2 Reyes

4 Ay jtul ants te jaʼ yinam jtul te snichʼnab te j-alwanejetik te jich bajt skʼanbey wokol te Eliseo: «Te jmamalal, te jaʼ j-abat awuʼun, lajemix, sok anaʼoj ta lek te spisil-ora la xiʼ* te Jehová. Ta ora ini, te machʼa ay jbet ta stojol ya skʼan ya yikʼbon bael te chaʼtul jkerem-al yuʼun ya smosoin». 2 Jich albot yuʼun te Eliseo: «¿Bin ya xjuʼ ya jpas ta atojol? Albon kaʼiy, ¿bin ay awuʼun ta ana?». Jich la yal te ants: «Joʼon, te j-abaton awuʼune, jkʼaxel maʼyuk bin ay kuʼun ta jna, jaʼxanix jun jarra aceite». 3 Jich la yal te Eliseo: «Baan, baan kʼanbeya jarraetik te apatxujk, jarraetik te jocholik. Tsoba tal chikan jayebto ya xjuʼ awuʼun. 4 Tey-abi baan maka aba ta na sok te akerem-alatak. Nojesa spisil te jarraetik te la atsob tale sok parteme xa awakʼ te nojemikixe». 5 Jich bajt te antse.

Te kʼalal la smak sba ta na sok te skerem-alatak, jaʼ kʼasesbot tal yuʼun te skerem-alatak te jarraetik, jich te antse jaʼ la snojeslan ta aceite. 6 Te kʼalal nojemix-a te jarraetike, jich la yalbey jtul te skerem-ale: «Kʼasesbon tal yan jarra». Pero, jich albot yuʼun: «Maʼyukix yan jarra». Jaʼnax te kʼalal jich la yale, laj te aceitee. 7 Jich yuʼun, te ants bajt yalbey yaʼiy te winik yuʼun te smelelil Dios te bin kʼot ta pasele. Jich albot yuʼun te Eliseo: «Baan, chona te aceite yuʼun ya atoj-a te abete. Te jayebxan ya xjile, jaʼme ya atuuntes yuʼun ya xkuxinat sok te akerem-alatake».

8 Ta jun buelta, te Eliseo bajt ta Sunem, te banti ay ta kuxinel jtul ants te mukʼ skʼoplal, alulanbot yuʼun te ants te yakuk xjil ta weʼel. Ta jujun buelta te ya xkʼax ta lugar-abi, tey ya xkʼax ta weʼel-a. 9 Jaʼ yuʼun, te antse jich la yalbey te smamalal: «Jnaʼoj ta lek te yichʼoj ta mukʼ Dios te winik te ya xkʼax liʼe. 10 Awokoluk, jpasbeytik junuk schʼin cuarto ta sba jnatik, ya kakʼbeytik junuk swayib, smesa, snaktajib sok junuk skajtajib skʼajkʼ. Jich yuʼun, ta jujun buelta te ya xtale, teyme ya xjil-a».

11 Ta jun buelta te kʼot tey-ae, bajt ta scuarto te ay ta sba na yuʼun ya xway. 12 Tey-abi, jich la yalbey te Guehazí te j-abat yuʼune: «Ikʼa tal te sunamita-ants». Jich bajt yikʼ tal te antse. 13 Ta patil, te Eliseo jich la yalbey te Guehazí: «Awokoluk, jich xa awalbey te antse: ‹Ta swenta te bayal bintik apasoj ta jtojolkotik, ¿bin ya xjuʼ ya jpaskotik ta atojol? ¿Aybal bin ya akʼan te ya jkʼanbeytik te ajwalil o te capitán yuʼun te soldadoetik ta atojole?›». Pero, te antse jich la yal: «Maʼyuk, jun koʼtan ayon ta nainel sok te jlumale». 14 Jaʼ yuʼun, jich la sjojkʼoy te Eliseo: «¿Bin ya xjuʼ ya jpastikix ta stojol-a?». Jich la yal te Guehazí: «Maʼyuk jtuluk yal sok mamalix te smamalale». 15 Ta oranax, jich la yal te Eliseo: «Ikʼa tal». Te Guehazí bajt yikʼ tal te antse, jich te antse kʼot stejkʼan sba ta tiʼnail. 16 Jich albot yuʼun te Eliseo: «Ta yan jaʼbil ta jich ora bael ini, apetojix awal-a». Pero, jich la yal te ants: «¡Ma xa awal jich kajwal, winik yuʼun te smelelil Dios! Ma xa apason ta lot».

