Proverbios
4 Jnichʼnab, aʼiya awaʼiyik stojol te tojobtesel yuʼun jtul tatil;
chʼama awaʼiyik ta lek swenta jich ay bintik ya awichʼbeyik swentail,
2 melel yame kakʼbeyex lekil tojobtesel;
mame xa awijkitayik te nojptesel* kuʼune.
3 Lekil alnichʼan kʼoon ta stojol te jtat
sok kʼux la yaʼiyon ta yoʼtan te jnane.*
4 Te kʼalal la snojpteson, jich la yalbon: «Nainuk ta awoʼtan te bintik ya kalbat.
Chʼuuna spasel te mantaliletik kuʼun, jichme jal ya xkuxinat.
5 Lea spʼijil awoʼtan sok lea te bintik ay ta ichʼbeyel swentail.
Mame xa awijkitay spasel te bintik ya kalbat sok mame xchʼay ta awoʼtan.
6 Mame xa awijkitay te pʼijil oʼtanil, melel jaʼme ya skanantayat.
Kʼuxukme ta awoʼtan, melel jaʼme ya skoltaybat akʼoplal.
7 Jaʼ kʼax mukʼxan skʼoplal te pʼijil oʼtanil, jich yuʼun lea te pʼijil oʼtanil.
Ta spisil te bintik ya ale, jaʼnix jich lea te bintik ay ta ichʼbeyel swentail.
8 Ayukme bayal skʼoplal ta awoʼtan te pʼijil oʼtanil, melel jaʼme ya smukʼubtesbat akʼoplal.
Teme ya apet, jaʼme ya yakʼ te ya awichʼ ichʼel ta mukʼ yuʼun.
9 Jichme ya yakʼ ta ajol jun tʼujbil corona;*
yame schʼalat ta tʼujbil corona».
10 Jnichʼan, chʼama awaʼiy te bin ya kalbat sok chʼuuna spasel,
jichme bayal jaʼbil ya xkuxinat.
11 Yame kikʼat bael ta be yuʼun te pʼijil oʼtanil;
yame jtojobtesat bael ta tojil be.
12 Te kʼalal ya xbeenat, maʼyuk bin ya smakbat awok;
teme ya x-animajat, maʼyuk bin ya skʼojchin awok.
13 Tsakame ta lek te tojobtesel; mame xa akoltay.
Kanantaya, melel jaʼme ya yakʼ xkuxinat.
14 Mame x-ochat ta sbe te machʼatik chopolik,*
mame xa atʼunbey sbe te machʼatik kʼax chopolik.
15 Pʼaja, mame xa atʼun;
mame xnoptsajat* tey-a, tojme ya xkʼaxat bael.
16 Melel ma x-och swayelik teme maba ya spasik te bin chopol.*
Ya xchʼay bael swayelik teme maʼyuk machʼa ya yakʼbeyik swokol.
18 Melel te sbe te machʼatik toj yoʼtanik jich kʼoem te bin-utʼil te sakal kʼinal ta sab
te kʼunkʼun ya sakub jaʼto te kʼalal buen sakix-a te kʼinale.
19 Te sbe te machʼatik chopolik* jich kʼoem te bin-utʼil te ijkʼal kʼinal;
ma snaʼik te bin ya skʼojchin yokik soke.
20 Jnichʼan, chʼama awaʼiy ta lek te bin ya kalbat;
tsʼechikintaya te jkʼope.
21 Mame ayuk bin-ora ya xchʼay ta asit;
kʼejame ta lek ta skʼubulil awoʼtan.
22 Melel jich ya sta skuxlejal te machʼatik ya schʼam yaʼiyik te jkʼop
sok jichme lek skojtol te sbakʼetalike.
23 Ta spisil te bintik ya akanantay, jaʼ xa akanantayxan ta lek te awoʼtan,
melel tey ya xtal-a te akuxlejal.
24 Mame xnoptsajat* ta stojol te lotil kʼopetik,
namalme* xa awakʼ aba ta stojol te kʼopetik te ma smeleliluk.
25 Tojnaxme xa awil bael;
jaʼme xa awil te abee.
26 Pamana* te be te banti ya xkʼax te awok,
jichme seguro ya awaʼiy aba ta beel tey-a.
27 Mame xbaat ta awaʼel ni ta akʼexam.*