Te lek yachʼil kʼop ya yal te Lucas

8 Ta patil, te Jesús la sbeentay te mukʼul lumetik sok te chʼin lumetik, yak ta scholel te lek yachʼil kʼop yuʼun te Wentainel* yuʼun te Diose. Jokinbil yuʼun te 12 ta tul jpuk-kʼopetik. 2 Jaʼnix jich jokinbil yuʼun chaʼoxtul antsetik te la yichʼik lokʼesbeyel pukujetik ta yoʼtanike sok te la yichʼik lekubtesel ta swenta te schamelike, jich bitʼil te María te naʼbil sba bitʼil Magdalena —jaʼ te la yichʼ lokʼesbeyel jukeb pukujetik ta yoʼtane—, 3 te Juana te yinam Cuza —jaʼ te machʼa swentainojbey sna te Herodese—, te yane jaʼ te Susana sok yantikxan antsetik te la stuuntesik te bintik ay yuʼunik ta yakʼbeyel te bintik ya xtuun yuʼun te Jesús sok te jpuk-kʼopetik yuʼune.

4 Tey-abi talikxan kʼax bayal ta tul ants winiketik ta stojol te Jesús te talemik ta yanyantik lumetik, jich la yaltiklanbey yaʼiyik te lokʼombakʼop ini: 5 «Ay jtul jtsʼunbajel lokʼ bael ta stsʼunel te yawal tsʼunube. Te kʼalal yak ta stsʼunel-a te yawal tsʼunube, ay kʼot ta tiʼbe, la yichʼ tsʼoʼel* ta tekʼel sok te jaʼmal mutetik la sbikʼik bael te awal tsʼunubile. 6 Ay yantik te kʼot ta tontikil, te kʼalal chʼiik tale, takijik, melel takin te slumile. 7 Ay yantik kʼot ta yolil chʼixtikil, pajal chʼiik tal sok te chʼixetike, jaʼ tenotik yuʼun. 8 Pero, ay yantik te kʼotik ta lekil lum, te k’alal chʼiik tale, sitinik ta lek, kʼaxem ta 100 la yakʼ sit-a te bitʼil la yichʼ tsʼunele». Te kʼalal la yal ini, jich tulan kʼopoj: «¡Te machʼa ay schikine, akʼame schʼam yaʼiy ta lek te kʼope!».

9 Pero, te jnopojeletik yuʼun jajch sjojkʼoybeyik te bin swentail te lokʼombakʼope. 10 Jich la yal te Jesús: «Te jaʼexe ya awichʼik akʼbeyel anaʼik yuʼun Dios te bin mato yak’oj ta na’el-a ta swenta te Wentainel* yuʼune. Pero, te yantik ants winiketike jaʼnax ya yichʼik akʼbeyel snaʼik ta swenta lokʼombakʼopetik, manchukme ya yilik kʼinal yilel, maba ya yilik kʼinal, sok manchukme ya yaʼiyik stojol yilel, maba ya xkʼot ta yoʼtanik. 11 Te lokʼombakʼop jaʼ ya skʼan ya yal ini. Te awal tsʼunubile jaʼ te skʼop te Diose. 12 Te awal tsʼunubil te kʼot ta tiʼbe jaʼ skʼoplal te machʼatik ya yaʼiyik stojol te skʼop Diose, pero oranax ya xtal te Pukuj* ta sbulbeyel lokʼel te bin la yichʼ tsʼunel ta yoʼtanike, jich maba ya schʼuunik te skʼop Diose sok maba ya staik te skolelike. 13 Te awal tsʼunubil te kʼot ta tontikil jaʼ skʼoplal te machʼatik ya yaʼiyik stojol te skʼop Dios sok te oranax ya schʼuunik sok sbujtsʼ yoʼtanik; pero maba kʼuben te slojpʼ o yisime.* Cheʼoxebnax kʼajkʼal ya schʼuunik, pero te kʼalal ya xtal prueba ta stojolike, oranax ya yijkitayik. 14 Te awal tsʼunubil te kʼot ta yolil chʼixtikil jaʼ skʼoplal te machʼatik ya yaʼiyik te skʼop Diose, pero jaʼ ya xbajt ta yoʼtanik te bitʼil ya xkuxinik ta jujun kʼajkʼal, te kʼulejalil sok te bintik ya smulanik spasel ta skuxlejalik, jaʼ ya xtenotik yuʼun jich maba ya sitinik. 15 Te awal tsʼunubil te kʼot ta lekil lum jaʼ skʼoplal te machʼatik lek yoʼtanik sok te spisil yoʼtanik ya yaʼiyik te skʼop Diose, ya skʼej ta yoʼtanik sok spisil-ora ya sitinik.

