Deuteronomio

6 »Jaʼik ini te mantaliletik, leyetik sok te bintik schapoj te la spason ta mantal te Jehová te Dios awuʼunik yuʼun ya kakʼbeyex anopik swenta ya achʼuunik spasel te kʼalal ya xkʼaxex bael ta kʼinal te ya awochintayik, 2 yuʼun jich ya axiʼik te Jehová te Dios awuʼunik te jayeb kʼajkʼal kuxulex te jaʼex, awal anichʼnabik, te amamatakik* sok ya achʼuunik spisil te bintik yaloj sok te mantaliletik yuʼun te yakon ta yalel ta atojolik yuʼun jich jal ya xkuxinex. 3 Aʼiya awaʼiy, Israel, yame skʼan te tsʼakal ya achʼuunik spasel yuʼun lek ya xkʼoex ta lokʼel sok jich ya apʼol abaik ta kʼinal te banti ya yakʼ bayal leche sok chab jich te bitʼil la yalbeyex ta jamal te Jehová te Dios yuʼun te antiguo ameʼ atatik.

4 »Aʼiya awaʼiy, Israel, te Jehová te Dios kuʼuntik jun-nax te Jehová. 5 Kʼuxukme xa awaʼiy ta awoʼtan te Jehová te Dios awuʼun ta spisil awoʼtan, ta spisil akuxlejal sok ta spisil awip. 6 Te bin ya kalbat ta mantal ta ora ini ya skʼan te ayuk ta awoʼtan, 7 sok yame skʼan ya awakʼbey snop te awal anichʼnab sok ya awalbey te kʼalal ayat ta ana, te kʼalal ya xbeenat ta be, te kʼalal ya xwayat sok te kʼalal ya xjajchat. 8 Chuka ta akʼab swenta snaʼojibal awuʼun; yame skʼan ya xkʼot jich bitʼil chujkilal ta atiʼba.* 9 Tsʼibaya ta steʼel te stiʼil ana sok ta puertaetik yuʼun te mukʼul lum awuʼun.

10 »Kʼalal te Jehová te Dios awuʼunik ya yakʼ x-ochex ta kʼinal te jamal la yalbey te antiguo atatik te Abrahán, Isaac sok te Jacob te ya yakʼbeyexe —jpam lumkʼinal te ay lekil mukʼul lumetik tey-a te ma jaʼukex la apasik, 11 naetik te nojelik ta bayal ta chajp te bintik lek te ma jaʼuk ta swenta te awaʼtelik, pozoetik te ma jaʼukex la ajokʼik sok tsʼusubiltik sok olivoetik te ma jaʼukex la atsʼunik— sok te kʼalal weʼemexix-ae jaʼto kʼalal nojemix te achʼujtike, 12 tsajtayame abaik* yuʼun ma xchʼay ta awoʼtanik te Jehová te la slokʼesex tal ta skʼinal Egipto te banti mosoinbilex-ae. 13 Yame skʼan ya axiʼik te Jehová te Dios awuʼunik, jaʼnaxme ya x-abatinex ta stojol sok jaʼnaxme ta swenta sbiil te ay bin ya awalik ta jamal. 14 Mame xa atʼunik yantik diosetik te ya schʼuunik te lumetik te ayik ta ajoyobalik, 15 melel te Jehová te Dios awuʼunik te ay ta awolilik, jaʼ jun Dios te ya skʼan te jaʼnax ya yichʼ ichʼel ta mukʼ. Teme jich ya apasik, te Jehová te Dios awuʼunik yame x-ilin ta atojolik sok yame slajinex ta jkʼaxel ta kʼinal.

16 »Mame xa apasik ta prueba te Jehová te Dios awuʼunik jich te bin-utʼil la apasik ta prueba ta Masá. 17 Yananixme skʼan ya achʼuunik spasel-a te mantaliletik, te jultesel oʼtanil sok te leyetik te la yal ta mantal te Jehová te Dios awuʼunik te ya skʼan ya achʼuunik spasel. 18 Pasaik te bin toj sok te bin lek ta sit te Jehová yuʼun jich lek ya xkʼoex ta lokʼel sok ya x-och awuʼuninik te lekil kʼinal te jamal la yalbey te Jehová te antiguo ameʼ atatik te ya yichʼik akʼbeyel yuʼune 19 te kʼalal ya stentiklan lokʼel ta atojol spisil te akontratak jich te bitʼil la yal ta jamal te Jehová.

20 »Kʼalal te awal anichʼnabik jich ya sjojkʼoybeyex ta pajel chaʼbej: ‹¿Bin ya skʼan ya yal te jultesel oʼtanil, te leyetik sok te bintik schapoj te la yalbeyex te Jehová te Dios kuʼuntike?›, 21 jichme xa awaltiklanbey: ‹Moso kʼootik yuʼun te faraón ta Egipto, pero te Jehová la slokʼesotik tal ta Egipto ta swenta yuʼel skʼab. 22 Jich yuʼun la yakʼ kiltik te Jehová señailetik sok mukʼul milagroetik te jkʼaxel lajinwanik ta Egipto, ta stojol te faraón sok spisil te machʼatik ay yuʼun ta sna. 23 Sok la slokʼesotik tal tey-a yuʼun ya yikʼotik tal liʼi swenta ya yakʼbotik te kʼinal te jamal la yalbey te antiguo jmeʼ jtatik te ya yichʼik akʼbeyel yuʼune. 24 Jich yuʼun, te Jehová la yalbotik ta mantal te yakuk jchʼuuntik spisil te mantaliletik ini sok te yakuk jxiʼtik te Jehová te Dios kuʼuntik swenta jlekilaltik ta sbajtelkʼinal, yuʼun jich lek ya xkʼootik ta lokʼel jich te bitʼil ta ora ini. 25 Jich toj ya kichʼtik ilel teme ya jkʼotestik ta pasel ta lek spisil te mantaliletik te yaloj ta mantal te Jehová te Dios kuʼuntik te ya skʼan ya jchʼuuntik spasel›.