Génesis

47 Jich yuʼun, te José jich bajt yalbey te faraón: «Te jtat sok te jbankil kijtsʼinab ayikix ta skʼinal Gosén, la yikʼik tal te stuminchijik, swakaxik sok spisil te bintik ay yuʼunike. La yijkitayik jilel te skʼinal Canaán». 2 Jich yuʼun, te José la stsa joʼtul sbankiltak, la yikʼtiklan bael ta stojol te faraón.

3 Te faraón jich la sjojkʼoybey te sbankiltak te José: «¿Bin ya x-aʼtejex-a?». Jich la yalik: «Te joʼotik, te j-abatotik awuʼune, jkanantuminchijotik jich bitʼil te antiguo jmeʼ jtatike». 4 Jich la yalbeyikxan te faraón: «Talemonkotik ta nainel jich bitʼil jyanlumetik ta lum ini, melel tulan te wiʼnal ta skʼinal Canaán, te maʼyukix ak yuʼun ya sweʼ te tuminchijetik kuʼunkotik. Jaʼ yuʼun, awokoluk, akʼawotik ta nainel ta skʼinal Gosén». 5 Tey-abi, te faraón jich la yalbey te José: «Te atat sok te abankil awijtsʼinab talikix ta atojol. 6 Ayme ta akʼab spamal te skʼinal Egipto. Ikʼa bael ta nainel te atat sok te abankil awijtsʼinab te banti lekxan te kʼinale, akʼa nainukik ta skʼinal Gosén. Teme ya awil te ay winiketik te pʼijubenik ta lek ta aʼtele, akʼa skanantaybonik te wakaxetik kuʼune».

7 Ta patil, te José la yikʼ bael te stat, te Jacob, ta snaʼbeyel sba te faraone. Te Jacob la yakʼbey bendición* te faraón. 8 Te faraón jich la sjojkʼoybey te Jacob: «¿Jayeb awaʼbilal?». 9 Te Jacob jich la yalbey: «Ayix 130 jaʼbil te xtal xboone, kʼaxem bayal jwokol te jayebix jaʼbil kuxulone, pero ma spaj te jayeb jaʼbil xtal xbajtik te antiguo jmeʼ jtate». 10 Ta patil-abi, te Jacob la yakʼbey bendición* te faraón, jich lokʼ bael ta stojol.

11 Jaʼ yuʼun, te José la yakʼ nainuk te stat sok te sbankil yijtsʼinab ta skʼinal Egipto. Jaʼ la yakʼtiklanbey te banti lekxan te kʼinale ta skʼinal Ramesés jichnix te bitʼil la yal ta mantal te faraón. 12 Te José jaʼ ay ta swenta yakʼbeyel sweʼel te stat, te sbankil yijtsʼinab sok spisil te sfamilia te stat, jaʼ chikan te jayeb ta tul te alnichʼanetik ay yuʼunik.

13 Maʼyuk weʼelil ta spamal te kʼinale, melel kʼax tulan-a te wiʼnale. Ay swokolik yuʼun wiʼnal te machʼatik ayik ta skʼinal Egipto sok ta skʼinal Canaán. 14 Te José la stsob spisil te stojol te sit awal tsʼunubil te la yakʼik te lum Egipto sok te lum Canaán, la yichʼ bael ta sna te faraón. 15 La sta yorail te laj stakʼinik te machʼatik ayik ta lum Egipto sok ta lum Canaán. Jaʼ yuʼun, spisil te egipcioetik jajchik ta bael ta stojol te José sok jich la yalbeyik: «¡Akʼbotik jweʼelkotik! ¿Yuʼunbal ya awakʼ xlajotik ta wiʼnal ta skaj te maʼyukix jtakʼintike?». 16 Te José jich la yaltiklanbey: «Teme lajix te atakʼinike, ichʼbonik tal te chambalametik awuʼunik, jichme ya kakʼbeyex weʼelil». 17 Jaʼ yuʼun jajch yichʼik bael ta stojol te José te chambalametik yuʼunike. Jich te José la yakʼtiklanbey weʼelil ta swenta te scaballoik, stuminchijik, swakaxik sok te sburroik. Ta jaʼbil-abi, te José la yakʼtiklanbey weʼelil ta swenta te chambalametik yuʼunike.