16 »Maʼyuk machʼa ya stsum kʼajkʼ te ay bin ya snujanbey ta sba o te ya yakʼ ta yeʼtal wayibal, te bin ya yichʼ pasele, jaʼ te ya yichʼ akʼel ta yawil swenta jich ya yilik kʼinal te machʼatik ya x-ochik tale. 17 Melel maʼyuk bin nakʼbil te ma xjuʼ ta chiknajtesele sok maʼyuk bin muken ay te ma xjuʼ ta naʼbeyel swentail sok te ya sta yorail te ya yichʼ akʼel ta naʼel ta komonsitil. 18 Chʼama awaʼiyik ta lek te bintik yakex ta yaʼiyel stojole, melel te machʼa ay bin ya xkʼot ta yoʼtane yame x-akʼbotxan xkʼot ta yoʼtan ta lek. Pero, te machʼa maʼyuk bin kʼoem ta yoʼtane yame yichʼ pojbeyel te bin jteb kʼoem ta yoʼtane».

19 Tey-abi, te Jesús tal ta ilel yuʼun te snan* sok te yijtsʼinabe, pero maba juʼ yuʼunik skʼoponel ta skaj te bayal te ants winiketike. 20 Ay machʼa jich albot yuʼun: «Te anan* sok te awijtsʼinabe tekʼajtik ta fuera sok ya skʼan ya skʼoponat». 21 Jich la yal te Jesús: «Jaʼ jnan* sok jaʼik kijtsʼinab te machʼatik ya yaʼiyik stojol te skʼop Diose sok te ya spas ta skuxlejalike».

22 Ta jun buelta, te Jesús och ta barco sok te jnopojeletik yuʼun sok jich la yaltiklanbey: «Kʼaxukotik bael ta jejch mar». Jich bajtik. 23 Te k’alal yakik ta bael ta barcoe, way te Jesuse, tey-abi tal tulan yikʼal jaʼal ta mar te jich jajch ta nojel ta jaʼ te barcoe. Ayik ta tulan wokol. 24 Jich te jnopojeletik yuʼun bajt stijik te Jesuse, jich la yalbeyik: «¡Maestro! ¡Maestro! ¡Yame xlajotik!». Jajch te Jesús, la skom te ikʼ sok te yip te mare; jich kejchaj sok lamalnax jilel te kʼinale. 25 Jich jojkʼoybotik yuʼun te Jesuse: «¿Banti ay te schʼuunel awoʼtanike?». Chamnax yoʼtanik* yuʼun sok bayal yakik ta xiwel te jich jajch yalbey sbaik: «¿Machʼanix ta smelelil-a te winik ini te ya xchʼuunbot skʼop yuʼun te ikʼ sok te mare?».

26 Kʼotik ta jejch mar ta skʼinal te gerasenoetik te snujpʼsitayoj sba sok te skʼinal Galilea. 27 Te k’alal ko tal ta barco te Jesuse, tal ta tael yuʼun jtul winik te ochem pukuj ta yoʼtan. Ayix bayal tiempo te ma slap skʼuʼe sok maba yakix ta nainel ta na, nainem ta mukenaletik. 28 Kʼalal la sta ta ilel te Jesús, tulan awun sok la snijan sba ta stojol, jich tulan la yal: «¿Bin awentaon-a, Jesús, te sNichʼanat Dios te toyol aye? Ya jkʼanbat wokol te manchuk ya awakʼbon jwokole». 29 (Melel te Jesús bayal buelta yalojbeyix ta mantal-a te pukuj te yakuk xlokʼ ta yoʼtan te winike. Te winik ini bayal buelta* uʼuninot yuʼun-a te pukuje, ma junuknax buelta la schukbeyik yok skʼab ta cadena sok la yakʼik ta kanantayel, pero spisil-ora la stuchʼtiklan te cadena te la yichʼ chukel ta skʼab sok ta yoke, sok ya x-ikʼot bael yuʼun te pukuj ta lugaretik te namal* ayike). 30 Te Jesús jich la sjojkʼoybey te winike: «¿Bin abiil?». «Legión* te jbiile», xchi. Melel bayal te pukujetik ochem ta yoʼtan te winike. 31 Bayal buelta la skʼanbeyik wokol te Jesús te manchuk ya xtikunot bael ta xaab. 32 Tey-abi ay jtsojb chitametik te yakik ta weʼel ta witstikil, jich yuʼun te pukujetik la skʼanbeyik wokol te Jesús te yakuk x-akʼotik ochel ta chitametik-abi. Jich akʼbotik permiso yuʼun. 33 Jich te pukujetik lokʼik ta yoʼtan te winike, ochik ta chitametik. Spisil te chitametik la schʼoj sbaik koel ta sjemelul kʼinal ta mar, tey la sjikʼik* jaʼ-a. 34 Kʼalal te jkananchitametik la yilik te bin kʼot ta pasele, lokʼik bael ta anel sok bajt spukik ta alel ta mukʼul lum sok ta sjoyobal.

