Te lek yachʼil kʼop ya yal te Lucas

19 Te Jesús och bael ta Jericó, yak ta kʼaxel bael ta mukʼul lum. 2 Ay jtul jkʼulej winik tey-a te Zaqueo sbiile. Jaʼ swentainoj te jkʼanpatanetike. 3 Te winik ini yoʼtan ya skʼan ya yil te Jesús. Ta swenta te bayal ants winiketik, maba juʼ yuʼun yilel sok komil winik. 4 Jaʼ yuʼun nailaj bael ta animal, mo ta sicómoro-teʼ te banti ya xkʼax te Jesús yuʼun jich ya sta ta ilel-a. 5 Te kʼalal kʼax tey-a te Jesús, la stoy moel sit sok jich la yalbey: «Zaqueo, koan tal ta ora, yame xjilon ta ana yoʼtik». 6 Jich ko tal ta oranax sok tseʼelnax yoʼtan la yikʼ ta sna. 7 Te kʼalal jich la yilik, jich jajchik ta muken kʼop: «Ya xbajt jiluk ta sna jtul jmulawil». 8 Te Zaqueo la stejkʼan sba sok jich la yalbey te Kajwaltike: «Kajwal, yame kakʼbey oliluk te bintik ay kuʼun te pobreetike, spisil te bintik la kelkʼanbey te yantike chanebxan buelta ya kakʼbey sujtel-a». 9 Jaʼ yuʼun, jich albot yuʼun te Jesús: «Ta ora ini, julix te kolel ta na ini, melel jaʼnix stsʼumbal-euk te Abrahán. 10 Melel te sNichʼan te Winik* tal sle sok tal yakʼbey skolel te machʼatik chʼayemike».

11 Te kʼalal jich yakik ta yaʼiyel stojol-a te ants winiketike, te Jesús la yal yan lokʼombakʼop, melel nopol* ay ta Jerusalén sok skuyojik te oranax ya xchiknaj te Wentainel* yuʼun te Diose. 12 Jaʼ yuʼun, jich la yal: «Ay jtul winik te ichʼbil ta mukʼ te bajt ta yan lum te namal* ay swenta ya yichʼ yaʼtel ta ajwalil, patil ya sujt tal. 13 La yikʼ tal lajuntul j-abatetik yuʼun, la yakʼtiklanbey jujun mina-takʼin* ta jujuntul sok jich la yaltiklanbey: ‹Aʼtejanik sok te takʼine jaʼto te kʼalal ya sujton tale›. 14 Pero ya xpʼajot yuʼun te ants winiketik ta slumale, jich yuʼun la stikunik jtsojb ants winiketik ta yalel jich ini: ‹Ma jkʼankotik te ya x-och ta ajwalil ta jtojolkotik te winik ini›.

15 »Te kʼalal yichʼojix yaʼtel ta ajwalil-ae, sujt tal, jaʼ yuʼun la yikʼ tal te j-abatetik te la yakʼtiklanbey jilel te takʼine* swenta ya snaʼ te bin-utʼil aʼtejik soke. 16 Te machʼa nail noptsaj* jich la yal: ‹Kajwal, te mina-takʼin la awakʼbon jilele lajuneb mina-takʼin jolon kuʼun›. 17 Jich albot yuʼun te ajwalile: ‹¡Lek aʼtejat, lekil j-abatat! Te bitʼil jun awoʼtan la awentain te bin jteb la kakʼbat jilele, yame kakʼbat awentain lajunpam lumetik›. 18 Tal te schebale, jich la yal: ‹Kajwal, te mina-takʼin la awakʼbon jilele joʼeb mina-takʼin jolon kuʼun›. 19 Jichnix albot yuʼun te ajwalile: ‹Yame kakʼbat awentain joʼpam lumetik›. 20 Tal te yane sok jich la yal: ‹Kajwal, liʼ ay te mina-takʼin la awakʼbon jilele, la jkʼejbat sok la jpotsbat ta chujkilal. 21 La jxiʼat, melel tulan awoʼtan; ya alokʼes te takʼin te ma jaʼukat la awakʼ ta bancoe sok ya atsobey sit te awal tsʼunubil te banti maba tsʼunbajate›. 22 Jich albot yuʼun te ajwalile: ‹Ma lekil j-abatat, ya kichʼat ta kʼop ta swentanix te akʼope. Teme anaʼoj te tulan koʼtan, te ya jlokʼes te takʼin te ma joʼukon la kakʼ ta bancoe sok te ya jtsobey sit te awal tsʼunubil te banti maba tsʼunbajone, 23 ¿bin yuʼun-nix-a te maba la awakʼbon ta banco te jtakʼine?* Jich te kʼalal julone, la jpasbey ganar sjol te jtakʼin te jichuke›.

