Deuteronomio

18 »Te levitaetik te jaʼik sacerdoteetik —spisil stsʼumbal Leví— maʼyuk bin ya yichʼik akʼbeyel jilel ta Israel. Jaʼme ya sweʼik te majtaniletik te ya yichʼ chikʼel ta stojol te Jehová. Jaʼme te bin yuʼunik ya xkʼot. 2 Jich yuʼun maba ya yichʼik akʼbeyel skʼinalik ta yolil te yermanotak. Te Jehová ya yakʼbey te bin ya xtuun yuʼunik jich te bin-utʼil albotik ta jamal yuʼun.

3 »Jaʼme ini te bin ay ta swentaik yichʼel te sacerdoteetik yuʼun te lume. Machʼauk-a te ya yakʼ milbil majtanil, chikan teme jkojt toro o jkojt tuminchij yame skʼan ya yakʼbey te sacerdote te snejkʼel, sbakel ye sok stsukum. 4 Yame skʼan ya awakʼbeyik te sba sit awal tsʼunubil awuʼunik, te yachʼil vino sok te aceite awuʼunik sok te sba stsotsel tuminchijetik awuʼunik te ya yichʼ joxbeyel.* 5 Te Jehová te Dios awuʼunik stsaoj te stsʼumbal Leví ta yolil te yantik atsʼumbalik yuʼun spisil-ora ya x-abatinik ta swenta sbiil te Jehová.

6 »Teme ay jtul levita te ya yijkitay te lum yuʼun Israel te banti yak ta nainel sok te ya skʼan yoʼtan te ya xbajt ta yan lugar te tsabil yuʼun te Jehová, 7 ya xjuʼ ya x-abatin tey-a ta swenta sbiil te Jehová te Dios yuʼun jich te bin-utʼil spisil te yantik yermanotak, te levitaetik, te tey ayik ta abatinel ta stojol te Jehová. 8 Pajalme ya yichʼ akʼbeyel sweʼel jich te bin-utʼil te yantik, jaʼnix jich yame yichʼik te jayeb yipal te bintik ya yichʼ chonel yuʼun te antiguo smeʼ statik.

9 »Te kʼalal ya x-ochex bael ta kʼinal te ya yakʼbeyex te Jehová te Dios awuʼunik, mame xa anopik te bin ilobtik sba ya spasik te nacionetik-abi. 10 Mame skʼan te ay machʼa ta awolilik ya schʼoj ochel ta kʼajkʼ te skerem nichʼnab o te yantsil nichʼnab, mame ayuk jnaʼojel, te machʼa ya spas magia, te machʼa ya slebey swentail te bintik ya xkʼot ta pasel, te j-akʼchamel, 11 te machʼa ya stuuntes brujería ta stojol yantik, te machʼa ya xbajt sjojkʼoybey jtul espiritista* o te machʼa ya yakʼ sba ta jnaʼojel ni ayuk machʼa ya skʼopon te machʼatik lajemike. 12 Melel te Jehová ya yilay machʼauk-a te ya spas spisil-abi, ta swenta te bintik ilobtik sba ini te Jehová te Dios awuʼunik yame sten lokʼel te nacionetik ta atojolik. 13 Yame skʼan te toj ya awakʼ abaik ta stojol te Jehová te Dios awuʼunik.

14 »Melel te nacionetik te ya xbajt awochintayik kʼayemik ta yaʼiybeyel skʼop te machʼatik ya spasik magia sok jnaʼojeletik, pero te Jehová te Dios awuʼunik jkʼaxel maba ya yakʼ te jich ya apasike. 15 Te Jehová te Dios awuʼunik ay machʼa ya stsa ta yolil te awermanotak yuʼun ya yakʼbey yaʼtel ta j-alwanej jich te bin-utʼil te joʼone. Yame skʼan ya awaʼiybeyik te skʼope. 16 Jaʼ te bin la akʼanbeyik te Jehová te Dios awuʼunik ta Horeb te kʼalal la atsob abaik, jich la awalik: ‹Mame xa awakʼ kaʼiybeytik skʼop te Jehová te Dios kuʼuntik ni jaʼuk te ya jchaʼkiltik te mukʼul kʼajkʼe, yuʼun jich maba ya xlajotik-a›. 17 Jaʼ yuʼun, jich la yalbon te Jehová: ‹Lek ya kaʼiy te bin ya yalike. 18 Ay machʼa ya kakʼbey yaʼtel ta j-alwanej ta yolil awermanotak jich te bin-utʼil te jaʼate sok yame kakʼbey snaʼ te bin ya yale, jaʼ ya yalbeyex awaʼiyik spisil te bin ya kalbey ta mantal. 19 Yame kichʼ ta kʼop te machʼa ma xyaʼiy te bin ya yal ta swenta te jbiile.

20 »›Teme jtul j-alwanej ay bin ya yal ta swenta jbiil te ma jichuk kalojbey ta mantal o teme ya xkʼopoj ta swenta sbiil yantik diosetik, yame skʼan ya xlaj te j-alwanej-abi. 21 Pero ayniwan te jich ya xjajch awal ta awoʼtanik: «¿Bin-utʼil ya jnaʼtik te ma jaʼuk skʼop te Jehová?». 22 Teme maba kʼot ta pasel te bin la yal te j-alwanej ta swenta sbiil te Jehová, jich ya xnaʼbaj te ma jaʼuk te Jehová te kʼopoje. Ta swenta stoybail yoʼtan te kʼopoj te j-alwaneje. Jich yuʼun mame xiwex yuʼun›.