17 Jich la yikʼ yal ta schʼujt te ants sok ayin* jtul skerem-al ta yan jaʼbil, jich te bitʼil albot yuʼun te Eliseo. 18 Chʼi te chʼin kereme. Ta jun buelta bajt yil te stat te jaʼ sjokinoj te machʼatik ya stsobey sit te awal tsʼunubil. 19 Jich la yalbey te state: «¡Kʼux jol! ¡Aay, kʼux te jole!». Jich yuʼun, te stat te chʼin kerem jich la yalbey te yabate: «Kucha bael te banti ay te snane».* 20 Tey-abi, te j-abate la skuch sujtel te chʼin kerem te banti ay te snane.* Petbil yuʼun snan te chʼin kerem jaʼto ta olil kʼajkʼal, tey-abi laj. 21 Ta patil, te snan* te chʼin kereme mo smejtsʼan ta swayib te winik yuʼun te smelelil Dios, la smak jilel te tiʼnail, jich lokʼ bael. 22 La yikʼ tal te smamalal sok jich la yalbey: «Awokoluk, akʼa sjokinon bael jtul j-abat sok jkojt burro yuʼun ya xbajt kil te winik yuʼun te smelelil Dios, tey-abi yame sujton tal». 23 Pero, jich albot yuʼun te smamalal: «¿Bin yuʼun te ya xbajt awile? Ma jaʼuk yorail yuninal u ni jaʼuk skʼajkʼalel sábado». Pero, jich la yal te antse: «Ma xa amel awoʼtan. Lekme ayotik». 24 Tey-abi, te antse la smojtesbey smonturail te burroe sok jich la yalbey te j-abat yuʼune: «Tija te burro yuʼun ya x-animaj bael-a. Mame xa akom, jaʼto teme yuʼun joʼon ya kalbate».

25 Jich te antse bajt yil te winik yuʼun te smelelil Dios te ay ta wits Carmelo. Jaʼnax te kʼalal la yil te winik yuʼun te smelelil Dios te namalto* yak ta talel te antse, jich la yalbey te Guehazí te yabate: «¡Ilawil! Yak ta talel te sunamita-antse. 26 Awokoluk, baan ta animal ta stael sok jichme xa ajojkʼoybey: ‹¿Lekbal ayat? ¿Lekbal ay te amamalal? ¿Lekbal ay te chʼin kereme?›». Te antse jich la yalbey te Guehazí: «Lekme ayotik». 27 Te kʼalal kʼot ta wits te banti ay te winik yuʼun te smelelil Dios, ta oranax la spetbey te yoke. Tey-abi, te Guehazí kʼan snit lokʼel, pero jich albot yuʼun te winik yuʼun te smelelil Dios: «Ma xa awutsʼin, yuʼun kʼaxto bayal smeloj yoʼtan sok maʼyuk bin yakʼojbon jnaʼ te Jehová soknix maʼyuk bin yalojbon». 28 Jich la yal te antse: «Kajwal, ¿yuʼunbal la jkʼanbat jtul jkerem-al? ¿Yuʼunbal ma la kalbat ‹Ma xa apason ta lot›, te xchione?».

29 Ta oranax, te Eliseo jich la yalbey te Guehazí: «Chuka moel te akʼuʼ kʼalalto ta achʼujt, baan sok ichʼa bael te jnabateʼ. Teme ay machʼa ya ata ta be, mame xa apatbey yoʼtan; teme ay machʼa ya spatbat awoʼtan, mame xa apatbey yoʼtan. Ichʼa bael te jnabateʼ, kajanbeya ta sit yelaw te chʼin kereme». 30 Te snan* te chʼin kerem jich la yalbey te Eliseo: «Jamal ya kalbat ta stojol Jehová te kuxul Dios sok te kuxulat-euk te maba ya xboon teme maba ya ajokinon baele». Jich te Eliseo la sjokin bael te antse. 31 Jaʼ nail kʼot te Guehazí sok la skajanbey te nabateʼ ta sit yelaw te chʼin kerem, pero maba kʼopoj sok maba la stij sba. Jich sujt bael ta stojol te Eliseo sok jich la yalbey: «Ma kuxaj te chʼin kereme».

