Deuteronomio

7 »Kʼalal te Jehová te Dios awuʼunik ya yikʼex ochel ta kʼinal te ya x-och awochintayik, yame stentiklan lokʼel ta atojolik mukʼul nacionetik: te hititaetik, guirgaseoetik, amorreoetik, cananeoetik, perizitaetik, heveoetik sok te jebuseoetik, jukeb nacionetik te kʼax bayalxan yajwalul sok kʼax bayalxan yipik te bin-utʼil te jaʼexe. 2 Te Jehová te Dios awuʼunik yame yakʼ ta akʼabik sok yame atsalik. Yame skʼan ya alajinik ta jkʼaxel. Mame xa apasik chapbilkʼop sok te nacionetik-abi sok mame xa anaʼbey yoʼbolil sbaik. 3 Mame xnujpunex sok. Mame xa awakʼ xnujpun te awantsil nichʼnabik sok te skerem nichʼnabik sok mame xa awakʼ xnujpun te akerem nichʼnabik sok te yantsil nichʼnabik. 4 Melel yame yakʼ te ya yijkitayonik te awal anichʼnabik te jich ya yichʼik ta mukʼ yantik diosetik; teme jich ya apasik, te Jehová ya x-ilin ta atojolik sok oranax ya slajinex.

5 »Te bin ya skʼan ya apasike jaʼ ini: jinaik te skajtajib chikʼbil majtanil yuʼunik, lajinaik te balal tonetik te ya yichʼik ta mukʼ, bojaik te chʼul teʼetik yuʼun Aserá* sok chikʼaik te lokʼombaetik te spasojike. 6 Melel te jaʼex chʼul lumex yuʼun te Jehová te Dios awuʼunik, jaʼ la stsaex te Jehová te Dios awuʼunik ta yolil spisil te lumetik te ay ta swolol balumilal yuʼun jaʼ lum ya xkʼoex yuʼun te mukʼ akʼoplalike.

7 »Te Jehová la yakʼbeyex awilik skʼuxul yoʼtan jaʼ yuʼun la stsaex, pero ma yuʼunuk te kʼax bayalex ta stojol te yantik lumetike; jaʼ la stsaex yuʼun jaʼ chʼinex-xan ta stojol te yantik lumetike. 8 Pero, jaʼ ta skaj te kʼuxex ta yoʼtan te Jehová sok te la skʼan te ya skʼotes ta pasel te bin la yalbey ta jamal te antiguo ameʼ atatike. Jaʼ yuʼun, te Jehová la slokʼesex tal ta swenta yuʼel skʼab yuʼun ya skoltayex lokʼel ta kʼinal te banti mosoinbilex-ae, ta skʼab te faraón te ajwalil yuʼun Egipto. 9 Anaʼojik ta lek te jaʼ smelelil Dios te Jehová te Dios awuʼunik, te jaʼ Dios te jun yoʼtan, te ya skʼotes ta pasel te chapbilkʼop yuʼun ta jmil kajalkaj stsʼumbal te machʼatik kʼux ya x-aʼiyot ta yoʼtan sok te ya schʼuunik spasel te mantaliletik yuʼun sok ya yakʼbey yil te skʼuxul yoʼtan te ma x-ijkitaywane. 10 Pero, te machʼatik ya xpʼajotik yuʼun yame slajin ta jkʼaxel. Maba ya xjalaj yuʼun ya yakʼbey castigo te machʼatik ya xpʼajot yuʼune; jaʼnix ya yakʼbey stoj smulik. 11 Jich yuʼun pasaik tulan te ya akʼotesik ta pasel te mantaliletik, te leyetik sok te bintik schapoj te Dios te yak kalbelex ta mantal ta ora ini, yame skʼan ya achʼuunik spasel.