35 Te ants winiketik lokʼ yilik te bin kʼot ta pasele. Te kʼalal kʼotik te banti ay te Jesús, nakal kʼot staik ta yok Jesús te winik te lokʼ pukujetik ta yoʼtane, slapojix skʼuʼ sok ya snaʼix kʼinal-a, bayal xiwik yuʼun te kʼalal la yilike. 36 Te machʼatik la yilik te bin kʼot ta pasele la scholbeyik yaʼiy te yantik te bin-utʼil lekub te winik te ochem pukujetik ta yoʼtan-ae. 37 Bayal ants winiketik te talik ta sjoyobal skʼinal te gerasenoetik la skʼanbeyik wokol te Jesús te yakuk xlokʼ bael ta slumalike, melel bayal yakik ta xiwel. Jich och ta barco te Jesús, la yijkitay jilel te lum-abi. 38 Te winik te ochem pukujetik ta yoʼtan-ae la skʼanbey wokol te Jesús te yakuk sjokin baele, pero te Jesús ma la skʼan la yikʼ bael sok jich la yalbey: 39 «Baan ta ana sok cholbeya yaʼiy te machʼatik ay awuʼun spisil te bintik la spas Dios ta atojol». Jich bajt te winike, bajt spuk ta alel ta mukʼul lumetik te bin la spas te Jesús ta stojole.

40 Te kʼalal chaʼsujt tal te Jesús, leknax ilot yuʼun te ants winiketik te bayalik tey-ae, melel yakikix ta smaliyel-a. 41 Tey-abi tal ta stojol Jesús jtul jwolwanej yuʼun te sinagoga te Jairo sbiile. La skejan sba ta stojol sok la skʼanbey wokol te yakuk xbajt ta sna. 42 Melel te jip jtul yantsil nichʼan te 12 yaʼbilal yakix ta lajel-a.

Te kʼalal yak ta bael-a te Jesús, stenten-nax sbaik ta spat te ants winiketike. 43 Ay jtul ants tey-a te ayix 12 jaʼbil te ma xkejchaj ta yilel te schamele sok maʼyuk machʼa juʼem yuʼun spoxtayel. 44 Noptsaj* bael ta spat te Jesús sok la spikbey te stiʼil snajtil kʼuʼe, jich oranax kejchaj te schamele. 45 Jich la sjojkʼoy te Jesús: «¿Machʼa la spikon?». Spisil la yalik te ma jaʼukik, te Pedro jich la yal: «Maestro, bayal ants winiketik sjoytayojat sok yak stenbelat». 46 Pero, te Jesús jich la yal: «Ay machʼa la spikon, melel la kaʼiy te lokʼ kuʼele». 47 Te kʼalal la yil te ants te la snaʼ stojol te Jesús, yak ta nijkel-a te noptsaj* bael ta stojole, sok la yal ta komonsitil te bin yuʼun la spik te Jesús sok te bitʼil oranax lekube. 48 Jich albot yuʼun te Jesús: «Kantsil nichʼan, lekubatix ta swenta te schʼuunel awoʼtane. Lamalukme awoʼtan ya xbaat».

49 Te kʼalal yakto ta kʼop-a te Jesús, kʼot jtul winik te talem ta sna te jwolwanej yuʼun te sinagoga, jich jul yalbey: «Lajix te awantsil nichʼane. Ma xa awutsʼinix te Maestroe». 50 Te kʼalal la yaʼiy stojol te Jesús, jich la yalbey te Jairo: «Mame xiwat, jaʼnax ayuk schʼuunel awoʼtan, yame xkol te awantsil nichʼane». 51 Kʼalal te Jesús kʼot ta sna te Jairo, jaʼnax la yikʼ ochel te Pedro, Juan, Santiago sok te smeʼ stat te chʼin achʼixe. 52 Spisil te ants winiketik yakik ta okʼel sok ta smajel yoʼtanik yuʼun mel-oʼtan ta swenta te chʼin achʼixe. Jich la yal te Jesús: «Ma x-okʼex, melel maba lajem, wayalnax». 53 Te kʼalal jich la yaʼiyik stojole, jajch stseʼlayik yuʼun ya slabanik te Jesuse, melel snaʼojik te yuʼun-nix lajemix-a te chʼin achʼixe. 54 Tey-abi la stsakbey skʼab sok jich la yalbey: «Chʼin achʼix, ¡jajchan!». 55 Jich chaʼkuxaj te chʼin achʼixe sok jajch ta oranax. Tey-abi, te Jesús la yal te akʼa yakʼbeyik sweʼele. 56 Ta melel, mero bujtsʼan-nax kʼinal la yaʼiyik te smeʼ stat te chʼin achʼixe, pero albotik ta mantal yuʼun te Jesús te mame ayuk machʼa ya yalbeyike.