32 Te kʼalal och bael ta na te Eliseo, metsel kʼot sta ta wayibal te chʼin kerem sok lajemix-a. 33 Jich och bael te Eliseo, la smak sba ta na sok te chʼin kerem soknix jajch skʼopon te Jehová. 34 Ta patil mo ta wayibal sok la spajkan sba ta sba te chʼin kereme. La yakʼ ye ta banti ye te chʼin kerem, la yakʼ sit ta banti sit sok la yakʼ skʼab ta banti skʼab, jich pakal jilel ta sba te chʼin kerem. Te sbakʼetal te chʼin kerem jajch ta kʼixnajel. 35 Te Eliseo xtal xbajt ta beel ta yutil na, chaʼmo ta wayibal sok la schaʼpajkan sba ta sba te chʼin kereme, jich te chʼin kerem jukeb buelta akʼbot jatʼismajel, tey-abi la swikʼ sit. 36 Te Eliseo la yikʼ tal te Guehazí sok jich la yalbey: «Ikʼa tal te sunamita-ants». Jich te Guehazí bajt yikʼ tal te antse, jich och bael te ants te banti ay te Eliseo. Jich albot yuʼun te Eliseo: «Liʼ ay te awale». 37 Och bael te antse, kʼot skejan sba ta yok te Eliseo sok la spajkan sba kʼalal ta lum ta stojol. Ta patil la sjach te yale, lokʼ bael.

38 Te kʼalal sujt bael ta Guilgal te Eliseo, ay tulan wiʼnal ta kʼinal-a. Te kʼalal nakal ta stojol-a te snichʼnab te j-alwanejetik, jich la yalbey te yabat: «Otsesa ta kʼajkʼ te mukʼul oxom* sok chajpana weʼelil ta stojol te snichʼnab te j-alwanejetike». 39 Jich lokʼ bael jtul te snichʼnab te j-alwanejetik ta sleel malva-itaj ta jaʼmaleltik. La sta schʼoxal o yakʼul teʼtikil chʼum, la stulbey te sit sok la schup tal ta skʼuʼ jaʼto te kʼalal noj yuʼune. Te kʼalal sujt tale, la sbojtiklan ochel ta oxom* manchukme ma snaʼoj bin-a. 40 Ta patil la yichʼ pajchanel kʼaxel te weʼelile. Pero, te kʼalal ochik ta weʼel te winiketike, jajchik ta aw: «¡Winik yuʼun te smelelil Dios, ay svenenoil te weʼelile!». Jich maba la sweʼik. 41 Jich yuʼun, jich la yal te Eliseo: «Ichʼaik tal harina». Te kʼalal yakʼojbeyix-a te weʼelil, jich la yal: «Luchbeya kʼaxel te winiketike». Maʼyukix svenenoil-a te weʼelile.

42 Ay jtul winik te tal ta Baal-Salisá te la yichʼbey tal te winik yuʼun te smelelil Dios 20 ta pejch panetik yuʼun cebada te jaʼ spasoj sok-a te sba sit awal tsʼunubil sok la yichʼbey tal jun bolsa yachʼil sit awal tsʼunubil. Te Eliseo jich la yal: «Akʼbeya sweʼ te ants winiketik ini». 43 Pero, jich la yal te j-abat yuʼune: «¿Bin-utʼil kʼan jmakʼlin 100 ta tul ants winiketik sok ini?». Jich la yal te Eliseo: «Akʼbeya sweʼ te ants winiketik, melel jich ya yal te Jehová: ‹Yame xweʼik sok aytome sobra ya xjil›». 44 La yakʼtiklanbey sweʼ, noj schʼujtik sok la spas sobra, jich te bitʼil la yal te Jehová.