18 Pero laj te jaʼbil-abi. Te yan jaʼbil tale, jajchik ta talel ta stojol te José sok jich la yalbeyik: «Ma xjuʼ ya jmuktik ta atojol, kajwal, te lajix te jtakʼinkotik sok maʼyukix te chambalametik kuʼuntike. Te binxanix ay kuʼunkotik te ya kakʼtik ta atojol, kajwal, jaʼ te jkʼinaltik sok te jbakʼetaltike. 19 ¿Yuʼunbal ya awakʼ xlajotik soknix te maʼyuk machʼa ya stuuntes te jkʼinalkotike? Manawotik sok mana te jkʼinaltik swenta ya awakʼbotik weʼelil. Yame xkʼootik ta moso yuʼun te faraón sok yame xkʼax ta skʼab te jkʼinaltike. Akʼbotik sit awal tsʼunubil swenta maba ya xlajotik sok yuʼun maba jochol ya xjil te jkʼinaltike». 20 Jaʼ yuʼun, te José la sman spisil te skʼinal te egipcioetik swenta jaʼ ya yuʼunin te faraone, melel ta jujuntul te egipcioetik la schon te skʼinalik ta skaj te kʼax tulan te wiʼnale. Jaʼ jich te bitʼil te faraón la yuʼunin spisil te kʼinale.

21 Ta patil, te José la yikʼ tal te ants winiketik ta mukʼul lumetik te ayik ta stiʼil skʼinal Egipto kʼalal ta yan stiʼil. 22 Jaʼxanix te skʼinal te sacerdoteetik te maba la sman te José. Melel jaʼ ya x-akʼbotik sweʼelik yuʼun te faraón sok jaʼ ya xkuxinik yuʼun-a, ta swenta-abi maba la schonik te skʼinalik te sacerdoteetike. 23 Jaʼ yuʼun, te José jich la yalbey te ants winiketik: «Yoʼtik, la jmanexix swenta jaʼ yuʼunex ya xkʼot te faraón soknix te akʼinalike. Liʼme ay te sit awal tsʼunubil yuʼun ya xtsʼunbajex ta akʼinalik. 24 Kʼalal ya sta yorail stsobeyel sit te awal tsʼunubile, akʼbeyaik jun ta yoʼebal te faraone. Te chanebxan ya xjile yame atuuntesik swenta ya achaʼtsʼunik ta akʼinalik jichme ya amakʼlin abaik sok te machʼatik ay ta anaik soknix te awal anichʼnabike». 25 Te ants winiketik jich la yalbeyik: «Kajwal, la akoltaybotik jkuxlejaltik. Teme lek ya awile, akʼa smosoinotik te faraón». 26 Te José la yakʼ jun mantalil te jaʼto jich ya yichʼ pasel ta ora ini ta skʼinal Egipto: te jun ta yoʼebal te sit awal tsʼunubil jaʼme yuʼun ya xkʼot te faraón. Jaʼnax ma la yuʼunin faraón te skʼinal te sacerdoteetike.

27 Te Israel sok te sfamilia jilik ta nainel ta Gosén, ta skʼinal Egipto. Ayin* yal snichʼnabik, jich la spʼol sbaik. 28 Te Jacob nain 17 jaʼbil ta skʼinal Egipto. Te jayeb jaʼbil kuxin jaʼ 147 jaʼbil.

29 Te kʼalal jtebxanix ya skʼan ya xlaj-a te Israel, la stikun ta ikʼel te José, te snichʼan, sok jich la yalbey: «Teme lek ya awilone, ya jkʼanbat wokol te yakuk apas ini: akʼa te akʼab liʼ ta yeʼtal kaʼ sok albon ta jamal te ya awakʼ ta ilel ta jtojol te skʼuxul awoʼtan te ma x-ijkitaywan soknix te jun awoʼtan ya akʼotes ta pasel te bin ya awale. Awokoluk, mame xa amukon liʼ ta Egipto. 30 Te kʼalal ya xlajon, ichʼbon lokʼel te jbakʼetal liʼ ta Egipto sok yame amukon ta smukenal te antiguo jmeʼ jtate». «Yame jpas te bin la awalbon», xchi te José. 31 Pero, te Israel jich la yal: «Albon ta jamal te jich ya apase». Te José la yal ta jamal te jich ya spas. Jich te Israel la snijan sba ta sjol swayib.