Josué

5 Spisil te ajwaliletik yuʼun te amorreoetik te ayik ta stojol smalib kʼajkʼal* yuʼun te mukʼul jaʼ Jordán sok spisil te ajwaliletik yuʼun te cananeoetik te nopol* ayik ta mar la yaʼiyik stojol te la stakijtes Jehová te yaʼlel te mukʼul jaʼ Jordán ta stojol te israeletik jaʼto te kʼalal kʼaxik baele. Oranax och xiwel ta yoʼtanik sok laj yip yoʼtanik ta skaj te israeletike.

2 Ta yorailnix-abi, te Jehová jich la yalbey te Josué: «Pasa cuchilloetik ta ton yuʼun ya awakʼbey circuncisión* te winiketik yuʼun Israel». 3 Jich te Josué la spas te cuchilloetik ta ton sok la yakʼbey circuncisión te winiketik yuʼun Israel ta Guibeat-Haaralot.* 4 Jaʼ swentail ini te bin yuʼun te Josué la yakʼbey circuncisión te winiketike: spisil te winiketik te lokʼik tal ta Egipto —jaʼ te winiketik yuʼun guerra—* lajik jilel ta jochol takin kʼinal te kʼalal lokʼemikix tal ta Egipto-ae. 5 Spisil te winiketik te lokʼik tal ta Egipto yichʼojik circuncisión-a, pero te machʼatik ayinik* ta be ta jochol takin kʼinal te kʼalal lokʼemikix tal ta Egipto-ae, maba yichʼojik circuncisión stukelik. 6 Te israeletik ay beenemikix 40 jaʼbil ta jochol takin kʼinal jaʼto te kʼalal lajik spisilik, jaʼik te winiketik yuʼun guerra te lokʼik tal ta Egipto sok te maba la schʼuunbeyik skʼop te Jehová. Albotik ta jamal yuʼun te Jehová te maba ya x-akʼbot yilik te lumkʼinale, jaʼ te kʼinal te albotik ta jamal yuʼun Jehová te antiguo smeʼ statik te ya x-akʼbotike, jaʼ te banti ay bayal leche sok chab. 7 Te Diose jaʼ la yikʼ tal ta stojol te alnichʼanetik, yuʼun jaʼ la sjelolinik jilel te smeʼ statike, jaʼik te machʼatik akʼbotik circuncisión yuʼun te Josué; melel maba la yichʼik circuncisión te kʼalal beenik ta jochol takin kʼinal.

8 Te kʼalal laj yoʼtanik ta yakʼbeyel circuncisión spisil te lume, teynix jilik te banti ay te scampamentoik jaʼto te kʼalal lekub te yejchen te winiketike.

9 Jich yuʼun, te Jehová jich la yalbey te Josué: «Yoʼtik ini la jlokʼesix ta atojolik te bin swentail te la skʼexlaltesex te egipcioetike». Jaʼ yuʼun, Guilgal* sbiil te lugar-abi jaʼto ta ora ini.

10 Te israeletik teynix la yakʼ scampamentoik ta Guilgal. Ta 14 yuʼun te sbabial u la spasik te Kʼin yuʼun Pascua ta mal kʼajkʼal ta spamlej jochol takin kʼinal yuʼun Jericó. 11 Ta yan kʼajkʼal, te kʼalal spasojikix-a te Kʼin yuʼun Pascua, ta kʼajkʼalnix-abi jajch sweʼik te sit awal tsʼunubil te ya yakʼ te lumkʼinale: jaʼ te pan te maba yichʼoj levadura sok te chʼilbil sit awal tsʼunubil. 12 Ta yan kʼajkʼal tupʼ te maná jaʼ te kʼalal jajch sweʼik te sit awal tsʼunubil te ya yakʼ te lumkʼinal; manchukme maba la staikix maná te israeletike, ta jaʼbilnix-abi jajchik ta sweʼel te sit awal tsʼunubil te ya yakʼ te kʼinal ta Canaán.

13 Te kʼalal nopol* ay ta Jericó-a te Josué, la stoy moel sit sok la yil jtul winik te tekʼel ta stojol te stsakoj jun espada ta skʼab. Jich te Josué noptsaj* bael ta stojol sok jich la yalbey: «¿Ayatbal sok joʼotik, o jaʼbal ayat sok te jkontrakotike?». 14 Jich la yal te winike: «Maʼuk, talemon jich te bitʼil jwolwanej yuʼun te soldadoetik yuʼun te Jehová». Te kʼalal jich la yaʼiy stojol te Josué, la spajkan sba kʼalal ta lum, la snijan sba sok jich la yal: «Kajwal, ¿bin-a te ya akʼan ya awalbey te j-abat awuʼune?». 15 Te jwolwanej yuʼun te soldadoetik yuʼun te Jehová jich la yalbey te Josué: «Lokʼesa te atep o axanab, melel chʼultesbil te lum te banti tekʼelate». Jich la spas ta oranax te Josué.