Habacuc
3 Te oración la spas te j-alwanej Habacuc la yal sok kʼayojiletik yuʼun mel-oʼtan:
2 Kajwal, Jehová, kaʼiyoj te bintik yichʼoj alel ta atojol.
Kajwal, Jehová, chamnax koʼtan* yuʼun te bintik apasoj.
¡Ma xa awakʼ te ya xchʼay ta oʼtanil manchukme ya xkʼax bayal jaʼbil!*
Akʼa ta naʼel manchukme ya xkʼax bayal jaʼbil.
Naʼa yoʼbolil jbakotik te kʼalal ma jnaʼtik te bin ya jpastik.
3 Kʼalalto ta Temán tal te Diose,
kʼalalto ta wits Parán tal te Chʼul Dios. (Sélah).*
La snojes ta yutsil yuʼel te chʼulchan
sok noj ta yutsil skʼoplal te balumilal.
4 Te smukʼul yutsilal jich kʼot te bin-utʼil sakal kʼinal.
Lokʼ ta skʼab cheb xojobil kʼajkʼ
te banti nakʼal-a te yipe.
5 Jaʼ nailajem yuʼun te chameletik
sok yak ta talel ta spat te tulan kʼajkʼ.
6 La stejkʼan sba sok la yakʼ nijkuk te balumilale.
Te kʼalal la yil te nacionetik, la yakʼ te xiw yoʼtanik yuʼun.
Te witsetik te sbajtelkʼinal ayik la yichʼik wuytiklanel
sok la snijan sbaik te namey chʼin witsetik.
Te namey beetik jaʼ yuʼun kʼoem.
7 La kil wokoliletik ta snailpakʼ te Cusán.
Nijk te nailpakʼetik te ayik ta skʼinal Madián.
8 Jehová, ¿jaʼbal akontrainoj te mukʼul jaʼetike?
¿Jaʼbal akontrainoj te mukʼul jaʼetik te bitʼil jajchem slab awoʼtane?
O ¿jaʼbal ay slab awoʼtan ta stojol te mar?
Melel la akajtajibin te caballoetik awuʼun
sok la yaʼiy tsalaw* te carretaetik awuʼun.
9 La alokʼesix sok la achajpanix te tʼimalteʼ awuʼun.
Te xuletik o wajchʼetik* ya yichʼ akʼbeyel yaʼtelik. (Sélah).
La atuuntes mukʼul jaʼetik yuʼun ya axat-tiklan te lumkʼinal.
10 Te witsetik la stsʼot sbaik yuʼun skʼuxul te kʼalal la yilate.
Te tulan jaʼal la yakʼ nojuk ta jaʼ te lumkʼinal.
Te kʼubul jaʼetik la yakʼ ta aʼiyel te skʼope.
Toyol la sjach skʼabik.
11 Te kʼajkʼal sok te u ma la stij sbaik ta yawilik.
Te flechaetik awuʼun xlemetnax xojobil lokʼik tal.
Te lanza awuʼun xlemetnax skʼajkʼal jich te bin-utʼil te tsantsewal.
12 La abeentay te lumkʼinal sok awilinba.
Sok slab awoʼtan la atsʼoʼ* ta tekʼel te nacionetike.
13 Lokʼat tal ta skoltayel te lum awuʼun, jaʼ te machʼa tsabil awuʼun.
La atsʼoʼ* ta tekʼel te jwolwanej yuʼun sna te machʼa chopole.*
La ajin koel te sna ta sjol kʼalalto ta yok. (Sélah).
14 La alowbey sjol ta slanzaik te soldadoetik
te kʼalal lokʼik tal jich te bin-utʼil tulan ikʼ yuʼun ya skontrainonik.
Bayal sbujtsʼ yoʼtanik, melel skuyojik-a te ya xjuʼ
ya slajinik ta muken te machʼa ay ta wokole.
15 Kʼaxat bael ta mar sok te caballoetik awuʼune,
kʼaxat bael ta mukʼul jaʼetik te ya syukʼilan sbae.
16 La kaʼiy te bin la yichʼ alele sok nijk koʼtan yuʼun;
jajch ta nijkel ke te kʼalal la kaʼiye.
Jajch ta kʼaʼel te jbakele;
jajch ta nijkel te koke.
Pero ya jmaliy sok slamalil koʼtan te skʼajkʼalel wokol,
melel jaʼ ya xtal ta stojol te lum te ya skontrainotike.
17 Manchukme ma xnichin te higuera
sok ma xyakʼ sit te tsʼusubiltik,
manchukme ma xyakʼ sit te aceituna
sok te ma xchʼi te awal tsʼunubil ta lumkʼinal,
manchukme ya xchʼay te tuminchijetik te ayik ta corral
sok te jochol sna te wakaxetik,
18 manchukme jich-abi, tseʼelnax koʼtan ya kaʼiy jba ta swenta te Jehová,
tseʼelnax koʼtan ta swenta te Dios te ya skoltayone.
19 Jaʼ kip te Kajwal Jehová, Mukʼul Ajwalil;
jaʼ ya yakʼ te jich ya xkʼot te kok te bin-utʼil yok te antsil chij
sok ya yakʼ xtejkʼajon ta toyol lugaretik.
Ta stojol te jwolwanej yuʼun kʼayoj; ta swenta te aʼtejibaletik kuʼun yuʼun música te ay scuerdail.