El Cantar de los Cantares
Te jichuke ya xjuʼ ya kujtsʼuyat* te kʼalal ya jtaat ta fuerae,
jich maʼyuk machʼa ya spʼajon yuʼun.
2 Joʼon ya jtojobtesat bael;
ya kikʼat bael ta sna te jnan* te jichuke,
jaʼ te machʼa la spʼijubteson.
3 Ay ta yeʼtal jol te skʼexam skʼab*
sok spetojon ta swaʼel skʼab te jichuke.
4 Yantsil nichʼnab Jerusalén, ya kalbeyex ta jamal:
Mame xa atijik jajchel ta jtojol te kʼuxul oʼtanil, jaʼto teme la sta yorail».
5 Te sbankiltak* te sulamita-achʼix jich ya yalik: «¿Machʼa-a te yak ta moel ta jochol takin kʼinal
te stsakoj sba ta skerem te kʼux ta yoʼtan?».
Te sulamita-achʼix jich ya yal: «Ta yeʼtal steʼel manzana la jtijat.
Tey la yayintesat-a* te anane.*
Tey la yaʼiybey skʼuxul swokol ta alajel te anane.
6 Akʼawon jich te bin-utʼil sello ta awoʼtan,
jich te bin-utʼil sello ta akʼab,
melel ay yip te kʼuxul oʼtanil jich te bin-utʼil te lajele,
sok maba ya yijkitay sbaik ta jkʼaxel jich te bin-utʼil te Mukenal* maba ya yijkitay te machʼa swentainoj.
Te skʼajkʼal te kʼuxul oʼtanil jaʼ jich te bin-utʼil kʼajkʼ te yak ta tilel, jaʼ te kʼajkʼ te talem ta stojol te Jehová.*
7 Manchukme te jaʼetik tulan ya syukʼilan sba ma xjuʼ ya stupʼ te kʼuxul oʼtanil
ni jaʼuk te yip te mukʼul jaʼetik ya xjuʼ ya skuch bael.
Teme ay jtul winik ya sjap spisil skʼulejal yuʼun ay machʼa ya xkʼanot yuʼun,
yananix yichʼ pʼajel-a».*
8 Te sbankiltak* te sulamita-achʼix jich ya yalik:
«Ay kijtsʼintik achʼix te mato ayuk schuʼ.
¿Bin ya jpastikix-a te kʼalal ya xtal
ta kʼanel yuʼun ya xnujpun?».
9 «Teme jaʼ tsʼajkʼ te kijtsʼintike,
ya jtejkʼantik balal tsʼajkʼetik te pasbilik ta plata;
pero teme jaʼ tiʼnail ya jkʼajtanbeytik jun pimil tabla yuʼun cedro».
10 Te sulamita-achʼix jich ya yal: «Joʼon tsʼajkʼon,
te jchuʼe jaʼ jich te bin-utʼil toyol tsʼajkʼetik.
Jaʼ yuʼun, te kerem te kʼux ta koʼtan jich ya yilon
te jtaojix te slamalil koʼtan.
11 Te Salomón ay tsʼusubiltik yuʼun ta Baal-Hamón.
La yakʼ jilel ta kanantayel.
Ta jujuntul ya yakʼik jmil ta sejp plata-takʼin ta swenta te sit ya yakʼe.
12 Jaʼat awuʼun, Salomón, te jmil ta sejp plata-takʼin,
sok te 200 ta sejp plata-takʼin jaʼ yuʼun te machʼatik ya skanantayik te sit ya yakʼe.
Yan te joʼone ay tsʼusubiltik te joʼon-nax kuʼune».
13 Te jkanantuminchij jich ya yal: «Jaʼat, te nainemat ta tsʼunbil nichimaltik,
yakik ta smaliyel te ya xkʼopojat te machʼatik ya xjokinwanik.
Akʼbon kaʼiy-euk».