12 »Teme jaʼex ya awaʼiybeyikxan te bintik schapoj, ya achʼuunik spasel sok ya akʼotesik ta pasel ta akuxlejalik, te Jehová te Dios awuʼunik ya skʼotes ta pasel ta atojolik te chapbilkʼop yuʼun sok ya yakʼbeyex awilik te skʼuxul yoʼtan te ma x-ijkitaywan jich bitʼil la yalbey ta jamal te antiguo ameʼ atatik. 13 Kʼuxme ya yaʼiyex ta yoʼtan, yame yakʼbeyex bendición sok ya yakʼ te ya xpʼolex. Jich, yame yakʼbeyex bendición yuʼun ya ata bayal awal anichʼnabik, te bin ya yakʼ te lumkʼinal awuʼunik —te awal tsʼunubil, te achʼ vino sok te aceite—, sok te yalatak te wakaxetik awuʼunik sok te yalatak te tuminchijetik awuʼunik tey ta kʼinal te jamal la yalbey te antiguo ameʼ atatik te ya yakʼbeyexe. 14 Jaʼexnax te lum te ya awichʼik bayal bendición, maʼyuk yan. Ta awolilik maʼyuk jtuluk winik te ma xnichʼnaj sok jtuluk ants te ma x-alaj, jaʼnix jich ni jkojtuk stat sok smeʼ te chambalametik awuʼunik te ma xyakʼ yalatakik. 15 Te Jehová yame slokʼesbeyex spisil te chameletik sok maba ya stikun ta atojolik ni junuk tulan chamel te la awilik ta Egipto. Te bin ya spase, jaʼ te ya stikunlan bael ta stojol spisil te machʼatik te ya spʼajexe. 16 Yame skʼan ya alajinik spisil te lumetik te ya yakʼbeyex te Jehová te Dios awuʼunik. Mame skʼan ya anaʼbey yoʼbolil sbaik ni jaʼuk te ya awichʼik ta mukʼ te diosetik yuʼunik, melel jich ya xjuʼ ya xkʼot te bin-utʼil pejtsʼ ta atojolik.

17 »Teme jich ya awal ta awoʼtanik ‹Jaʼ kʼax bayalikxan te bin-utʼil te joʼotike, ¿bin-utʼil ya xjuʼ ya jtentiklantik lokʼel?›, 18 mame xa axiʼik. Jultesa ta awoʼtanik te bin la spasbey te Jehová te Dios awuʼunik te faraón sok spisil te Egipto, 19 te tulan castigo te jaʼexnix la awilik sok te señailetik, te milagroetik, te yip skʼab sok te yuʼel te Jehová te Dios awuʼunik te la slokʼesex tal-a. Jaʼnixme jich ya spas te Jehová te Dios awuʼunik ta stojol spisil te lumetik te ya axiʼike. 20 Te Jehová te Dios awuʼunik yame yakʼ te bayal ya xiwik jaʼto te kʼalal ya xlajik te machʼatik jilemik sok te ya snakʼ sbaik ta atojolik. 21 Mame xnijk awoʼtanik ta stojolik. Te Jehová te Dios awuʼunik sjokinojex, melel jaʼ jun mukʼul Dios sok kʼaxtoxan ya skʼan xiʼel stukel.

22 »Te Jehová te Dios awuʼunik kʼunkʼun ya stentiklan lokʼel ta atojolik te nacionetik. Maba akʼbilex permiso yuʼun oranax ya alajinlanik, yuʼun jich maba ya spʼol sbaik-a te jtiʼawal chambalametik sok maba ya yutsʼinex.* 23 Te Jehová te Dios awuʼunik ya yakʼbeyex ta akʼabik sok ya stsaltiklan ta jkʼaxel, jaʼto te kʼalal ya yichʼik lajinel ta spisilik. 24 Jaʼ ya yakʼbeyex ta akʼabik te ajwaliletik yuʼunik sok jaʼex ya atupʼbeyik sbiilik ta yeʼtal te chʼulchane. Maʼyuk machʼa ya xjuʼ ya stsalex jaʼto te kʼalal ya alajinik ta jkʼaxel. 25 Yame skʼan ya achikʼbeyik te slokʼomba te diosetik yuʼunik te spasojike. Mame xbikʼtaj awoʼtanik yuʼun te plata sok te oro te potsbil-a te lokʼombaetik ni jaʼuk te ya awichʼbeyik jilel, yuʼun jich maba ya xyalex ta jun pejtsʼ, melel jaʼ te bin ya yilay te Jehová te Dios awuʼunik. 26 Mame xa awichʼik bael ta anaik te bintik ilobtik sba, yuʼun jich maba pajal ya awichʼik lajinel sok. Yananixme skʼan ya awilayik-a sok ya apʼajik ta jkʼaxel, melel ya yichʼik lajinel.