchibal kʼalalto ta slajibal ta junetik yuʼun te j-alwanej Jehú snichʼan Hananí, te la yichʼ otsesel ta Libro yuʼun te Ajwaliletik yuʼun Israel. 35 Ta patil, te Jehosafat te ajwalil yuʼun Judá la schap skʼop sok te Ocozías te ajwalil yuʼun Israel, jaʼ te machʼa kʼax ma lek te bin ya spase. 36 La schap skʼopik yuʼun ya spasik barcoetik te ya xbajtik ta Tarsis, la spasik te barcoetik ta Ezión-Guéber. 37 Pero, te Eliezer snichʼan Dodavahu te talem ta Maresá jich la yal ta albilkʼop ta stojol te Jehosafat: «Ta skaj te la achap akʼop sok te Ocozías, te Jehová yame sjinbat te bin la apase». Jich yuʼun jin te barcoetik, maba bajtikix ta Tarsis.