24 »Jich la yalbey te machʼatik tey ayik-ae: ‹Pojbeyaik te mina-takʼin yichʼoje, jaʼ xa awakʼbeyik te machʼa yichʼoj te lajuneb mina-takʼine›. 25 Pero, jich la yalbeyik te ajwalile: ‹¡Kajwal, ayix lajuneb mina-takʼin yuʼun!›. 26 Jich la yal te ajwalile: ‹Melel te machʼa ay bin ay yuʼune yame yichʼxan akʼbeyel, pero te machʼa maʼyuk bin ay yuʼune yame yichʼ pojbeyel te bin jteb ay yuʼune. 27 Jaʼnix jich ikʼaik tal te jkontratak te ma la skʼanik te ya x-ochon ta ajwalil ta stojolike, milaik, ya kil sok jsit›».

28 Te kʼalal laj yoʼtan ta yalel ini, mo bael ta Jerusalén. 29 Te kʼalal noptsaj* ta Betfagué sok ta Betania te ay ta wits yuʼun Olivoetik sbiile, te Jesús la stikun chaʼtul jnopojeletik yuʼun. 30 Sok jich la yaltiklanbey bael: «Baanik ta chʼin lum te chikan ta ilele. Te kʼalal ya xkʼoex tey-ae, yame awilik jkojt chʼin burro te chukul te mato ayuk machʼa moem-ae. Tilaik* sok ikʼaik tal liʼi. 31 Teme ay machʼa ya sjojkʼoybeyex ‹¿Bin yuʼun te yakex ta stilele?›,* jichme xa awalbeyik ‹Jaʼ ya xtuun yuʼun te Kajwaltike›». 32 Jich bajtik te jnopojeletik te la yichʼik tikunel baele, jich kʼot staik te bin-utʼil albotik bael yuʼun te Jesuse. 33 Te kʼalal yakik ta stilel-a* te chʼin burroe, jich albotik yuʼun te yajwale: «¿Bin yuʼun te yakex ta stilel te chʼin burroe?». 34 «Jaʼ ya xtuun yuʼun te Kajwaltike», xchiik ta yalbeyel. 35 Jich la yikʼik bael ta stojol Jesús te chʼin burroe. Te kʼalal la slimik snajtil kʼuʼik ta sba te chʼin burroe, tey la smojtesik-a te Jesuse.

36 Te kʼalal kajal bael tey-a te Jesuse, te ants winiketik la slimanik ta be te snajtil kʼuʼike. 37 Te kʼalal nopol* ya xkʼotix-a te Jesús ta be te ya xko bael ta wits yuʼun Olivoetik, tseʼelnax yoʼtanik spisil te jnopojeletik yuʼun te jich jajchik ta tulan aw ta yalbeyel yutsil skʼoplal te Dios ta swenta spisil te milagroetik* la yilik te la yichʼ pasele. 38 Jich la yalik: «¡Bin-naxme yutsil te machʼa yak ta talel jich bitʼil Ajwalil ta sbiil te Jehová!* ¡Ayuk lamalkʼinal ta chʼulchan sok akʼa yichʼ albeyel yutsil skʼoplal te Dios te ay ta chʼulchan!». 39 Ay chaʼoxtul fariseoetik te ay ta yolil te ants winiketik te jich la yalik: «Maestro, koma te jnopojeletik awuʼune». 40 Jich albotik yuʼun: «Ya kalbeyex, teme ya xkomik ta aw, jaʼ ya xjajchik ta aw te tonetike».

41 Te kʼalal nopol* ayix ta Jerusalén-a sok te kʼalal la yile, la yokʼetay. 42 Jich la yal: «Te jaʼukatnix la awichʼbey swentail ta kʼajkʼal ini te bin ya yakʼ te lamalkʼinale... Pero la yichʼix nakʼel ta atojolik te jich maba ya awilikix. 43 Yame sta skʼajkʼalel te ya xtal akontratak te ya sjoytayat ta teʼetik te josbil sniʼe; yame awichʼ joytayel sok yame awichʼ utsʼinel ta bayuk. 44 Te jaʼat sok te awal anichʼnabe* yame awichʼ jinel koel kʼalalto ta lum, maba ya yijkitayik ta atojol jpʼijuk ton te kajal ya xjil ta sba yan ton, melel ma la awichʼbey swentail te bin-ora talat ta ilele».

45 Tey-abi och bael ta templo, jajch snutstiklan lokʼel te machʼatik ya xchonbajik sok ya xmanbajik tey-ae. 46 Jich la yaltiklanbey: «Jich tsʼibaybil ‹Te jnae ya sbiilin na yuʼun oración›, pero te jaʼexe akʼatpʼunojikix ta schʼen j-elekʼetik».

47 Ta jujun kʼajkʼal, nojpteswan ta templo. Pero, te jwolwanej sacerdoteetik, te escribaetik sok te machʼatik ichʼbilik ta mukʼ yuʼun te lume la sleik te bin-utʼil ya smilik te Jesuse. 48 Pero maba la staik te bin-utʼil ya smilike, melel spisil te ants winiketik jkʼaxel stʼunojik te Jesús yuʼun ya yaʼiyik stojol te bin ya yale.